合羽橋道具街（河童橋道具街）位於淺草和上野中間，係一條南北向約800米長嘅商業街。從東京Metro銀座線田原町站、筑波快綫（Tsukuba Express）淺草站徒步約5分鐘即可抵達。除咗吸引去淺草和淺草寺嘅遊客順路到訪之外，亦有唔少海外專業廚師特地到此，簡直稱得上係「食」嘅專門商店街。 今次，會分成前、後篇，為大家介紹其中3間喺社交媒體上極具人氣嘅店鋪喔！
合羽橋嘅歷史、名稱嘅由來
合羽橋現時總共擁有170多間販賣烹飪器具、古道具嘅專門店，其歷史更超過100多年。據聞昔日賣古道具嘅商人們於江戶時代建造嘅新堀川其兩岸開設賣古道具嘅店舖，而成為其起源。
每間店舖所賣嘅商品亦各有不同！既有出售烹飪器具、菜刀、餐具等，提供多元化商品嘅店舖，亦有專門經營平底鑊、鍋具、菜刀、餐具等店舖。另外，仲有專門出售拉麵、蕎麥麵、烏冬等製麵機嘅商店，同埋製作麵包、糕點嘅工具、咖啡用品嘅專門店、甚至有提供廣告牌、食品樣品等店舖。
即使只係一個平底鑊或鍋具，從專業廚師御用嘅品牌物品，到需要花費幾個月時間由職人用心製作嘅特別訂製品，皆屬難以入手嘅商品，所以唔單止吸引日本國內人士到訪，更令全球廚師慕名而來河童橋，購買各種烹飪道具喔。
另外，每年10月都會舉辦「合羽橋道具祭」，如果喺該時期前往合羽橋道具街嘅話，或者有機會能以更划算嘅價格入手心儀嘅商品？
「超級」廚具專門店 飯田屋：商品數量高達8000件以上⁉ 簡直係廚具界嘅天堂
電視和雜誌等介紹合羽橋嘅特輯中，經常都會出現飯田屋嘅踪影。點解飯田屋會咁受歡迎？皆因2樓有成8500種廚房用具任君挑選，可以一邊比較各料理用具嘅尺寸、功能、製造商，一邊揀選自己想要嘅工具。唔單止種類豐富，陳列商品其實用程度亦係魅力之一。因此，除咗吸引一般料理愛好者，亦俘虜唔少著名餐廳廚師嘅芳心，成為飯田屋嘅粉絲喔。
店內嘅售貨架分為菜刀、砧板、平底鑊、鍋具等類別。店家懷著「希望盡量令客人能夠從多種商品中挑選出適合每一個人嘅工具」、「希望能令客人歡欣雀躍」嘅理念，貨架上擺滿唔同尺寸嘅商品同其相關商品，數量多到嚇一跳！
1樓嘅暢銷商品係磨蓉器和批皮器。特別推薦可以磨出帶有蓬鬆感蘿蔔蓉嘅磨蓉器，以及飯田屋與製造商合作製作推出嘅原創商品等。
另外，竟然可以尋找得到，其單位尺寸只相差1cc，各種唔同尺寸嘅湯勺。據聞係為咗滿足客人對於原本擺放喺度嘅商品表示「想要呢個中間嘅尺寸」嘅要求下，自然而然演變而成。直至現時，該種類亦持續增加喔！另外，亦擁有平底鑊、鍋具、方平底盤類、南部鐵器等，商品種類相當豐富。
另外，仲有一個獨特之處，就係設有雞蛋切割器和煎雞蛋相關商品齊全嘅「雞蛋區」（卵コーナー）、集結蒜頭去皮器、Ajillo鍋等嘅「大蒜區」（ニンニクコーナー）、製作飯糰和壽司等各類商品齊全嘅貨架。
2F設有集結左手專用物品嘅「左手專用區」（左利きコーナー），聽聞諮詢人數都唔少喔。
提供嘅商品種類豐富，更設有各別主題嘅貨架，只要到此一逛，就可以入手所有廚具嘅相關商品，簡直係廚具界嘅天堂！
景點資訊
- 飯田屋
地址：東京都台東區西淺草2-21-6
- 營業時間：10:00-18:00
- 定休日：全年無休（年末、年始除外）
馬嶋屋菓子道具店：超過3000種曲奇模具和可麗露模具極受歡迎！
馬嶋屋菓子道具店嘅店內中央，設有一鐵絲網裝置，並裝飾著3000件曲奇模具，通稱為曲奇塔（曲奇模具塔）。馬嶋屋菓子道具店係提供法式糕點「可麗露」模具等糕點模具，和麵包模具等豐富模具嘅店舖。
每個樓層都有不同商品。B1F舉行工作坊；B0.5F擺放著拎去焗又得雪又得，冷熱兼用嘅矽膠糕點模具；1F入口處附近陳列著可麗露、原創嘅雪芳蛋糕等各種西式糕點模具，再行入啲會見到和菓子、麵包製作等相關商品。亦有大量可愛嘅和菓子模具，櫻花等日式風格圖案嘅烙印模具喔！
2F和2.5F係陳列西式糕點和麵包製作專用工具嘅樓層；2.5F有各種唔同尺寸嘅蛋糕用唧袋、唧咀，仲有具耐熱性嘅輕量杯和碗，打蛋器等，齊備多款豐富商品。如果你鍾意入廚或手作糕點嘅話，淨係用對眼睇都經已相當興奮！
去合羽橋道具街嘅話，就一定要買返個馬嶋屋菓子道具店嘅曲奇模做手信！購買方法非常簡單，就係先從曲奇塔中尋找心儀嘅模具！
當中，除咗有可愛嘅動物、心型、雪人、運動、樂器、觀光名勝，仲有英文字母等，種類相當豐富，絕對係大人小朋友都可以同樂喔。當你搵到心儀嘅曲奇模之後，再望望模上面嘅號碼，然後從樓梯嘅專用箱取出同樣號碼嘅商品，再拎去埋單就OK！
景點資訊
- 馬嶋屋菓子道具店
- 地址：東京都台東區西淺草2-5-4
- 營業時間：【平日、星期六】9:30~17:30【星期日、假日】10:00~17:00
- 定休日：年末年始、夏季
喺合羽橋購物可以免稅！於加盟店購物嘅話，仲可以湊埋一齊辦理免稅手續！
合羽橋設有「Smart Refund合羽橋免稅櫃檯」（スマートリファンド かっぱ橋免税カウンター），外國遊客於加盟店購物滿5000日圓以上，即可一次過辦理免稅手續。只要持有護照、所購買嘅商品、收據，無論買咗幾多間店鋪嘅商品，都可以喺5分鐘內完成免稅手續，非常方便！
另外，呢個櫃檯仲有實施「兩手空空觀光服務」（手ぶら観光サービス），提供暫時寄放所購買嘅商品和行李及寄送至住宿設施、機場、海外等服務。另外，亦可以喺度兌換外幣喔。
去合羽橋道具街購物時一定要去行個圈！
合羽橋道具街官方網站： https://www.kappabashi.or.jp/en/
去合羽橋道具街嘅交通方式
合羽橋道具街位於淺草和上野的中間，從淺草寺步行約8分鐘。可以去完淺草寺嘅仲見世通、雷門等觀光景點後順路前往。
直接去嘅話，可乘坐JR電車，於山手線或京濱東北線嘅｢上野｣或｢鶯谷｣站落車後，徒步15分鐘。乘坐地下鐵、私鐵嘅話，從東京Metro銀座線｢田原町｣站落車徒步5分鐘；從日比谷線｢入谷｣站落車徒步6分鐘；從筑波快線｢淺草｣站徒步5分鐘；從都營淺草線｢淺草｣站徒步13分鐘，都可到達。
Comments