日文中，有好多詞彙驟眼一睇超級相似，但意思卻大不相同！今次，小編嚴選出各位喜愛日本嘅讀者們，絕對會喺日本嘅酒店、旅館、餐廳等地都會成日見到，有關料理、牛肉、酒嘅日文詞彙，為大家逐一解說。理解完以下日文詞彙嘅大不同之後，應該好想以一副得戚樣，向朋友仔分享相關日文詞彙嘅解說吧！
「會席料理」和「懷石料理」嘅分別係？
首先，小編先講講喺日本旅館嘅晚餐，經常會見到嘅套餐形式料理「かいせきりょうり」（kaisekiryori）。
如果用漢字寫「かいせきりょうり」嘅話，有「會席料理」和「懷石料理」兩種寫法。由於兩者唔止寫法相似，就連日文讀音都相同，所以有唔少人都會覺得「會席料理」和「懷石料理」嘅思意係一樣。事實上，兩者從歷史背景到提供菜色嘅順序都各不相同，係兩種完全唔一樣嘅料理。
「會席料理」係為品酒而誕生嘅料理盛宴
首先為大家解說遊客嚟到日本，經常都會有機會品嚐到嘅「會席料理」。
「會席料理」係於宴會、聚餐中以套餐形式提供，為品酒而設嘅日本料理。江戶時代（1603-1868）初期，俳人聚集嘅「俳席」（はいせき）被稱為「會席」（人們見面嘅座位），據聞係因為俳人吟詠俳句後，皆聚集於宴會上暢飲美酒而誕生。
由於「會席料理」係為享受飲酒而設嘅料理，所以基本上先上前菜，一邊飲酒一邊品嚐魚刺身、烤物、炸物、蒸物等，最後會上米飯和湯。並無特別詳細嘅菜單選擇規定和規則，可以輕鬆地邊飲酒邊享受時令食材為其特徵。另外，作為外觀奢華嘅日本料理「會席料理」仍被傳承至今，喺多間旅館、民宿、日本料理店皆有提供。
「懷石料理」係為品茶而誕生嘅料理。
有別於為品酒而誕生嘅「會席料理」，「懷石料理」係為品茶而誕生。據聞其歷史比「會席料理」更久遠，可以追溯至茶道被確立嘅安土桃山時代（1568-1600）。當時，「懷石料理」會於茶席或茶會，開始品茶之前提供，係用作充饑嘅輕食。
兩者最大嘅分別在於料理提供嘅順序，「懷石料理」會先提供米飯和湯。基本上會先享用飯、湯後，再品嚐烤魚和煮物，最後會提供濃茶、和菓子。
*1：「懷石」係指「禪僧為抵禦饑餓和寒冷而放入懷中（腹部）修行嘅溫暖石頭。
「懷石料理」中最後上嘅茶先至係主角。因此，料理中嘅菜色傾向避免過濃嘅調味。另外，為免與「會席料理」混淆，亦有將「懷石料理」稱為「茶懷石」（ちゃかいせき）嘅店舖。
相關文章
原來「 和牛」和「國產牛」嘅意思係唔一樣！?
壽喜燒、涮涮鍋、鐵板燒等會使用嘅牛肉係？以下落嚟，為大家講解何謂「和牛」和「國產牛」！
「國產牛」係指長時間於日本飼育嘅牛隻
根據農林水產省制定嘅《食品表示基準》，無分產地和品種，只要該牛隻最長飼育期間為日本，就可以標記為日本「國產牛」。即使係出生於美國嘅外來品種牛隻，如果飼養時間最長嘅國家係日本，即使係入口牛，亦可以使用「日本」作為該牛隻嘅原產地標記。
「和牛」係指日本固有品種嘅牛隻
另一方面，「和牛」有嚴格嘅定義，只有以日本本地品種為基礎，進行交配而成嘅「黑毛和種」、「褐毛和種」、「無角和種」、「日本短角種」4個品種，或以上品種間嘅雜交種先可以叫做「和牛」。於海外都擁有高知名度嘅「神戶牛」、「松阪牛」、「仙台牛」等牛牛，正正就係「和牛」喔。
喺日本，要以「和牛」之名作銷售嘅話，除咗要有日本國內出生、血統、品種類別等文件證明之外，必須要通過「肉牛可追蹤性（traceability）制度（*2）」(牛トレーサビリティ制度），同樣能夠確認牛隻出生和品種等資訊。另外，為識別真正嘅和牛，需要加上「和牛統一標誌」並受到法律嚴格監管。因此，「和牛」比一般「國產牛」昂貴。
*2：用10位數嘅個體識別號碼，去管理國產牛嘅可追溯系統。網站「牛個體識別情報檢索服務」中搜查每隻牛嘅分配號碼，可以調查得到其飼養場所、出生年月日、品種等資訊。
順帶一提，最近仲出現穆斯林教徒都可以安心食用嘅和牛。從牛肉加工、烹煮，到出貨為止所使用嘅設施和器材，都嚴格遵守「清真認証」，各位穆斯林嘅朋友們，都可以安心品嚐美味嘅和牛牛扒和壽喜燒喔。
相關文章
原來「清酒」和「日本酒」嘅意思並唔一樣？
日本酒擁有高品質，和「Wagyu」一樣，「Sake」呢個詞彙可謂全球通用，超級受歡迎。以下落嚟，會為大家講解一下，喺住宿地點嘅酒店、居酒屋、料亭等都可以享用得到嘅「清酒（Sake）」和「日本酒（Japanese Sake）」嘅差異。您成日覺得兩者係同一樣嘢？咁就大錯特錯啦！
★禁止酒後駕駛
★禁止未成年人士飲酒
「清酒」，係屬於酒類別中嘅其中一個項目。
國稅廳製定嘅酒稅法中，喺日本，「清酒」與「啤酒」、「果實酒」、「威士忌」並列，被分類為酒類別嘅其中一個項目。
酒稅法中，清酒必須要「酒精含量低於22度」。除此之外仲有好幾個條件，但大致上嚟講，清酒係指包括海外產「所有以米、米麴和水為原料發酵過濾而成（*3）嘅酒」。
*3：：「過濾」係指將製造過程中，發酵至粘稠狀嘅「酒醪」，並將其液體部分分離為原酒和酒粕嘅工序
「日本酒」係指「清酒」項目中，使用日本產原材料並於日本釀造嘅酒
另一方面，於「清酒」項目中嘅「日本酒」，亦被規定只可以使用日本產嘅米作為其原材料，並只能夠喺日本國內製造。海外大受歡迎嘅山口縣「獺祭（だっさい）」、山形縣「十四代（じゅうよんだい）」、新潟縣「八海山（はっかいさん）」等，都係「日本酒」嘅代表例子。
再者，「日本酒」和「清酒」仲有另一大分別，就係日本酒呢個稱呼被指定為「地理標誌（GI）（*4）」。
*4：關於酒類、食品等，特定農林水產品等名稱嘅保護法律。（GI）係表示正確產地和達到一定基準嘅產品標誌。
「日本酒」喺2015年被指定為「酒嘅地理標誌（GI）」後，可以更清楚區分使用外國產米嘅清酒、日本以外製造嘅清酒，以及真正嘅「日本酒」。意味著，對酒唔太熟悉嘅消費者，都可以輕鬆選擇高品質嘅「日本酒」，安心購買日本產「Made in Japan」嘅商品。下次有機會買「日本酒」嘅話，不妨以酒樽上貼著「GI」標誌嘅商品為目標吧！
今次，小編介紹咗3個關於食物嘅日文，或者你仲未睇夠喉。其實FUN! JAPAN仲有「綠茶」和「抹茶」嘅分別等，多篇去日本旅行前必讀嘅文章喔！另外，如果有咩主題想編輯部為你解說嘅話，記得要留言話畀小編知。
日本文化相關文章
Comments