「豪斯登堡」位於九州長崎縣，係日本最大規模嘅主題樂園。以歐洲城鎮為主題，明媚嘅運河穿過整個園區，河畔嘅花園綻放著鮮豔動人花卉，加上仲有豐富嘅遊樂設施、美食餐廳以及超多打卡影靚相位，就算玩足兩日一夜都唔夠喉喔！
小編今次就要開箱豪斯登堡園區內最豪華嘅酒店「歐洲飯店」，帶大家感受一下猶如入住尊貴上流社會嘅酒店，度過一個奢華好時光！
喺園內高級酒店「歐洲飯店」享受尊榮禮遇
「歐洲飯店」係豪斯登堡內最高級嘅歐式酒店，位於豪斯登堡象徵性建築「德姆特倫高塔」旁邊，並連接著運河，可以從園區入口乘搭運河船前往。酒店內有3間分別提供日本料理、鐵板燒及法式料理嘅餐廳，仲有裝修風格充滿著歐洲氛圍嘅酒吧及貴賓室。
踏入「歐洲飯店」大廳瞬間，即可感受到歐式風格設計嘅氛圍，加上每晚舉行嘅音樂會、專人運送行李，以及可以欣賞到運河和鐘樓美景嘅豪華房等，處處都感受到奢貴豪華嘅入住體驗。以下落嚟，會為大家介紹小編精選嘅歐洲飯店獨有魅力。
Anchors Lounge：提供自助式早餐及音樂演奏
歐洲飯酒店有幾個特色，當中包括擁有料理菜式豐富嘅自助式早餐以及凡入住者都可以觀賞嘅演奏音樂會 ！
喺一樓面向運河船渡船口，有個開放感十足嘅貴賓室「Anchors Lounge 」(アンカーズラウンジ），其實係早餐用餐區以及音樂會舉辦場地。除咗可以一邊享用豐盛嘅早餐，一邊欣賞窗外美景，下午茶與晚餐時段仲有專業歌手、樂團嘅音樂演出，係一個不可錯過嘅精彩位喔！
專屬服務：行李運送、運河船、接駁巴士
歐洲飯店位於園區深處，從樂園入口（迎賓門）行過去嘅話，大概需要行20分鐘左右。換言之，如果拖著行李，由豪斯登堡入口處行去酒店嘅話，真係要用唔少體力和時間喔。
為咗令所有入住者都可以享受既輕鬆又愉快嘅假期，歐洲飯店特別提供一個超貼心服務，包括一抵達豪斯登堡，就可以將行李拎去園區門口嘅「酒店行李寄存處（場内ホテル手荷物預かり所）」，只要提供訂房資訊，即可享有行李運送服務！辦理退房手續後，同樣可以使用呢個服務，酒店會幫你將行李寄返去「酒店行李寄存處」，等你可以輕鬆嚟輕鬆走，慳水慳力。
寄完行李，就可以兩手空空一身輕地進入豪斯登堡園區大玩特玩，晚上抵達酒店辦理入住手續時，行李亦安全運送到達，仲有專人幫你拎埋入房㖭！
由於園區非常大，想要來往酒店與園區主要出入口嘅朋友們，可以善用接駁巴士與運河船。
歐洲飯店有專屬嘅渡船口，無需與其他遊客一齊排隊登船，只要出示豪斯登堡嘅入場券，配合運行時間就可以無限次乘搭！接駁巴士則分別有園內來回酒店和「酒店行李寄存處」，以及能直達長崎機場嘅來回路線，同樣係免費乘搭。相關班次嘅時間表可以參考官方網站。
住客獨享嘅特典優惠：提早入園、免費使用溫泉設施
除咗以上專屬服務，住客仲可以免費使用「豪斯登堡」溫泉設施，酒店會提供住客專用嘅接送服務。另外，住客甚至可以憑當日有效嘅入場劵和訂房資訊，於早上開園前一小時率先進入園內逛遊園內歐式美景街道喔。
豪斯登堡「歐洲飯店」的房型介紹
歐洲飯店嘅房型非常多元，從面向內海嘅標準客房，到充滿英國經典花卉圖案嘅「花室」房型、歐式風格嘅「歐洲設計師室」、附設露台嘅豪華客房、以及各種套房等多達12種類型。更可從中選擇雙人房、雙床房，甚至公寓式或別墅式客房，應有盡有。無論係情侶抑或係多人數嘅家庭旅遊，都可以喺度享受最舒適嘅空間。另外仲有無障礙空間容房，等輪椅人士或行動不便嘅旅客都可以安心入住！
以下會為大家簡單介紹幾個基本房型。
標準客房
即使只係最基本嘅標準客房，每一個細節位也都非常講究。從地氈、牆上裝飾畫，到梳化、窗簾，燈飾照明等，皆採用一致色調，顯現出豪華穩重且精緻嘅氛圍。傢俬和床都相當厚實，帶畀人安安穩穩、可以好好瞓一覺嘅感覺。
歐洲設計師客房
「歐洲設計師室」和「花室」系列都係歐洲飯店嘅特色房型。而「歐洲設計師室」當中最具特色嘅就係以花卉為主題嘅客房！
例如小編今次入住嘅玫瑰花標準雙床房型，唔單止用色大膽，到處滿滿玫瑰花之外，連房間內所使用嘅香氛都係帶木質系嘅玫瑰花香！踏入房間嘅瞬間超震撼，覺得好似好浮誇咁，不過住落真係超級舒服呀！
行政客房
今次亦特別參觀埋「歐洲設計師室」嘅行政客房，唔單止室內空間夠晒大，淡雅藍綠色系嘅格調仲瞬間俘虜小編嘅心！從房間內可以直接欣賞到鐘樓及運河嘅河畔風光，感受明媚晨光與夜晚浪漫燈火，真係好有喺歐洲旅行嘅氣氛！
備品小物
房間內嘅備品小物質感亦非常好，有高級風筒、蓬鬆柔軟又唔會甩棉屑嘅毛巾、號稱新加坡貴婦品牌嘅「TWG茶包」，連盥洗用品都係頂級嘅「CO.BIGELOW」，洗完全身散發出自然清香，非常放鬆，超級好瞓吖！（笑）
入住歐洲飯店一晚，就可以享有咁豐盛嘅極致奢華享受，真係非常推薦大家一定嚟體驗一下！
當然，亦唔可以錯過豪斯登堡內好玩嘅遊樂設施&打卡精彩位影相留倩影啦！
酒店資訊
- 名稱：豪斯登堡「歐洲飯店」
- 地址：長崎縣佐世保市豪斯登堡町7-7
- 中文官網：https://chinese01.huistenbosch.co.jp/hotels/he/index
Comments