去京都旅行嘅話，梗係要盡興地玩、好好咁影打卡靚相啦！與此同時，你可能會擔心要手拎一大堆手信穿梭於京都中？唔使擔心！皆因喺京都車站就可以買齊所有手信，令你滿心歡喜地上車，心滿意足地離開京都喔！事不宜遲，即刻為你送上2023年京都最人氣嘅精選手信推介！
※本篇文章中登場嘅商品及其售價（含稅）皆為撰稿時之資訊。相關內容亦有可能變更，詳細資訊請上各店家官網查詢。
「京ばあむ」（Kyo-Baum） - 王道京都土產！人氣居高不下嘅抺茶年輪蛋糕
京ばあむ抺茶年輪蛋糕（厚度 3.5cm）/ 1,296日圓
講到京都嘅手信，梗係唔少得抺茶啦！各式各樣嘅抺茶甜品、餅乾、飲品，令一眾抺茶控嚟到京都就為之瘋狂，呢一款抺茶年輪蛋糕，就算係對抺茶卻步嘅人都會失守！唔太鍾意抺茶嘅朋友們，係咪成日都覺得抺茶帶有些少苦味？不過呢款「京ばあむ」（Kyo-Baum）抺茶年輪蛋糕，喺宇治抹茶內加入煎茶風味，巧妙地中和抺茶原有嘅苦味，喺香氣洋溢嘅抺茶麵糰上再搭配上豆奶麵糰所製作而成！甜度適中，最外層嘅抺茶糖霜更為年輪蛋糕增加多些少脆脆口感，令人忍唔住食完一啖又一啖！
除咗抺茶年輪蛋糕之外，「京ばあむ」（Kyo-Baum）亦有推出同款嘅餅乾小點心「京ばあむサブレ」（Kyo-Baum Sablé），一樣係使用宇治抺茶與豆奶製成，如果要送禮畀公司同事們嘅話，獨立包裝嘅餅乾就啱晒啦！
「水丸餅」 - 入口即溶！好玩又好食嘅「水信玄餅水球」
水丸餅（3個入 附黑蜜、黃豆粉） / 2,400日圓
呢款由「まるもち家」所推出嘅「水まる餅」（水丸餅，又稱「水信玄餅水球」），上市後於社群網站上造成轟動並獲得約26萬個Like (讀好)，迅速成為京都手信嘅人氣商品。「まるもち家」總店位於京都伏見稻荷大社附近，係一間和菓子專賣店，因應時代潮流嘅變化，傳統和菓子店家亦致力於開發更多新產品，令和菓子都可以打入年輕人嘅市場！
包裝望落成粒水球咁款，可以常溫保存（但係帶返香港嘅話，由於氣溫有所不同，所以建議都係放雪櫃比較穩陣），食之前先放入雪櫃雪一陣，食落口味更加分！包裝內附有牙籤，拎起枝牙籤用力拮個窿，就會「咕溜」地瀡出嚟，變成一粒又彈又透明嘅蕨餅，再淋上黑蜜與黃豆粉就可以享用！呢粒蕨餅就算沾上黑蜜與黃豆粉，入口依然無法掩蓋其清爽感 ！冰冰涼涼嘅感覺，彷如置身於炎炎夏日中，跳入清涼嘅大海，亦好似喺一間開住暖氣焗焗地嘅房入面，為你注入陣陣微風嘅清新感一樣！相信揀選呢款手信送畀親朋好友，瞬間令你馬上與日本最新潮流接軌！
「九條蔥餅乾」 - 仲未帶返香港就想食清光嘅魔性美味
九條蔥餅乾 / 300日圓
京都傳統蔬菜之一「九條蔥」，本來嘅風味就比一般蔥更強烈。呢款由千勝堂使用京都當地生產嘅九條蔥製作而成嘅餅乾，一打開就有滿滿嘅蔥香味，但係停留喺舌尖上嘅蔥味卻非常短暫，鹹度啱啱好，一打開就會唔小心食到一塊不漏！但係如果要去約會嘅話，就唔建議食用喔！皆因嘴入面會留低九條蔥嘅香味，到時可能會令你感到尷尬！
「九條蔥大蝦炸蝦米餅」 – 一望就知道係京都手信嘅舞妓圖案包裝！
九條蔥大蝦炸蝦米餅（10塊入） / 1,080日圓
呢款亦係京都手信嘅人氣商品，由「京都菓子工房イチハナダッテ」所生產，無論係外盒抑或係獨立包裝上，都印上可愛嘅京都舞妓圖案，招牌九條蔥蝦味米菓更被日本電視節目評選為「京都站人氣手信第3位」嘅實力派。粒粒米香中帶著京都野菜九條蔥嘅甜味，咬落去，會感受到陣陣蝦味，口感層次相當豐富，配茶或咖啡都完全無違和感，絕對係下午茶嘅新選擇！
同場加映：各種京都嘅送飯配菜令你白飯一碗接一碗！
日本有各式各樣用嚟送飯嘅配菜，令人成日都白飯食到無停口，呢三款喺京都車站內就可以買得到嘅「『舞妓はんひぃ～ひぃ～』辣粉 / 702日圓」（左1）、「京辣油香鬆 / 594日圓」（左2）、老字號漬物店「大安」嘅「小大安京潰物（3個入） / 648日圓」（左3至左5），通通都係為餐桌增色嘅最佳拍擋！
「舞妓はんひぃ～ひぃ～」辣粉
（左1）「舞妓はんひぃ～ひぃ～」嘅辣粉，包裝超級好認，就係二位舞妓嘅圖案，一般嘅七味粉通常都唔會太辣，但係呢款號稱係比市面販售嘅七味粉辣10倍，用嘅係日本產「夏灣拿辣椒」，再加上店家特有嘅調味方式，建議唔好一次加太多喔！
京辣油香鬆
（左2）「京辣油香鬆」可以用「百搭」去形容，無論係配飯、配麵、炒菜、烤肉、甚至加喺吐司上都非常好味道！加入芝麻與京都嘅九條蔥，增加唔少香氣，辣得恰到好處，對於平時有食辣嘅人嚟講，可以話係一啲都唔辣！甚至用嚟幫各種料理提味，更加係神來一筆，絕對係食完會上癮嘅好滋味，買一包可能會唔夠喉喔！
小大安京潰物（3個入）
（左3至左5）京都料理中嘅醃漬品亦係非常出名，2022年迎接創業120週年，京都漬物老店「大安」嘅小包裝醃漬品亦係人氣商品！強調使用國產蔬菜及天然高湯調味醃漬，保留住蔬菜原來嘅美味之餘，亦唔會太過鹹，小包裝設計方便享用，而且可以常溫保存（部分款式須冷藏），帶返香港送禮或喺酒店獨肥都相當適合！
今次推薦嘅手信全部都可以喺京都車站內買得到！
上面介紹嘅手信喺京都車站內嘅綜合紀念品商店或乘搭新幹線嘅出入口附近都有賣，下次去京都旅行，記得要預留些少時間，喺京都車站行個圈揀返幾款手信啦！
Comments