茨城縣位於關東東北部，乘坐特急列車等列車，從東京出發只需2小時即可抵達。換句話說，就算從東京前往，即日來回都夠玩！亦因為咁，講起東京即日來回嘅旅遊勝地，都會包括茨城縣喔。
講起茨城縣，可能有唔少人最先會諗起水戸市、大洗町、築波市等經常出現喺媒體上會介紹到嘅地方，但其實，茨城縣仲有超級多個不為人所知嘅名勝，亦有唔少日本通先知道嘅隱世景點。
今次，小編特登避開主要區域，會介紹一個仲未太為人所知嘅隱世好去處「結城市」！仲準備要帶大家跟著FUN! JAPAN編輯部推薦嘅旅遊路線，去結城市嘅街道上邊玩邊行返轉，發掘你至今為止都仲未知道嘅茨城縣新魅力！
究竟茨城縣嘅結城市係一個咩地方？
茨城縣擁有水戸市（偕樂園）、大洗町（大洗磯前神社）、日立市內（國營日立海濱公園）、築波市（JAXA築波宇宙中心）等多個旅遊目的地，首先為大家講解一下，點解喺茨城縣眾多嘅市町村中，絕對要去一次結城市嘅原因。
對於遊客嚟講，去日本旅行嘅最大樂趣之一，就係可以接觸得到日本文化。位於茨城縣西北部嘅結城市，至今仍保留著多個倉庫與町屋，係一個可以感受歷史街道嘅地區。既身處首都圈，亦可以感受得到不一樣嘅懷舊氛圍，喺當地嘅街道上，可以悠閒地享受「見世藏」、「和服」、「日本酒」等日本傳統文化與美食，亦係其魅力所在。
所謂嘅見世藏，係指將外牆用土牆與灰泥覆蓋而成嘅倉庫，並作為店鋪使用嘅日本傳統商家建築樣式。亦係代表結城市嘅歷史性建築物，當中包括多個被定為國家級登錄有形文化財。當中，有綢緞批發商、老字號大小型商店仍然存在至今，其數量亦係全國屈指可數嘅規模。
結城市係於鐮倉時代（1180年-1336年）以後，由統治結城嘅第一代當主結城朝光所建造嘅城下町，其當時街道區劃，竟然時至現今仍然保留著喔！亦大量保留著神社、寺院、古民宅等歷史悠久嘅建築物，可以感受到關東屈指可數嘅城下町昔日面貌。
另外，仲有唔少可以同時享受古今氣息嘅好地方。除咗有將擁有87年歷史嘅綢緞店改建而成嘅共享空間「Coworking&Caféyuinowa」，仲有唔少作為味噌或酒嘅釀造場所、以及咖啡店、桑拿等用途嘅見世藏喔！現時，市內剩下嘅見世藏數量多達31棟，漫步於街道上，就有如穿越時空一樣！無需時光機就可以體驗身在現代，卻行走於充滿懷舊風味嘅街道。即使對歷史唔太感興趣，呢一趟穿越時空體驗，一定會令你嘅旅程更精彩！
好鍾意歷史！對傳統文化感興趣！想體驗古風美好嘅日本風情！
如果以上有其中一個符合「你想」條件嘅話，就一定要去茨城縣結城市一遊！加上，精彩必睇位皆集中於最近嘅JR結城站附近，徒步即可玩勻所有精彩位。另外，從東京坐電車、或自駕前往，車程都係2小時以內即可抵達，相當推薦從市中心出發，享受一個即日來回嘅精彩之旅喔。
【10:00a.m.】歡迎嚟到日本屈指可數嘅高級和服，「結城紬」嘅世界
相信大家睇完以上介紹，對結城市都經已有一定程度嘅基本了解。事不宜遲，即刻跟著小編出發，去漫步結城市嘅街道！以下落嚟所介紹嘅景點，通通都係由JR結城站徒步15分鐘即可抵達嘅範圍，絕對可以去勻晒咁多個精彩景點一遊，係一趟相當高效率嘅旅程。
去到結城市旅遊，首先要介紹嘅係「結城綢」和服。皆因結城綢唔單止係受到全日本嘅和服愛好者喜愛，結城市更加係憑著結城綢呢款最高級絲綢，於全國打響其名。
結城綢約有2,000年歷史，係以結城市為主要地區所生產嘅和服，所有製作工序皆由人手工完成。當中，「紡紗、絣織捆版、地機紡織」（糸つむぎ・絣くくり・地機織り）呢3個工序，於1956年被定為國家重要無形文化財，2010年被登錄為聯合國教科文組織嘅無形文化遺産。
結城綢最大嘅特徵係，使用經過嚴格挑選嘅蠶繭作為原材料嘅真棉紡紗所織成。由於柔軟嘅真棉富含大量空氣，因此可製作出既舒適又保暖嘅布料。加上耐用程度極高又唔易起皺摺，可以陪伴擁有者度過百年歲月，亦有唔少家庭會將其代代相傳。
為咗將其技法傳達予後世，結城綢綜合博物館「絲綢之館」便誕生。館內除咗有展示超過200件結城綢嘅「古民家 陳列館」、日本唯一傳達結城綢歷史嘅資料館、體驗染織等設施之外，仲可以欣賞到被定為登錄有形文化財嘅大正時代、明治時代嘅建築物。
踏入由擁有150歷史嘅古民家移築改建而成嘅「古民家 陳列館」，館內被結城綢填滿嘅空間瞬即映入眼簾！對住眾多日本傳統花紋，與各種不同設計款式嘅和服，絕對會令人表示讚嘆。
喺「織場館」可以透過環保袋、披肩嘅染色體驗，仲有杯墊嘅編織體驗，切身感受到職人嘅手工製作過程。體驗活動皆為預約制，分別有10:00後，以及13:30後2個體驗時段。
結城綢嘅布料唔單止用於和服之上，亦會用於日常使用嘅化妝袋、領呔、筆袋、銀包、卡片套等物件。相信只要曾經用手摸過其輕柔觸感嘅人，都會成為結城綢嘅俘虜喔。
絲綢之館
- 地址：茨城縣結城市大字結城12-2
- 營業時間：平日10:00-16:00、週末及假日10:00-17:00
- 定休日：星期二、星期三
- 交通：從JR結城站徒步約10分鐘
- 官方網站：https://www.yukitumugi.co.jp/
【12:00p.m.】喺古民家嘆完絕品套餐，再穿越去昭和時代
了解過結城綢之後，即刻展開今次旅行嘅另一個目標——美食之旅吧。
以下落嚟要為大家推薦嘅係，吸引唔少縣外遊客特地前往，現時為結城嘅人氣餐廳之一「御料理屋kokyu.」。穿過被紅葡萄藤覆蓋嘅入口，可以望見將昭和時代初期建造嘅古民家改建而成嘅時尚創新店舖。除鞋行入去店內嘅瞬間，簡直就好似穿越時空一樣，眼前出現嘅係充滿懷舊氣息嘅走廊與大廳。可以一邊沐浴於窗外嘅陽光下，一邊感受木板嘅悠然空間，相當療癒。
今日嘅午餐，係置身於可暫離都市煩囂，一邊感受大自然與柔和木板嘅空間，一邊享用嘅午市套餐（完全預約制）！順帶一提，午市套餐會分為2個時段，並作每小時更換。
無論係午市定晚市，「御料理屋kokyu.」都會提供套餐。午市套餐可以從「杏」、「山吹」、「橙」3款套餐中選擇。使用嘅主要食材係茨城縣黑毛和牛嘅常陸牛、品牌豬肉嘅玫瑰猪肉、從縣內市場採購嘅時令魚類等當地出產嘅食材。
御料理屋kokyu.
- 地址：茨城縣結城市大字結城1085
- 營業時間：中午12:00-14:00，晚上18:00-21:00
- 定休日：星期一、每月第1個&第3個星期二
- 交通：從JR結城站徒步約15分鐘
- 官方網站：http://kokyu.in/
【1:30p.m.】前往登錄有形文化財，買麵包吧！
只要得到胃部容許，美食之旅仍然會繼續落去。小編詢問完當地人之後，得悉一間人氣熱話嘅店舖資訊。據聞店舖嘅建築物本身，竟然係登錄有形文化財嘅珍貴建築……聽完之後，小編決定要去一探究竟！
當地人為小編介紹嘅係將約於100年前建造嘅見世藏改建而成嘅麵包店「ぱんや ムムス」（Pan ya mums）。麵包店內左半邊係廚房，右半邊係擺放新鮮出爐麵包嘅賣場。當中，有方包、豆沙包、蜜瓜包、忌廉包、咖喱包、曲奇……種類相當豐富。
竟然可以「喺日本嘅歷史建築見世藏度買麵包」，感覺有少少不可思議，而且款款麵包都非常好味，如果大家個胃仲有位嘅話，一定要買多幾款大嘆特嘆喔。
ぱんや ムムス（Pan ya mums）
- 地址：茨城縣結城市結城1319
- 營業時間：11:00-18:00
- 定休日：星期日、星期一、星期四
- 交通：從JR結城站徒步約15分鐘
- 官方網站： http://panya-mums.com/
【2:00p.m.】與德川家甚有淵源嘅孝顯寺入手御朱印
結城各個景點距離都非常近，玩起上嚟既緊湊又方便。飯後散步嘅時候，順便前往從麵包店「ぱんや ムムス」徒步約10分鐘，即可抵達嘅「孝顯寺」參拜。
1515年由結城家第15代藩主創建，1599年由德川秀康（德川家康嘅次子）遷移至現時嘅寺院。作為與德川家甚有淵源嘅寺院而聞名，喺院內可以參觀結城市指定有形文化財嘅「朱塗三門」、以及正殿、鐘樓堂、坐禪堂等珍貴嘅歷史建築。
每月第一、第三個星期日嘅朝早會舉行坐禪會。挺直條腰，遠離手機，趁機度過一個與內在自我相遇嘅好時光吧。除咗坐禪會之外，亦會不定期舉辦寫經會與寺院瑜伽等活動。
巡遊寺廟不可缺少嘅御朱印。記得要將「與德川家甚有淵源嘅寺院」呢一張御朱印，加入個人收藏吧。
孝顯寺
- 地址：茨城縣結城市結城461
- 營業時間：可在院內自由參觀
- 交通：從JR結城站徒步約10分鐘
- 官方網站：https://t-koukenji.or.jp/
【4:00p.m.】喺結城最古老嘅見世藏尋覓日本酒
「當天空已不知不覺地變黑，係時候要返歸」嘅瞬間，小編先醒起——唔記得咗買手信呀喂…！
前往JR結城站途中，發現一間氣勢非凡嘅見世藏（據聞係於江戶時代末期興建，係結城現存嘅見世藏中最古老）。踏入店內，會望見一排排於1807年創業嘅酒莊「武勇」所製作嘅日本酒。聽聞武勇係茨城縣具代表性嘅酒莊，所以即刻決定「將日本酒作為今次旅行嘅手信」！
致力使用茨城縣當地產嘅物品作為材料製作，而原材料嘅米皆使用國產米。另一方面，會使用酒造內嘅水井提取鬼怒川水系嘅伏流水作為製造日本酒嘅水源，講究使用鬼怒川水系嘅軟水，去釀造出極細緻嘅日本酒。
從招牌商品嘅純米酒，至正宗燒酎、吟釀、大吟釀、純米大吟釀等一眾日本酒陣容中，一定可以搵到一款自己心儀嘅日本酒。對於唔多擅長飲酒嘅讀者朋友，亦推薦不含酒精嘅甘酒喔。喺充滿獨特風格嘅酒莊中，以日本酒為今次嘅旅程畫上完美句號吧。
武勇酒造
- 營業時間：09:00-17:00
- 定休日：星期六、日（5月~8月僅限星期日）
- 交通：從JR結城站徒步約11分鐘
- 官方網站：http://www.buyu.jp/
從東京出發2小時內即可抵達嘅茨城結城一日遊！
結城市係一個精彩位滿載嘅地方，即使係一日遊都可以遇上無限魅力，亦係最吸引人之處。 下次去日本旅行，不妨將茨城縣結城市排入行程，暫離一下大城市，為心靈排毒吧！
從東京都內前往結城市嘅交通方式例子：
【電車】
JR東京站→JR東北新幹線約45分鐘→JR小山站→JR水戶線約7分鐘→JR結城站
- JR新宿站→JR湘南新宿線約1小時20分→JR小山站→JR水戶線約7分鐘→JR結城站
【駕駛出發】
- 東京都內→東北自動車道約70分鐘→佐野・藤岡IC→國道50號約40分鐘→結城市街
Comments