「三鷹之森吉卜力美術館（三鷹市立動畫美術館）」位於東京都三鷹市井之頭恩賜公園內，從JR三鷹站到吉祥寺站步行約15分鐘即可抵達。「三鷹之森吉卜力美術館」位於樹林中央，地庫至樓上2樓共3層，建築物五彩繽紛且與別不同。
自2020年疫情後，海外門票一度停止發售，只有住喺日本嘅人先至買到門票。不過，喺2023年1月終於重新開始發售！於是今次連同超級鍾意日本動漫、娛樂嘅香港小編去實地採訪。為大家徹底報告三鷹之森吉卜力美術館最新面貌及其魅力。
從美術館入口就開始歡欣雀躍⁉FUN! JAPAN小編們喺玩味十足嘅龍貓接待處及入口處感到超級興奮！
以「一起成為迷路的孩子吧！ 」為概念嘅三鷹之森吉卜力美術館唔著重以次序參觀，反而係一個希望大家可以一邊喺館內四處走動，一邊尋找散佈於館內嘅角色人物，同各種細節位嘅地方。而且，喺美術館入口就已經可以見到其中一個，令人注目兼超吸睛嘅裝置設施喔。
龍貓接待處
進入美術館後，首先會見到一隻大龍貓喺接待處迎接大家。不過呢個並非真嘅接待處，而係畀入館人士大影特影，盡情打卡自拍嘅影相景點！再仔細望真啲，原來有放著寫上「真正的接待處→」嘅招牌，而接待處下方嘅小窗口中仲可以睇到窺視緊入館者嘅煤炭屎鬼，認真鬼馬！
沿著龍貓接待處嘅小路開始起行，可以見到又橙又黃等彩色外觀嘅建築物，以及美術館入口。抵達前會見到「真正的接待處」。喺綠意盎然嘅小路上，吹著微風，相當舒服，就好似喺吉卜力工作室動畫中所描繪於大自然風景嘅場景中散步一樣喔！好喇，終於要進入美術館啦！
從美術館入口落樓梯到地下樓層，彩繪玻璃景致映入眼簾
從美術館入口行入去，美麗嘅彩繪玻璃和天花板上擺設著壁畫，呢度就係入口，可以行樓梯落去下面嘅樓層。
唔單止係樓梯處，館內有多個窗戶和燈都係彩繪玻璃式樣，從外面射入陽光閃耀著七彩顏色，相當夢幻！而且，喺彩繪玻璃上到處都可以見到吉卜力作品嘅名場景，以及作品角色們嘅踪影，可以喺度尋找自己鍾意嘅場景和角色們添。
了解宮崎駿導演嘅堅持和動畫電影製作方法之吉卜力美術館嘅常設展示！
喺1樓嘅常設展覽「電影誕生地」（映画の生まれる場所），可以喺仿佛完整地重現動畫製作間嘅展示室內了解從構思到繪畫、作畫等製作和拍攝過程，可以學習動畫嘅製作工序。
特別值得一睇嘅係，最初展示嘅「少年的房間」（少年の部屋）！牆壁滿滿嘅繪畫，擺設著多個角色設計、插圖、形象板畫等，亦有唔少飛機模型和古董！喺充滿少年心儀物品嘅房間內，感覺就好似窺探著動畫構思誕生嘅場景一樣。
展示室隨處可見嘅手寫說明書和宣傳標語亦相當優秀。例如，喺剪分鏡嘅劇場導演張枱附近，有關於剪分鏡嘅說明和故事，並密密麻麻地貼滿牆壁，天花板附近亦有關於喺吉卜力工作唔太不順心時，所誕生嘅「怪人Ghiblibli」（怪人ジブリブリ）嘅生物解說！
同時，喺說明「彩色」嘅房間中，貼著逐格動畫，可以一邊移動背景畫和逐格動畫，一邊理解攝影結構嘅動漫攝影枱燈，亦有擺放編輯機，滿載著大人小朋友都可以同樂嘅展示！
上去2樓終於可以見到機械人士兵啦！重現《天空之城》某場景⁉
行完1樓，經過2樓嘅猫浴室（※使用對象為小學6年級以下嘅小朋友）前面，登上外面嘅螺旋樓梯就可以去到屋頂庭園。
抵達屋頂後，最先見到嘅係電影《天空之城》中無人不曉嘅機械人士兵！
望見巨大嘅機械人士兵，加埋終於去到美術館頂層嘅喜悅，小編們嘅情緒亦達到最高峰！並且，繞到機械人士兵後面行小路嘅話，仲可以睇到拉普達城嘅石板。因為機會難得，所以決定重現劇中片段，扮演一下閱讀古代文字再影相留念。呢一刻，絕對係粉絲陶醉於吉卜力世界嘅美好時光呢！
三鷹之森吉卜力美術館精選手信推薦
難得去到三鷹之森吉卜力美術館，就梗係要買呢度特有嘅手信返去啦。
以《飛天紅豬俠》中出現嘅空賊團名「曼馬由特隊」（マンマユート）所命名，店內銷售吉卜力商品和美術館特有原創商品。以下落嚟，會為大家介紹當中2樣推薦商品！
原創彩繪玻璃明信片
第一樣要介紹嘅係以美術館窗戶和門上使用嘅彩繪玻璃為主題嘅明信片。忠實地重現使用手吹玻璃製作嘅彩繪玻璃嘅透明感和鮮豔色彩，並且可以打開背面嘅小窗戶嚟做裝飾品，光線照射下會呈現淡淡色彩，龍貓們更會隨之浮現！
描繪著於電影《龍猫》中所出現龍貓們於月夜下吹著奏陶笛嘅一幕，設計亦相當時尚，係令人好想裝飾於房間內嘅好物喔。
美術館原創媒炭屎鬼
呢個美術館限定媒炭屎鬼公仔擁有毛茸茸嘅外表兼圓碌碌嘅大眼睛，係可愛嘅人氣角色，又點可以錯過呢。一粒當然可愛，推薦大家不妨買多幾粒，重現龍貓嘅名場色喔！
※價格可能會有所變動，恕不另行通知
三鷹之森吉卜力美術館門票預約方式
預約門票必須事先指定日期和入場時間，每個月10號上午10:00（日本時間）開始發售下一個月嘅門票。
預約、購買海外門票時，可以透過當地JTB集團購買，亦可以喺Lawson Ticket嘅英文版網站預約、購買。關於門票嘅處理、購買方法可以參考以下網站！
日文網址：https://www.ghibli-museum.jp/ticket/
英文網址：https://www.ghibli-museum.jp/en/tickets/
去三鷹之森吉卜力美術館嘅交通方式
從JR新宿站搭車到三鷹站，從JR三鷹站南口沿著玉川上水慢慢行約15分鐘。或者，從三鷹站南口乘坐巴士「Community Bus」約5分鐘。
從新宿站到三鷹站，可乘坐JR中央線嘅快速列車，需時20分鐘。
- 三鷹之森吉卜力美術館
- 地址：東京都三鷹市下連雀1丁目1-83
- 營業時間：
- 平日：10:00~17:00（最終入場：15:00）、星期六日及假日：10:00~19:00（最終入場：17:00）、夏季特別期間：10:00~18:00（最終入場：16:00）
- 入場費：
- 成人及大學生1000日圓、中學生（初中及高中）700日圓、小學生400日圓、幼兒（4歲以上）100日圓※未滿4歲免費
Comments