冬天想去北海道玩，但又驚天氣太凍？喺距離新千歲機場、札幌市中心只有1個鐘車程嘅白老同登別，就有好多會令您即刻㷫烚烚嘅景點同活動。好似喺2020年全新開幕嘅新設施「UPOPOY民族共生象徵空間」入面，您可以搵到北海道先住民「愛努族」最窩心嘅信仰、最暖胃嘅料理，仲有最熱鬧嘅歌舞表演。另外您仲可以揸四驅越野車或者機動雪橇喺雪上飛馳，又或者去登別浸吓溫泉，溫暖一下身心！想要知道更多就繼續碌落去睇啦！
北海道之旅第一站，一於去「UPOPOY民族共生象徵空間」！
唔知大家有無睇過日本大熱嘅動漫「黃金神威」（ゴールデンカムイ）呢？作品入面呈現咗唔少愛努文化，引人入勝，令唔少人都對愛努族產生咗興趣。無論您係唔係原作嘅粉絲，嚟到北海道都一定要去「UPOPOY民族共生象徵空間」，認識極富魅力嘅愛努文化！
「愛努族」係…？
愛努族係17至19世紀居住喺日本東北、蝦夷地以至庫頁島等地區嘅先住民族。佢哋最大嘅信仰，就係相信大地萬物，無論係動物、植物、風、雨定係河流，一切自然之物都由神（kamui）轉變姿態而成。根據呢種信仰，佢哋發展出一整套無可取代嘅獨特文化。以動物嘅動作作為創作概念嘅「舞蹈」、表達製作者情感嘅「紋樣刺繡」等等，都表現出愛努族虔誠又純樸嘅心。
唔好以為愛努文化好深好難明，其實北海道大部分地名都係源自於愛努語㗎！就好似大家熟悉嘅札幌（Sapporo）、小樽（Otaru）同富良野（Furano）等等，喺愛努語中都代表唔同意思。所以話嚟到北海道，其實我哋已經喺不知不覺間接觸咗好多愛努文化㗎喇！
「UPOPOY」喺邊？有咩好玩？
喺愛努語中意思為「大家一齊歌唱」嘅「UPOPOY」，喺2020年7月於白老郡白老町嘅POROTO湖畔隆重開幕。由新千歲機場出發嘅話，可以搭JR電車約40分鐘，喺「白老」站落車後行過去。另外由札幌站出發都一樣咁方便，搭電車嘅話只需大概1個鐘就到喇！
一入到園區，首先工作人員們都會以「irankarapte」（請讓我輕輕觸碰您嘅心）嚟打招呼迎接大家。淨係聽到呢句寒暄，個心應該已經即刻暖哂啦卦！唔止係咁，喺呢度行一圈，您將會更加感受到愛努文化帶嚟嘅溫暖氛圍。
園內分為東、西以及博物館三大區域，「國立愛努民族博物館」內有6個展區，以愛努族群嘅角度嚟帶大家認識愛努嘅語言、歷史同埋生活模式等。東區域內主要有工房、用唔同嘅「Cise」（房屋）去組成嘅「Kotan」（村莊），口傳文學表演、刺繡同樂器體驗，仲有愛努傳統射箭體驗，都可以喺呢度參加得到。而喺西區域，就有可以體驗手作樂器同體驗製作料理嘅「體驗學習館」，仲有可以欣賞藝能表演嘅「體驗交流大廳」。各種體驗活動動靜皆宜，保證男女老少都可以投入其中！
體驗①愛努傳統美食
喺以前，愛努人通過採集、農耕、狩獵同捕撈嚟獲得糧食，由於佢哋堅信食物係嚟自神（kamui）嘅恩惠，因此佢哋會盡可能原原本本咁利用每一種食材，絕對唔會浪費。佢哋除咗會食動物同魚嘅肉之外，仲會善用佢哋嘅油脂同鹽分嚟作調味，增加料理嘅層次。愛努嘅傳統料理雖然味道比較簡單樸素，但係只要用心細味，就會好感受到食材原本嘅美味。
有興趣嘅朋友，可以嚟到體驗學習館嘅「Ponto廚房」跟住老師一起試整！烹飪體驗嘅菜單會定期換款，今次小編體驗嘅，係愛努人喺婚喪或重要慶典時會食嘅細粒糰子「シト」。烚熟咗嘅糰子食落煙煙韌韌，點埋特製嘅核桃醬或者昆布醬一齊食，味道超細膩又特別！喺等糰子煮好嘅時間，老師仲會準備自家製嘅鮭魚乾同香薷茶（エント茶）畀大家試吓。由於愛努人自古就會食用呢啲小食同野草茶，所以話如果想了解愛努族嘅文化，從飲食方面入手絕對係個好方法！
體驗②口傳文藝
愛努語由於本身無文字，加上發音同文法上都同日語好唔一樣，因此要流傳落嚟認真唔易。而隨住近代化以及同化嘅過程，愛努語更面臨逐漸消失嘅危機。要傳承愛努語，「口傳文藝」就扮演住好重要嘅角色。後人透過口耳相傳同聽前人所遺留嘅錄音等資料，努力將愛努族眾多嘅歌謠故事同民間傳說代代相傳落嚟。喺有大房間意思嘅「Poro Cise」（ポロチセ）入面，每日都有兩場口傳文藝表演。表演者會喺傳統圍爐前，向來賓娓娓道來愛努日常嘅故事。帶有規律、好似喺度唱歌咁嘅吟誦方式扣人心弦，就算聽唔明啲內容，都一定會令你不自覺沉醉於其中！
體驗③傳統樂器mukkuri（竹口琴）
愛努族嘅傳統樂器「mukkuri」，係一種以竹片作主要材料製作而成嘅口琴。雖然構造簡單，但佢發出嚟嘅聲音一點都唔簡單。用一隻手捉實口琴再用另一隻手嚟拉動竹片，就會發出好似彈簧咁嘅聲音，非常奇妙。通過控制口部動作同呼吸，更加可以令mukkuri嘅聲音
演繹出更多變化，藉此表現出大自然嘅風雨聲、動物聲，或者係人類嘅喜怒哀樂。不過對於初學者嚟講要演奏可能有啲難度，記得跟實老師嘅指導好好練習喇！
體驗④圖騰刺繡
古時大部分嘅愛努族婦女，都好擅長喺衣物上刺上圖騰。圖案有唔同寓意，有啲表示驅邪，有啲就表現緊大自然或者係製作者嘅情感。由木片製作而成嘅木線非常耐用，繡喺衫上面唔單止夠哂靚，實用度仲好高𠻹。而衫上嘅圖騰愈多，代表住件衫嘅價值亦愈高。參與刺繡體驗嘅朋友，可以挑選鐘意嘅圖案再挑戰將佢繡喺杯墊之上。雖然刺繡方法本身唔難，但就相當考驗集中力同耐性。親手體驗過，先會知道原來古時愛努人嘅雙手真係好靈巧呀！
喺「體驗交流大廳」欣賞動人心魄嘅藝能表演
愛努族崇拜各種動物之神（kamui），亦都會舉行各種祭典儀式嚟表示自己敬畏同感謝嘅心。喺日常生活、祈禱以至重要儀式中都不可或缺嘅，正正係一啲傳統嘅舞蹈、樂器同歌唱表演。「體驗交流大廳」入面每日會舉行4場（星期六日及假日為5場）表演，每次都有6個項目輪流上演。喺呢度除咗可以欣賞得到以上介紹過嘅「口傳文藝」同「mukkuri」表演外，仲有仙鶴之舞、椴松之舞同豐收之舞等嚟自唔同地區嘅舞蹈表演，每一個項目都會帶畀大家前所未有嘅震撼同感動，絕對值得到場睇返幾次！提提大家喺大廳旁邊嘅服務中心內，仲可以免費借到各個語言嘅語音導賞機，入場前一定要記得先嚟呢度借用呀！
以美食感受愛努文化
如果您想喺園區內食晏，推介您到「焚火餐廳・咖啡廳 HARU RAN NA」。呢度嘅特點，係除咗可以品嘗賣相狂野味道細膩嘅料理之外，仲可以使用有愛努圖案嘅餐具嚟食嘢飲嘢𠻹！
UPOPOY民族共生象徴空間
- 地址：北海道白老郡白老町若草町2-3
- 網站：https://ainu-upopoy.jp/cn/
離開UPOPOY仲有嘢玩！登別越野公園&登別溫泉再令您熱多5℃！
登別越野公園
冬天喺北海道可以進行好多唔同嘅雪上運動，如果您唔想或者唔識滑雪，要唔要嚟「登別越野公園」體驗一下四驅越野車嘅樂趣呢？設施位於擁有豐饒自然環境嘅札內高原內，一年入面尤其係春夏兩季，都可以騎四驅越野車喺賽場馳騁；而喺積雪較深嘅季節，就可以體驗冬季限定嘅機動雪橇。呢次小編試玩嘅四驅越野車有分幾種體驗套餐，想簡單體驗嘅話可以參加15分鐘嘅體驗課程，而如果想要挑戰自己，就可以參加30分鐘嘅挑戰課程或1個鐘嘅完整課程。唔同課程除咗時間上有分別，行走嘅賽道都唔一樣，課程時間愈長行嘅賽道就愈崎嶇、難度愈高！
就算您完全無玩過四驅越野車都唔洗緊張，因為呢度嘅老師會非常有耐心同仔細咁教學同示範。而實際上越野車操作起嚟都唔難，右手嘅掣負責控制油門加速，左右把手就用嚟煞車。要改變方向嘅話，就要大角度咁扭動方向把手，並且移動重心去您想要前往嘅方向。參加完整課程加埋充足練習過後，老師會帶大家駛入進階者路線。大幅度嘅彎道、連續上斜落斜嘅小跳台，以及生滿樹木、好似原始森林咁嘅窄路，全部都好有挑戰性。喺無拘無束飛車嘅同時，仲可以享受越野路段充滿野性嘅自然風景，以及眼前一片銀白冰雪世界嘅絕景！
登別越野公園
- 地址：北海道登別市札内町230-1
- 網站：http://www.net-noboribetsu.com/
登別溫泉、地獄谷
上昼玩完越野車活動完全身，係唔係流咗好多汗呢？下昼就去登別浸返個溫泉，沖走一日嘅疲勞啦！以擁有9種唔同溫泉泉質而出名嘅「登別溫泉」，係好多日本人心目中最愛嘅溫泉勝地。溫泉區內各間溫泉旅館都各有自己嘅特色，好啱大家以呢度作為旅行嘅據點，同住多幾晚比較一下各個溫泉嘅差異！
果有時間嘅話，仲好建議大家去景色好似人間仙景咁嘅「地獄谷」行返轉。「地獄谷」係俱多樂火山嘅爆裂火山口遺跡，岩石上嘅多個噴氣孔，直到而家都仲會噴出白煙，形成好似傳說中「地獄」咁嘅景象。不過當仔細參觀過後就會發現，呢度嘅岩石因為地底湧出嘅溫泉水影響而產生多種顏色，七彩繽紛咁好靚㗎。冬天嘅白雪背景，仲會為地獄谷增添幾分淒美又浪漫嘅氣氛𠻹！
想要喺北海道品嘗海鮮嘅朋友，嚟登別一樣可以滿足到您！位於溫泉街嘅「溫泉市場」有提供多款鮮活海鮮同各種美食，保證可以令您大飽口福。養喺24小時不斷殺菌嘅養魚箱入面嘅蟹、貝類同蠔，喺落單之後先會喺水入面撈出嚟加工，唔只夠晒安全，鮮度都一樣係100分！
凍冰冰嘅冬天正係盡情享受北海道魅力嘅季節！只要跟住今次文章介紹嘅景點同活動嚟玩，相信一定可以令您身心都感到暖笠笠！下次就嚟UPOPOY同周邊地區嘅景點，過返個溫暖嘅冬天啦！
Comments