愛媛縣擁有5座「日本100名城」，其中4座城分別係擁有日本現存12天守嘅「松山城」同「宇和島城」，仲有三大水城*1之一嘅「今治城」同日本國家指定史跡「湯築城」。與呢4座城相比，只不過係愛媛縣指定史蹟嘅「大洲城」聽落好似唔多起眼，但其實大洲城亦有唔少不可錯過嘅珍貴必睇位喔！
*1：水城：臨接海洋、河川、湖泊處嘅城堡。今治城係日本代表性水城之一。
築城名人藤堂高虎之作「大洲城」
大洲城所在之處嘅大洲市有「伊予小京都」（「伊予」為愛媛舊名）之稱，位於愛媛縣西南方嘅內陸地區。因為清流肱川與瀨戶內海相連，而造就水運發達，自古以來便被視為重要嘅交通要塞之一。
大洲城建於地藏岳高地上，大洲舊稱為「大津」，因此大洲城又稱為「地藏岳城」、「大津城」。其建造歷史可追溯至鎌倉時代末期嘅1331年，由宇都宮豐房所建。後來勢力變遷，於1595年藤堂高虎受封為城主，呢位築城名人入城後，開始修築石垣，大肆整修整座城池成為近世城郭（擁有天守、石垣、護城河等構造嘅城郭），城下町亦接連出現。現時，我哋所知道嘅大洲城原型，正正係出自藤堂高虎之手。
大洲城流傳嘅悲傷築城故事「人柱傳說」
大洲城又被稱為大津城、地藏岳城，以及「比志城」。當中，比志城呢個名係源自於大洲城下方河流「肱川（ひじかわ）」（又名「比志川」），據聞呢條河流嘅名稱係嚟自一個哀傷嘅故事。
宇都宮豐房喺建築大洲城嘅時候，由於總係無法成功築起面向河流一方嘅高石牆，於是歸因邪氣作祟，認為需獻上活人祭品作為「人柱」方能化解，最終選出一位名為「おひじ（ohiji）」嘅16歲少女奉上生命，但少女留下心願：希望城下河流能以少女本人名字命名，等日後嘅人可以永遠記得佢嘅存在。最後，城牆順利完工，大家亦完成少女嘅心願，將河流取名為「比志川」。
嚟自當地人民嘅請願，木造天守完全復原
明治維新後，大洲城內嘅建築物接連廢棄，喺當地居民嘅努力下，本丸天守與櫓雖得以保留，但天守建築物本身因自然老化而毀壞，迫不得已地於1888年進行解體。不過，大洲城喺當地擁有無比嘅重要性，深愛大洲城嘅當地居民再度集結，捐獻大筆資金，最後喺2004年再度重建大洲城天守。
雖然重建天守呢個舉動並不稀奇，但大洲城天守嘅珍貴之處，係經歷第二次世界大戰之後，第一個復原嘅四層四階嘅「木造天守」，而且係以當時工法完全重現「當時面貌」。可以順利重現「木造天守」，除咗要歸功於明治時期為大洲城拍攝並留低唔少相片等珍貴資料之外，仲好幸運地可以喺當時曾參與天守建造嘅建築職人嘅屋企入面發現天守構造嘅木造模型，先至可以順利誕生完全重現天守呢項奇蹟。
日本城創舉！「城泊」住宿體驗
2020年，大洲市與株式會社NOTE等企業合作，誕生出「NIPPONIA HOTEL 大洲 城下町」，一個以「分散型旅館」嘅概念，將住宿空間、餐廳、活動設施等分散於大洲城城下町內，就連大洲城周邊地區、整個城下町通通都係旅館嘅範圍，當然包括埋大洲城呢位主角啦。
大洲城係日本第一個推出「城泊」嘅日本城堡。當中，包括天守與櫓在內嘅城堡更化身為住宿空間，只要參加城泊方案，夜晚就可以住宿於天守閣之中喔。大洲城城泊方案「大洲城Castle Stay」（キャッスルステイ）從住宿者抵達愛媛縣松山機場一刻便開始，首先會有工作人員前往機場迎接住者者，然後更換服飾，男士穿著盔甲，女士穿著公主和服，然後被帶領進入大洲城。入城時，更會重現1617年，大洲藩初代藩主加藤貞泰入城時嘅盛況。除咗會有扮演武士與家臣嘅工作人員出現，仲會有鐵砲隊射擊表示祝福嘅「禮炮」與吹奏法螺等盛舉，去迎接住宿者嘅到來，令你唔只住得似城主，簡直係完全成為城主喔。
至於關鍵嘅城泊費用，兩人兩日一夜包早晚餐嘅基本方案，金額超過100萬日圓，每年只會招待30組客人，而且僅限指定季節預約！不過，根據體驗過嘅人表示：呢個方案係「竟然」只需要100萬日圓，實在太平啦！到底值唔值得，真係要住過先知喇。
景點資訊
- 名稱：大洲城
- 地址：愛媛縣大洲市大洲903
- 時間：9:00～17:00（最後入場16:30）
- 定休日：無
- 入場費：成人550日圓／中學生以下 220日圓／5歲以下免費
- 交通方式：JR伊予大洲站乘搭市內循環巴士「GURURINOZU」約10分鐘，喺「大洲城前」站落車，徒步約5分鐘即可抵達
相關文章
Comments