關西地區擁有多個充滿和式風情、令人感受到濃厚歷史氣息嘅街道等櫻花勝地。當中除咗有可以享受古都風情嘅京都、奈良，仲有可以欣賞到城堡、明治時代嘅建築物與櫻花同框嘅美景。另外，位於滋賀縣嘅日本最大湖泊「琵琶湖」等，可以盡享豐富大自然景色嘅勝地亦不容錯過。關西地區實在有太多值得一去嘅賞櫻景點！今次小編會為你介紹FUN!JAPAN嚴選10個關西地區賞櫻名勝。記得要將呢篇文章收藏好，為你下個櫻花之旅做定功課啦！
1. 大阪府 大阪城公園
廣闊嘅「大阪城公園」中央位置，聳立著宏偉嘅大阪城天守閣。園內散佈著櫻花樹，當中最著名嘅櫻花名勝係可以欣賞到約300棵櫻花盛開景致嘅西之丸庭園。每年春天都會舉辦夜櫻亮燈活動（2022年取消），佇立於夜空中嘅大阪城與櫻花同框嘅景色，尤其莊嚴美麗！另外，園內有不少屋台擺檔，肚餓嘅話可以去大嘆特嘆屋台美食，更設有BBQ區域，可以喺度盡享燒烤嘅樂趣。
景點資訊
- 賞櫻時期：3月尾～4月頭
- 交通方式：從天滿橋站徒步約12分鐘（西之丸庭園）
- 地址：Map
2. 大阪府 造幣局「賞櫻通道」
每年4月中，會舉辦為期一週嘅「造幣局賞櫻通道」（造幣局桜の通り抜け），係一個於大阪造幣局舊淀川沿岸全長約560米嘅通道，邊行邊欣賞櫻花嘅活動（2022年為事先報名參考型式）。 通道上種植著八重櫻等約140個櫻花品種，櫻花樹數量亦高達約340棵，當中有唔少珍貴品種。造幣局為咗令大家對活動中盛開嘅櫻花更有親切感，每年都會從多個品種中，挑選一款作為「今年之花」，係可以一次過欣賞到各式各樣櫻花嘅高人氣景點。
景點資訊
- 賞櫻時期：4月中
- 交通方式：從京阪天滿橋站徒步10分鐘
- 地址：Map
3. 大阪府 毛馬櫻之宮公園
「毛馬櫻之宮公園」為貫穿大川兩岸長達約4.2公里嘅河濱公園。林蔭道上會見到染井吉野櫻、山櫻等約4800棵櫻花盛開，將四周染成迷人嘅櫻花色。除咗可以喺公園鋪上野餐墊，坐低悠閒賞花之外，亦可以從航行於大川嘅船上眺望櫻花盛開美景，尋找適合自己個人賞櫻方法。另外，附近亦有多個屋台小攤擋，可以品嚐到各式各樣嘅屋台美食。
景點資訊
- 賞櫻時期：3月尾～4月頭
- 交通方式：從JR櫻之宮站或京阪天滿橋站徒步約3分鐘
- 地址：Map
4. 京都府 嵐山
渡月橋係代表著嵐山嘅旅遊勝地，喺春天櫻花盛開時，約有1500棵櫻花將四周染成淡紅色彩。當中，特別出名嘅名勝之一，係作為「古都京都的文化財」被登錄成為世界遺產嘅天龍寺，約有200棵櫻花點綴著院內嘅迷人景致，可謂相當吸睛。另外，推薦乘坐「嵐電的夜櫻電車」觀賞夜櫻，電車喺燈光照耀下緩緩運行於長約200米嘅櫻花隧道中，可以體驗到仿如踏入夢幻世界一樣嘅賞櫻旅程。
景點資訊
- 賞櫻時期：3月中～4月尾
- 交通方式：京福電鐵嵐山站、阪急嵐山站或JR嵯峨嵐山站落車徒步即可抵達
- 地址：Map（嵐山渡月橋）
5. 京都府 哲學之道
被選為「日本之道100選」之一嘅櫻花勝地「哲學之道」。染井吉野櫻喺呢條長約2公里嘅小路上盛開，形成一條浪漫嘅櫻花隧道。眼前會呈現一片猶如別有天地非人間嘅迷人景色！另外，花落時嘅景致亦不容錯過。當櫻花花瓣落於水面上，佈滿整條水道時，會形成一條粉紅色、被稱為「花筏」嘅水上花毯景致，令人大飽眼福。呢度絕對係一個，可以享受悠閒漫步嘅櫻花名勝地。
景點資訊
- 賞櫻時期：3月尾～4月頭
- 交通方式：從「京都站前」巴士站乘搭市內巴士，到「銀閣寺前」巴士站約37分鐘，落車後徒步約2分鐘
- 地址：Map
6. 京都府龜岡市 七谷川堤「柔和之道」
沿著京都府龜岡市七谷川嘅「柔和之道」，係丹波地區屈指可數嘅櫻花勝地。春天時分，長達1公里嘅「柔和之道」有約1500棵櫻花盛開，為豐富嘅大自然景色增添唔少動人色彩。櫻花盛開時期會舉辦櫻祭節，晚上亮燈後的畫面相當夢幻。
景點資訊
- 賞櫻時期：3月尾～4月頭
- 交通方式：從「JR龜岡站北口」巴士站乘搭巴士到「七谷川」約9分鐘，落車後即可抵達
- 地址：Map
7. 奈良縣 奈良公園
奈良縣擁有以東大寺大佛聞名嘅「奈良公園」，亦係被選為「日本櫻花名所100選」嘅櫻花名勝。粉嫩櫻花與自由行走嘅鹿仔們同框景致，令人感受到濃厚嘅美麗日本風情。另外，園內種植了早開櫻花、遲開櫻花等各式各樣品種嘅櫻花，亦有奈良八重櫻、奈良九重櫻等珍貴品種。奈良公園係一個可以欣賞到多個櫻花品種，兼賞櫻時期較長嘅賞櫻名勝。
景點資訊
- 賞櫻時期：3月尾～４月尾
- 交通方式：從近鐵奈良站徒步約5分鐘。或從JR奈良站徒步約20分鐘
- 地址：Map
8. 奈良縣 高田千本櫻
高田川沿岸盛開嘅千本櫻係於1948年種植，盛開時橫跨兩岸南至北長達約2.5公里，由染井吉野櫻、山櫻、彼岸櫻等約1200棵淺紅色櫻花形成一條長長嘅櫻花隧道。晚上會亮燈，打造出點點璀璨嘅夜櫻景色，令你可以置身於夢幻氛圍中悠閒賞櫻。大中公園裡有著一排排嘅屋台美食，係一個可以一邊品嚐屋台美食一邊賞櫻嘅好地方。
景點資訊
- 賞櫻時期：3月尾～4月頭
- 交通方式：從近鐵高田市站徒步約10分鐘
- 地址：Map（大中公園）
9. 滋賀縣 海津大崎
「海津大崎」約有800棵染井吉野櫻於湖岸盛開，綿延4公里，亦係「日本櫻花名所100選」之一。突出於湖中嘅岩礁地帶，因為與碧湖以及位於琵琶湖北部嘅竹生島嶼形成鮮明對比，所以被選為琵琶湖八景嘅「曉霧・海津大崎岩礁」，櫻花盛開時，更為此景添上多一層華麗色彩。乘搭賞花船（需要預約）嘅話，可以從琵琶湖上優雅地賞花呢。
景點資訊
- 賞櫻時期：4月頭〜4月中
- 交通方式：從JR牧野站乘搭巴士到「海津大崎口」巴士站約5分鐘，落車後徒步約5分鐘
- 地址：Map
10. 兵庫縣 夙川公園
「夙川公園」係一個沿著夙川河岸嘅堤邊公園，河川全體被修建成公園嘅一部分，全長約4公里，亦係「日本櫻花名所100選」之一。河岸種植了染井吉野櫻、山櫻、大島櫻、關山櫻等多個品種，約1660棵櫻花樹，形成長約2.8公里嘅櫻花林蔭大道。晚上會於「苦樂園口」車站周邊亮燈，可以充分享受夢幻嘅夜櫻氛圍。
景點資訊
- 賞櫻時期：3月尾～4月頭
- 交通方式：從JR櫻花夙川站徒步約5分鐘
- 地址：Map
Comments