位於日本西南部，氣候溫和嘅九州，櫻花會比北海道、東北、關東、關西地區更早開花。九州除咗有多個可以眺望大海、島嶼等風光明媚嘅名勝、世界遺產、仲有可以同時欣賞城堡與櫻花同框嘅地方等，多個絕佳櫻花名勝。今次小編會為你介紹FUN!JAPAN嚴選10個九州地區賞櫻名勝。下次不妨親身前往，欣賞櫻花盛開於九州獨有景色嘅唯美風景吧！
1. 福岡縣 西公園
福岡縣唯一被選為「日本櫻花名所100選」嘅「西公園」，係一個從展望廣場可以眺望得到博多灣、能古島、連接著砂州嘅志賀島等景色嘅公園。春天時分，染井吉野櫻、陽光櫻等約1300棵櫻花，於和煦嘅陽光下綻放著淡紅色嘅櫻花景致，相當迷人。另一方面，夜晚亮燈後（2022年取消），可以欣賞到不一樣嘅夢幻美景。呢度亦係一個可以鋪上野餐墊，等大家可以坐低悠閒地賞櫻嘅櫻花名勝地喔。
景點資訊
- 賞櫻時期：3月尾～4月頭
- 交通：從大濠公園站徒步約15分鐘。或從「大濠公園」巴士站徒步約10分鐘
- 地址：Map
2. 福岡縣 小倉城
福岡縣內唯一擁有天守閣嘅「小倉城」於1602年建造，並於1959年重建。春天到訪時，染井吉野櫻、枝垂櫻等約200棵櫻花會盛開，為景色換上新裝，展現出迷人姿態。晚上會亮燈，營造出浪漫動人嘅氛圍。每年都會舉辦「小倉城櫻花祭」，可以見到唔少賣美食、雜貨等小攤擋，相當熱鬧。亦推薦從城堡最上層飽覽眼前美景喔。
景點資訊
- 賞櫻時期：3月尾～4月頭
- 交通：從JR小倉站徒步約15分鐘。或從JR西小倉站徒步約10分鐘
- 地址：Map
3. 佐賀縣 小城公園
佐賀縣內唯一被選為「日本櫻花名所100選」嘅「小城公園」，係於17世紀建造嘅名庭園。當時，其美麗程度，甚至遠在京都嘅朝廷亦有所聽聞。春天時分，染井吉野櫻、八重櫻等約3000棵櫻花為美麗庭院更添色彩。晚上亦有亮燈活動，打造出點點璀璨嘅夜櫻景色，相當夢幻。花落時，亦可以欣賞得到散落嘅花瓣漂浮於池塘上嘅唯美風情。
景點資訊
- 賞櫻時期：3月尾～4月頭
- 交通：從JR小城站徒步約5分鐘
- 地址：Map
4. 長崎縣 大村公園
「日本櫻花名所100選」之一嘅「大村公園」位於1599年築城嘅玖島城遺址上。春天時分，國家指定天然紀念物嘅大村櫻、染井吉野櫻等超過21個品種，約2000棵櫻花會盛開。夜晚亮燈時營造出華麗動人氛圍嘅夜櫻，有別於櫻花隧道、倒映於池塘水面嘅鏡面櫻花等白天櫻花景致。
景點資訊
- 賞櫻時期：3月尾～4月中
- 交通：從JR大村站乘搭巴士到「市役所前」巴士站約10分鐘，落車後即可抵達
- 地址：Map
5. 熊本縣 水前寺成趣園
被定為國家名勝、史跡嘅「水前寺成趣園」，係模仿江戶時代53處風光明媚嘅驛站「東海道五十三次」嘅回游式庭園所打造而成。一到春天，漫遊步道上嘅櫻花為庭院點綴華麗嘅色彩。 另外，可以喺據聞曾進行傳授「古今和歌集」奧義嘅「古今傳授之間」入面，一邊品嚐和菓子、抹茶一邊賞櫻，係一個可以優雅賞花嘅櫻花景點。
景點資訊
- 賞櫻時期：3月尾～4月頭
- 交通：從市電水前寺公園站徒步約4分鐘。或從JR新水前寺站徒步約10分鐘
- 地址：Map
6. 熊本縣「一心行大櫻」
位於一心行公園、樹齡約400年嘅一棵大櫻花樹「一心行大櫻」，據聞曾經係因為家臣們為供奉戰死嘅主君及其一族，種下呢棵櫻花，並一心修行而得此名。「一心行大櫻」係一棵樹高14米，樹幹粗7.35米，樹枝長度為東至南21.3米，南至北長達26米嘅大櫻花樹。盛開時會亮燈，可以於黑夜中欣賞到令人嘆為觀止嘅大櫻花樹景色。
景點資訊
- 賞櫻時期：3月尾～4月頭
- 交通：從南阿蘇鐵道中松站徒步約15分鐘
- 地址：Map
7. 大分縣 別府公園
「別府公園」面積有成27.3公頃，園內擁有100多年歷史嘅松樹群、竹林等，種有眾多樹木。春天時，淡紅色嘅染井吉野櫻與色彩繽紛嘅鬱金香等花朵，點綴綠意盎然嘅公園。 櫻花數量種得比較多嘅位置喺公園東邊。另外，亦可以喺度鋪上野餐墊，休閒嘆個便當亦相當寫意。不妨到意此一遊，帶著野餐嘅心情賞花吧！
景點資訊
- 賞櫻時期：3月尾～4月頭
- 交通：從JR別府站徒步約15分鐘
- 地址：Map
8. 大分縣 四浦半島
喺「四浦半島」可以觀賞到超過5000棵河津櫻花盛開嘅美景。晴天時，湛藍色大海令鮮豔嘅粉紅色櫻花望落更迷人。再者，因為河津櫻於半島全區域盛開，所以推薦自駕遊覽，去到邊賞到邊喔。另外，每年都會舉辦「豐後水道河津櫻祭」（2022年取消），可以品嚐到使用當地魚貝類與特產所製作嘅美食。
景點資訊
- 賞櫻時期：2月頭～2月尾
- 交通：從JR津久見站自駕前往約25分鐘
- 地址：Map
9. 宮崎縣 母智丘關之尾縣立自然公園
「母智丘關之尾縣立自然公園」係一個由母智丘嘅高地地帶，與關之尾瀑布周邊地區所形成嘅公園。母智丘擁有約2公里長嘅櫻花林蔭大道，亦被選為｢日本櫻花名所100選｣。種植了染井吉野、八重櫻等2600棵櫻花。母智丘每年都會舉辦櫻花祭，可以喺度享受得到屋台美食與民俗藝能。另外，亦推薦到母智丘神社，除了可以觀賞櫻花美景，仲能夠飽覽母智丘。
景點資訊
- 賞櫻時期：3月尾~4月頭
- 交通：從都城站乘搭巴士到「橫市｣巴士站約25分鐘，落車後徒步約30分鐘
- 地址：Map
10. 鹿兒島縣 仙嚴園
「仙嚴園」係於1658年由薩摩藩藩主建造嘅別邸，除咗可以欣賞到錦江灣與鹿兒島嘅象徵、世界屈指可數嘅活火山「櫻島」之後，亦係一個作為櫻花名勝而被喜愛嘅人氣景點。櫻花嘅開花時間比較早，從2月嘅寒緋櫻開始，到山櫻、染井吉野櫻等多款櫻花會陸續盛開。園內設有咖啡店與餐廳，可以一邊賞櫻，一邊嘆茶、食件和菓子、甚至嘆返款鄉土料理喔。
景點資訊
- 賞櫻時期：2月頭～4月中
- 交通：從JR鹿兒島中央站乘搭巴士到「仙嚴園前」巴士站約15分鐘，落車後徒步約1分鐘。
- 地址：Map
Comments