從池袋出發只要約1小時，即可抵達位於埼玉縣飯能市嘅姆明主題公園「Moomin Valley Park」。除咗到處都係充滿北歐風格、打卡一流嘅景點，仲有大人和小朋友都玩得開心嘅遊樂設施，以及可以搵到唔少姆明相關嘅限定商品，可謂精彩位多多。今次會分成「睇」、「玩」、「買」、「食」4個主題去介紹Moomin Valley Park。就算你無睇過姆明嘅故事，唔識日文，都可以喺度玩得興起，盡情享受喔！
全球首個姆明主題公園——日本Moomin Valley Park充滿北歐氛圍
左：Moomin Valley Park©Moomin Characters™
右：Metsä Village
「Moomin Valley Park」位於埼玉縣飯能市嘅「Metsä Village」內，繼芬蘭後全球第2個關於姆明嘅主題公園。透過各種展示和體驗設施，令大家好似行咗入姆明故事一樣，與姆明同渡愉快時光。另外，隔離嘅「Metsä Village」園內景致令人彷彿置身於日本國外、充滿北歐氛圍嘅景點。11月中至12月中嘅秋天時，湖邊一片樹木都會化身成紅葉景致，相當迷人，因此相當受遊客歡迎。
「睇」盡Moomin Valley Park！來進入姆明故事世界，找回童心吧～
Moomin Valley Park園內，到處都係重現姆明故事內嘅建築物，例如沐浴小屋和燈塔。北歐風格嘅外觀唔單止係人氣打卡兼影靚相嘅景點，設施內亦有展示故事中登場嘅小道具，知道姆明相關故事後，會不其然感嘆「啊！原來係嗰個場景嚟㗎！」，處處玩味十足！如果想了解更多關於建築物嘅故事，可以喺設置於園內4個地方嘅「故事之門」（ストーリーの扉），觀賞原創短篇影片。
另外，姆明故事中登場嘅角色人物亦會喺園內出現！如果好彩撞到佢哋嘅話，一定要影返張合照喔！就算見唔到姆明佢哋，都可以喺「迎賓大門」（Welcome Gate）、以「姆明與書」為主題嘅展示板度影相留念！
姆明之家
唔單止係外觀，就連內部裝修都忠實重現姆明一家居住嘅宅邸。一行入去，就好似跳咗入姆明世界，窺探姆明屋企一樣，相當有趣。
透過此處所設置嘅傢私和裝修等，不其然會令人聯想到角色人物嘅性格和背景，亦係另一種樂趣。
「KOKEMUS」展覽館
喺樓高3層嘅「KOKEMUS」展覽館內，有以各種方式重現姆明故事嘅展品。
例如，有將小說和圖畫書中曾出現嘅情景打造成立體展品，你可以置身於呢個夢幻空間內，與姆明故事中嘅角色人物齊齊影相。
即使唔多了解姆明相關故事，館內亦有用英文描繪故事內容嘅展示品、繪本和小說中登場嘅所有人物介紹等展示，一邊細看一邊尋找有趣嘅新發現啦。
1樓「中央空間」（センタースペース）重現姆明谷整體嘅迷你模型都係一大重點！再望真啲，就會發現連內部裝飾都同「姆明之家」嘅幾乎一模一樣㗎！
「Emma劇場」（エンマの劇場）
你知道身型圓碌碌兼大大份嘅白雪雪姆明，原來可以輕快地跳舞嗎？ 喺「Emma劇場」（エンマの劇場），就可以欣賞到姆明與朋友們嘅舞蹈表演，表演過程中姆明佢哋仲會教埋舞步，等大家可以齊齊開心地跳舞。
「玩」盡Moomin Valley Park！與姆明結伴齊齊出發冒險之旅
姆明一家都好鍾意冒險。因此，園內除咗亦有室外遊樂園和空中飛索等可以激發大人和小朋友冒險心嘅遊樂設施，亦有遊戲機臺等可以一齊大玩特玩。
©Moomin Characters™
呢度仲有姆明爸爸講述過去嘅冒險體驗「海之交響號」（海のオーケストラ号），阿美嘅惡作劇而引起嘅有趣故事「阿美之Play Spot」（リトルミイのプレイスポット）呢啲體驗式劇場遊樂設施。
「買」盡Moomin Valley Park！原創商品超可愛，令人不經意越買越多～
面積和商品數量都係全球第一嘅「姆明谷賣店」（ムーミン谷の売店）販售姆明相關商品，從食品到雜貨都一應俱全。當中竟然有成一半以上嘅商品，都係只有呢度先買得到嘅限定商品！有超級多姆明圖案和顏色都非常可愛嘅商品，聽講「嬲嬲姆明」嘅商品好似特別受歡迎喔！
「食」盡Moomin Valley Park！喺充滿北歐風格嘅餐廳和Café大嘆美食♪
Moomin Valley Park園內設有堂食嘅餐廳和提供外賣嘅店。當中，推薦「姆明谷食堂」（ムーミン谷の食堂）所提供嘅北歐家庭料理——肉丸。唔單止夠晒份量，連埋醬汁一齊食仲超級好味道！
另外，喺「圖書館咖啡店」（ライブラリー カフェ）可以免費閱讀姆明嘅小說和圖畫書等書籍。仲有班戟三文治（パンケーキサンド）、杯上印有姆明圖案嘅布甸等甜品、小食任君選擇，不妨喺度食個小食飲杯咖啡，嘆返個下午茶啦。
從池袋到Moomin Valley Park嘅交通方式
從池袋站乘坐西武池袋線嘅特急列車到飯能站需時50分鐘，然後轉車搭巴士，約13分鐘後喺「Metsä」巴士站落車，徒步即可抵達。另外，亦有印上花樣圖案嘅直達巴士運行，從東京站出發約1個半小時。兩者皆有門票連車票嘅優惠組合喔。
景點資訊
- 名稱：Moomin Valley Park
- 地址：埼玉縣飯能市宮澤327-6
- 開園時間：
- 平日：10:00-17:00
- 星期六、日及假日：10:00-18:00
- 門票：（1日票）
- 成人（中學生以上）：預售票3,000日圓/一般門票3,200日圓
- 小童（4歲～小學生）：預售票1,800日圓/一般門票2,000日圓
- 官網：https://metsa-hanno.com/
Comments