東京嘅電車、地下鐵發展成熟，作為交通工具基本上都去得哂東京都內嘅觀光景點。但搭電車時，特別係地下鐵，想欣賞窗外街道風景就有點難度......如果想喺市區移動期間都可以慢慢細心欣賞東京大都市嘅景色嘅話，推薦乘搭雙層開篷巴士「SKY HOP BUS」，喺高處用平時唔同嘅角度，放眼眺望東京街景。而且唔只係搭巴士咁簡單，仲提供多種有助觀光嘅服務，等大家可以輕輕鬆鬆遊東京喔。
今次就等小編試搭疫情期間2021年4月新開嘅路線——人氣觀光地區「新宿及澀谷」嘅路線，同大家介紹「SKY HOP BUS」嘅魅力所在啦！
SKY HOP BUS是什麼？
SKY HOP BUS係喺東京市區內圍繞人氣觀光景點行駛嘅雙層開篷觀光巴士，主要有3條路線：綠色路線（新宿、澀谷）、紅色路線（淺草、東京Sky Tree）、藍色路線（東京鐵塔、東京電訊站、築地、銀座）。只要購買車票，喺「丸之內三菱大廈」轉車嘅話，就可以搭哂3種唔同路線嘅觀光巴士，按車票指定時間內自由上落、無限任搭㗎！
以下落嚟同大家介紹可以點利用SKY HOP BUS玩盡東京啦！
以廣闊視野眺望壯觀的東京都市景色
SKY HOP BUS嘅巴士上層無頂蓋，一邊坐車一邊欣賞風景就最適合不過。另外仲有半開逢車種（一半部份有蓋）同雨天時派發免費簡易雨衣畀乘容使用，落雨都無問題呀。
巴士最前嘅座位前面為近乎落地嘅玻璃窗，可以好舒服咁睇到視野廣闊嘅景色。特別係穿梭澀谷著名嘅十字路口時，喺紅燈時絕對企唔到嘅中央位置放眼望開去，臨場感十足，簡直有大地在我腳下嘅感覺呀！
另一方面，正正因為無頂嘅開篷巴士，喺合適季節時坐開篷座位感受迎面吹來微風都好舒服！而且頭上無天花板阻隔，景觀開揚、視野廣闊，從下而上眺望建築物例如東京鐵塔、新宿高樓大廈等，景色更是非常壯觀！
而且以較高角度影相就唔使怕背景被其他人遮住，可以影出與別不同嘅靚相。甚至係春、秋等季節時，當巴士途經公園、庭園等賞花景點，可能可以俯瞰一片櫻花或紅葉景色，別有一番風味。
一票在手，自由上落！想去邊玩可以隨時落車！
車票唔同一般以區間計算價錢，而係以一日票（當日）同兩日票，等使用期間期限嚟區分。只要喺選定嘅期間內（一日或連續兩日），一票在手，覆蓋東京區內18個車站嘅3條路線，喺邊度上車、落車都任你話事，即係可以坐到邊玩到邊！你當悠閒遊車河睇風景又得，當交通工具喺市區移動都得，非常抵玩。
電子地圖功能新登場！巴士站位置一目瞭然
SKY HOP BUS最近導入咗電子地圖功能，只要掃瞄QR CODE（二維碼），就自動開啟專用嘅網頁版地圖，唔需要特地下載應用程式，好易就用得到。網頁版電子地圖上會顯示以顏色區分嘅3條路線以及運行中嘅巴士即時所在位置，亦有標示自己喺邊個位置，非常準確喎！
而且電子地圖仲會提供巴士站附近嘅旅遊資訊，例如景點、體驗活動、美食資訊等等。等大家落車之後都可以輕鬆地搵到旅遊目的地，唔使左搵右搵慌慌張張。
善用觀光巴士從新宿一直玩到澀谷
由於東京鐵道路線繁多，車站都好大、出入口又複雜難搵，話唔定大家旅行時都試過喺車站迷路呢！不過，如果係搭SKY HOP BUS，落車觀光後可以使用電子地圖帶你尋找巴士站嘅功能，就可以好易搵返上車嘅巴士站啦！又可以即時查到巴士行到去邊，輕易掌握到巴士幾時到站添，非常方便好用！既然係咁，鍾意喺東京購物嘅大家，去完新宿買完一輪，仲可以坐巴士輕鬆去埋澀谷繼續血拚！
透過聲音導覽服務 了解更多日本文化及歷史
除咗上述電子地圖會顯示旅遊資訊，車內仲有提供聲音導覽服務。有7國語言可選，包括中文、英文、日文、韓文等等※。上車時每個遊客會獲發一個自用耳機，只要接駁車上每個座位前嘅裝置，就可以聽到巴士行駛所到之處嘅資訊。有聲音導覽服務就可以更深入了解東京嘅歷史文化，甚至可以聽到日本嘅傳統文化、食文化等解說添。
※根據路線所提供對應語言有異，詳情請向SKY HOP BUS查詢。
SKY HOP BUS使用資訊
- 購票方式：官網購票、售票處、巴士內直接購票
- 運行時間：首班車09:10從丸之內三菱大廈開出（紅色路線）、最後服務時間為19:21回到丸之內三菱大廈終站（藍色路線）
※詳情請參閱巴士行駛時間表（根據季節而可能會作出變更） - 車票種類及價錢：
- 當日票：大人3800日圓、小童1900日圓（2023年3月更新至此價錢）
- 2日票：大人5500日圓、小童2750日圓（2023年3月更新至此價錢）
- 售票處地址：東京都千代田區丸之內2-5-2 二菱大廈1樓 SKY HOP BUS售票處
- 交通方式：東京站丸之內南口徒步3分鐘
- 營業時間：09:00-18:00
- 官方網頁：https://skyhopbus.com/
平時走在東京街上人頭湧湧、都未必能夠好好地慢慢欣賞到東京街景，咁不如試吓搭「SKY HOP BUS」，一邊聽聲音導覽，一邊喺較高位置用平時唔同嘅角度睇風景，去發掘東京嘅新一面啦！
Comments