鄰近大阪天王寺站嘅「阿倍野HARUKAS」係一座高300米、60層樓高、並結合百貨公司、觀景台等各種不同設施嘅複合型商業設施，今次FUN! JAPAN編輯部會為大家介紹如何悠閒體驗「阿倍野HARUKAS」各種樂趣嘅旅遊全攻略！
高300米超高層大廈「阿倍野HARUKAS」
高300米嘅「阿倍野HARUKAS」係日本最高嘅超高層建築（截至2023年1月為止），座落於大阪天王寺阿倍野地區，係由阿倍野HARUKAS近鐵本店、觀景台「HARUKAS 300」、阿倍野HARUKAS美術館、大阪萬豪都酒店以及辦公室樓層構成嘅大型綜合商業設施。
再者，與附近4條電車線嘅車站距離非常近，前往新世界通天閣、天王寺動物園等大阪具代表性嘅旅遊觀光景點都相當方便喔。
喺阿倍野HARUKAS享受購物樂趣♪
阿倍野HARUKAS近鐵本店由阿倍野HARUKAS嘅B2至14樓「Tower館」、以及B2至9樓嘅「Wing館」構成。雜貨、食品、時裝在內等各種商品應有盡有，無論係與朋友、情侶、或家庭同遊，都可以盡享購物嘅樂趣。
Tower館B1、B2：手信與熟食嘅天堂！
B1除咗有煎餅、赤福餅等日本具代表性嘅和菓子，亦有唔少西式甜品，而且包裝非常可愛，買嚟做手信就最適合不過啦。仲可以搵到喺開舖前就經已有當地人排隊等買嘅人氣商品喔！
B2嘅熟食賣場提供價格親民嘅熟食，可以買到以日本食材烹煮嘅菜式。例如海鮮丼飯、大阪名物魷魚燒等，不妨買返幾款做下酒菜，拎返酒店慢慢嘆啦！
Tower館2F至8F：去化妝品&時裝樓層感受日本時下流行！
2樓有日本國內外知名名牌化妝品專櫃，可以喺度一口氣買齊晒所有心儀嘅化妝品，非常方便。3樓至8樓有以大人到小朋友為對象嘅時裝專櫃，特別係4樓「Salon de GATE」，每個季節都會精選日本流行時尚商品，嚟到呢度，可以馬上掌握得到日本時下嘅流行趨勢！
Wing館8F：鐵道迷必訪嘅「Popondetta」
「Popondetta」提供鐵道相關嘅模型、玩具與書籍等。最大特徵在於店內嘅「出租軌道」，可以帶著自己嘅車輛模型，喺度玩樂一番喔。
Wing館3.5F：提供免稅服務嘅「國際貴賓沙龍」
「國際貴賓沙龍」座落於Wing館3樓與4樓之間嘅「3.5F」，係以訪日遊客為服務對象，提供免稅、寄放行李、行李寄送、旅遊資訊、ATM、外幣匯兌等服務。
從HARUKAS 300（觀景台） 眺望大阪景色♪
「HARUKAS 300」係位於阿倍野HARUKAS最高樓嘅觀景台，從58樓到60樓採完全玻璃帷幕設計。
空中走廊（60F）與直升機停機坪
60F係可以360度欣賞東西南北全方位景色嘅空中走廊，樓高設計令視野更遼闊，等你可以喺開揚嘅空間眺望大阪景色。如果天氣好嘅話，仲可以望到京都、神戶方向嘅景色，甚至連明石海峽大橋都可以望得到。
從高處俯瞰大阪嘅象徵性建築物、位於道頓堀嘅建築物、大阪城等等，就變得好似細細粒嘅迷你模型一樣，超級可愛！從玻璃地板往下望，更加係臨場感十足。
當日可以直接報名參加直升機停機坪特別行程，前往標高300米高嘅直升機停機坪，眺望無玻璃與牆壁遮隔嘅景色。
SKY GARDEN 300（58F）＆SHOP HARUKAS 300（59F）
58樓嘅「SKY GARDEN 300」戶外廣場有設立檯櫈等設備，更有附設餐點嘅暖桌被爐套餐。喺59樓仲可以買到HARUKAS 300限定商品等價格實惠嘅手信喔。
如果想一次過睇晒白天與黑夜嘅不同景色，推薦選擇全日可無限次入場嘅一日券。
置身於大阪萬豪都酒店餐廳「COOKA」享受奢華時間♪
「COOKA」位於阿倍野HARUKAS高層嘅大阪萬豪都酒店內，其名稱包含了日本大阪腔「來吃吧！」、以及英文「Cook a~」兩者嘅含義，廚房採用開放式設計，並有提供自助式午、晚餐。廚師會喺顧客面前調理新鮮食材，即場切肉類料理，令人大流口水！菜式種類豐富之餘，仲有多款甜品任君選擇，當中嘅意式雪糕極受歡迎。呢度嘅沙律用醬汁更吸納唔少粉絲，仲紅到有喺商店中發售添。有機會記得要試一試啦。另外，菜式主題每兩個月會換一次，就算去多幾次都唔會厭。
另外，可以從離地100米高嘅地方眺望大阪美景，熣燦奪目嘅夜景瀰漫著一股浪漫氣氛，係與重要嘅人一齊渡過奢華時光嘅最佳選擇！
設施名稱
- 名稱：阿倍野HARUKAS
- 地址：大阪府大阪市阿倍野區阿倍野筋1-1-43
- 交通方式：
- 近鐵南大阪線「大阪阿部野橋」站直通
- 從大阪地下鐵「天王寺」站、JR「天王寺」站、阪堺電軌上町線「天王寺站前」站徒步2分鐘
Comments