歡迎嚟到「飲食與祭典之殿堂」！
東京淺草呢個地方，吸引唔少嚟自世界各地嘅遊客。除咗淺草寺、雷門、東京晴空塔之外，2022年7月有個名為「淺草橫町」嘅新旅遊景點喺淺草誕生！唔單止可以喺度嘆盡美食，仲可以感受得到日本傳統文化，同埋多個精彩打卡位。今次就等FUN! JAPAN編輯部團隊，去呢個人氣熱話嘅淺草新名勝一探究竟，為大家作全方位式報導！
※本報導內容為2022年12月採訪時嘅資訊。内容可能會出現有所變動嘅情況，請於各店舖確認相關詳情。
可以邊食日本料理邊參加祭典嘅「淺草橫町」係？
從淺草寺淺草仲見世商店街徒步約2分鐘，即可抵達於2022年7月新開幕，位於複合商業設施「東京樂天地淺草大廈」4樓嘅「淺草橫町」（可以認住於1、2樓開設咗「UNIQLO 淺草店」作為指標！）。「淺草橫町」係向世界傳播日本全國飲食與祭典文化為目的所開設嘅設施，有7間飲食店、1間出租和服店，可以喺度以和服嘅姿態，品嚐壽司、日式烤雞串、居酒屋等美食。
喺「淺草橫町」內，無論係霓虹燈、招牌、抑或係各處嘅燈籠裝飾等，都盡顯日本特色。與充滿日本下町氛圍嘅淺草成對比，呢度洋溢著一股令和氣息與懷舊風情所交織嘅獨特風格。
淺草全日之旅先從和服出租開始！
去到「淺草橫町」，首先要做咩至好？從出發前就决定——「想以最大限度地盡享吸睛位多多嘅淺草橫丁嘅話，又點可以缺少和服呢樣關鍵性嘅存在呢？」——因此，淺草全日之旅先從和服出租開始吧。
首先出發去「和服出租wargo東京淺草店」，呢間店最大嘅特徵，係可以兩手空空前往體驗穿著和服喔。「觀光和服租借方案」中，除咗包含和服、襪、草鞋等服飾之外，仲包埋由專業和服穿著師為你進行穿著和服嘅服務。無諗過價格昂貴嘅專業和服穿著體驗……竟然只需3,300日元起（標準方案），價位相當親民。除咗有盡顯高貴優雅嘅和服、古韻味十足嘅正絹和服之外、仲有充滿大正浪漫風格嘅和服等，多款和服種類任君選擇。
店內充滿著一排又一排嘅和服、浴衣、振袖、袴。不妨喺數量超過1,500件嘅款式中，尋找心儀嘅組合，自由搭配一番。
除咗有圖案（櫻花、玫瑰、山茶花等）款式、亦有條紋、蕾絲等極受女士歡迎嘅圖案之外，亦有唔少男士和服款式喔。如果利用情侶方案（5,500日圓）嘅話，就更加抵玩！
店員亦有提到，人氣嘅顏色與圖案款式會喺一開舖就被不斷租走，所以喺上午時段前往就最理想。
煩惱緊「究竟要揀咩色好呢…♪」嘅時候，最終决定揀咗呢套極為吸睛嘅紅色款式。另外，仲有提供使用髮簪，打造簡單嘅髮型設計服務喔。
完成穿著和服後，就可以去位於「淺草橫町」一角，掛滿風鈴嘅打卡位，大影特影啦！
以東京晴空塔與無數風鈴為背景，享受化身成和服女子（OR男子），感受充滿日式風情嘅氛圍吧♪
淺草必食！ 「淺草橫町」兩大名物料理
盡情大影特影打卡相之後，係時候為身體補充一下能量啦！既然嚟到充滿濃厚日式氛圍嘅「淺草橫町」，就梗係要嘆返幾款日式料理先夠盡興啦。今次，小編從多款名物料理中，嚴選出2款極具話題性嘅美食。請大家拎定張紙巾，為免睇睇吓會不由自主地流口水喔！
一個人根本就無可能食得晒！？總重量約1.2kg嘅丼飯
「聳立鰻魚玉子丼飯」（そびえる鰻玉丼）/ 2,508日圓
第一款要介紹嘅美食係放上巨型嘅蒲燒鰻魚、加入由5個雞蛋製作而成嘅玉子燒、750g嘅米飯，總重量約1.2kg嘅「聳立嘅鰻魚玉子丼飯」（そびえる鰻玉丼）。存在感十足嘅蒲燒鰻魚與玉子燒重疊於米飯上，呢個畫面極具強烈嘅視覺衝擊力！呢碗鰻魚玉子丼飯嘅高度，如果用iPhone去做比較嘅話，竟然係同約16cm高嘅13Pro Max差唔多高。相信大家如果親眼望著呢碗鰻魚玉子丼飯上檯嘅瞬間，都會被其巨大到令人難以置信嘅驚人份量嚇一嚇吧。
經過小編實測，3位極度肚餓嘅一般成人，亦食唔晒呢碗巨型鰻魚玉子丼飯。當其時，小編真係好想請大胃王嚟幫手食喔。
玉子燒嘅份量太巨大，用筷子根本就挾唔起！
實在真係食唔晒嘅話，可以請店員幫手，將剩低嘅丼飯捏成飯糰畀大家打包拎走喔。
必影拍片位！自製玉子燒體驗~
「自製日式高湯玉子燒」（セルフ出汁巻け卵）/329日圓
繼可以稱得上係「令和之邪惡美食」嘅「聳立鰻魚玉子丼飯」之後登場嘅係，大眾居酒屋「Rocky Kanai」（ロッキーカナイ）提供嘅「自製日式高湯玉子燒」（セルフ出汁巻け卵），亦係拍片收藏嘅心水美食之一！
就咁望，可能你會覺得只不過係一款普通嘅玉子燒，但實際上呢款玉子燒係客人落完單之後，以自助形式提供畀大家去落手親手整喔。一邊將蛋液倒入平底鍋一邊攪拌，製作方法非常簡單，所以亦推薦與朋友互相比拼，睇吓邊個份玉子燒煎得最靚仔。
店員將蛋液、爐具、平底鍋送上檯之後，烹飪時間就正式開始！先落油，加熱煎蛋，再捲呀捲，然後又再落油，呢個步驟重複4次，玉子燒就大功告成。
用筷子將玉子燒切開嘅瞬間，以昆布製作嘅高湯汁一下子就流晒出嚟！就咁直接放入口就經已相當好味道喔。
如果你個胃仲有位嘅話，可以去埋壽司居酒屋「淺草壽司」（浅草すし）、日式烤雞串店「Yurayura」（ユラユラ）等大食特食，店員會精神奕奕咁迎接你嘅到來喔。
每間飲食店內附上嘅筷子套，其實係一張又一張嘅籤文，相當有趣。記得要去試試自己嘅運氣，話唔定會抽中大吉喔！
喺東京淺草可以欣賞得到日本全國嘅祭典！
正如設施名稱「飲食與祭典之殿堂」（食と祭りの殿堂），「淺草橫町」唔單止可以品嚐美食，享受祭典亦係其樂趣之一。以週末為主，全國各地團體會喺室外、店內跳夜來舞、阿波舞、盂蘭盆舞等，全日本祭典氣圍會隨舞而起。當舞蹈開始嘅時候，整個樓層𣊬間洋溢著一股祭典氛圍！當然，模仿出演者舞蹈嚟齊齊共舞亦無問題喔。喺室內可以欣賞到日本全國嘅舞蹈，真係一個好新鮮嘅體驗！
每週演出內容會有所不同，所以出發可以先喺官方Instagram上確認各祭典嘅舉辦時間表喔。
淺草橫町
- 地址：東京都台東區淺草2丁目6-7 東京樂天地淺草大廈4F
- 營業時間：
【和服出租Wargo】10:00～19:00（最終交還時間18:30）
【飲食店】12:00～23:00 - 交通：從東京Metro或都營地下鐵「淺草站」徒步8分鐘
- 官方網站：https://asakusayokocho.com/
- Instagram：https://www.instagram.com/asakusa_yokocho/
協助拍攝單位
東京力車 大利彌里
- Instagram：https://www.instagram.com/6micha14/
Comments