位於東京上野御徒町嘅綜合折扣店鋪「多慶屋」商品琳琅滿目，多到你行足1日都睇唔晒！呢度唔單止深受當地居民喜愛，仲吸引唔少嚟自世界各地嘅遊客蜂擁而至。
今次就等非常鍾意購物嘅小編混入「多慶屋」，一邊感受當地日本人生活，一邊為大家報導店內情况～
※本報導內容為2022年12月採訪當時資訊。商品價格、庫存、入貨狀況可能會出現變更。 商品均為含稅價格。
位於東京上野御徒町嘅商業設施「多慶屋」係？
1947年創業嘅多慶屋，除咗受遊客歡迎之外，亦係當地人經常前往嘅地標性老店。御徒町總店由「TAKEYA1」、「TAKEYA3」、「TAKEYA4」3棟新館所構成（*1），外牆壁全部統一為紫色，亦因此成為被眾人喜愛嘅「紫色大樓」。無論係食品、日用雜貨、化妝品、電器、酒、醫藥品、名牌袋等商品應有盡有，滿足廣泛顧客嘅需求。
*1：本館A棟及本館B棟從2023年1中旬起，為重建而關閉所有樓層。「TAKEYA1」、「TAKEYA3」、「TAKEYA4」則照常營業
從上野阿美橫丁徒步8分鐘即可抵達，最近嘅車站有JR御徒町站、東京Metro上野廣小路站、仲御徒町站、都營地下鐵上野御徒町站或新御徒町站，交通非常方便。因為搭電車來往成田國際機場以及羽田機場車程都係只需約1小時。喺抵達日本以及返香港當日，去上野周邊爆買就最適合不過啦。
另外，多慶屋亦有可以對應中文、英文等嘅工作人員常駐於店內，提供多種語言服務，等遊客喺度可以買得安心又放心。
「TAKEYA1」嘅目標商品係食品&化妝品！
以下落嚟嘅時間，就係與小編齊齊去發掘，每棟大樓嘅精彩位與重點商品！首先介紹嘅係2022年11月16日盛大開幕嘅新館「TAKEYA1」。當小編一踏入店舖，即刻有一股絕對會爆買嘅預感...！？
【TAKEYA1 - 1F】食品
「TAKEYA1」1F聚集多款經典零食點心、日本茶、咖啡、飲品等食品。
編輯部員工M小姐笑容滿面地拎起一款「濃厚牛奶饅頭（濃厚乳ミルクまんじゅう）」（198日圓）話：「聽講係用北海道濃縮牛奶製作，買呢款食品做手信嘅話，收到嘅人一定會好開心！」。
岩手縣名產「厚烤花生煎餅」（厚焼きピーナッツ煎餅）（4片裝/117日圓）、使用宇治抹茶製作嘅「宇治抹茶蛋糕」（宇治抹茶ケーキ）（5個裝/324日圓）、使用鳴門金時番薯製作嘅「Sweet Potato Cake」（スイートポテトケーキ）（5個裝/324日圓）等，不斷挖掘出適合送畀職場同事、親朋好友嘅日本特產。
使用100%兵庫縣產紅楚蟹所製作嘅「紅楚蟹味噌」（紅ずわいかにみそ）（603日圓）與「蟹肉味噌醬」（かにの身入りかにみそ）（646日圓）。據聞用呢2款香濃蟹味嘅味噌送飯食，除咗會令人食上癮之外，仲會好味到停唔到口，一碗白飯瞬間就會被秒速解決喔。
多慶屋獨家販售嘅「多慶屋原創咖啡」系列，共有24種。而且，呢款人氣商品嘅累計銷售量，經已超過66萬！
「多慶屋嚴選講究嘅綠茶茶包」（多慶屋厳選こだわりの緑茶ティーバッグ）（20個裝/430日圓）。使用日本數一數二嘅茶葉產地——靜岡縣所生產嘅茶葉製作而成，令大家安坐家中，都可以輕輕鬆鬆享受正宗綠茶。
講到上野就一定會諗起上野動物園嘅大熊貓。呢款「栗子巨型銅鑼燒」（栗入りジャンボどら焼き）（86日圓）印有以熊貓為設計概念嘅多慶屋原創吉祥物「Take Pan（たけぱん）」，非常可愛！
記得要去睇埋相當受歡迎嘅拉麵與橡皮糖等等食品喔！
【TAKEYA1 - 2F】日用雜貨、護理用品、男性化妝品、寵物用品、文具、紳士內衣
喺購物籃裝到滿一滿嘅同時，小編決定要出發去2樓。呢度有浴室用品、洗衣用品、身體及手部護理用品、家庭用品等商品，排列著超級多款活躍於日常生活中嘅日用雜貨喔。
近年，鋒利與耐用嘅「Made in Japan」（日本製）刀具，於海外備受矚目。據聞，綜合刀具製造廠「貝印」嘅「關孫六」相當受歡迎。
超級好用嘅日本文具喺日本國外亦極具人氣。原子筆等文具可以試寫，記得要趁機喺店內試用寫吓啦。
【TAKEYA 1 - 3F】化妝品、廚房用品
3樓發現唔少喺亞洲遊客中大受歡迎嘅化妝品品牌。毫無疑問，呢個樓層對於女性們嚟講，絕對係天堂級嘅存在！排列著多款日本化妝品製造廠嘅商品，多到都唔知點揀至好…。
除咗化妝品之外，不銹鋼真空碳酸保冷杯（6,028日圓）亦係引人注目嘅商品之一。保冷性極佳，就算身處氣溫較高嘅地區，都可以隨身攜帶冰涼透心嘅碳酸飲品，特別推薦畀住喺亞洲嘅讀者們。
喺廚房用品嘅陳列架上，發現擁有400多年歷史、佐賀縣產嘅瓷器「有田燒」。如果想將自己屋企嘅餐檯打造成日式風格嘅話，記得唔好錯過呢款商品啦。
「TAKEYA 3」&「TAKEYA 4」嘅目標係醫藥品與名牌商品！
爆買之旅仍然繼續進行中，其實淨係行「TAKEYA 1」都可以行勁耐，但為咗要去埋隔離嘅「TAKEYA 3」&「TAKEYA 4」，小編唯有依依不捨地向「TAKEYA 1」Say Goodbye（拜拜），向著充滿遊客心儀嘅健康食品、醫藥品，酒、品牌袋、高級手錶等商品嘅「TAKEYA 3」&「TAKEYA 4」出發，為大家介紹各棟嘅精選商品。
【TAKEYA 3 - 地下1F】健康食品
陳列架上排成一排又一排，支撐著現代人忙碌生活嘅基礎營養補充劑。淨係青汁呢款商品，數量就已經多到填滿成面牆，種類相當豐富！
【TAKEYA 3 - 1F】醫藥品、衛生用品
可以喺度搵到基乎人人都聽過嘅醫藥品，如果有朋友托大家買嘢嘅話，相信喺度行個圈就可以入手得到朋友們想要嘅商品喔。
【TAKEYA 4 - 1F】酒精類飲品
日本酒、燒酒、泡盛、葡萄酒、威士忌、啤酒…嚟到呢個樓層，相信大家都可以尋覓得到心儀嘅酒精類飲品。另外，仲會有葡萄酒顧問、持有品酒師資格嘅工作人員在場，為大家提供有關配搭合適下酒菜嘅建議等服務。
加上免稅購物待遇，盡享雙重優惠！
上述介紹嘅只係多慶屋一小部分嘅商品。由於多慶屋內寶物甚多，編輯部員工M小姐亦不知不覺地將商品放滿晒成個購物籃♪
小編提提大家，記得要用埋免稅10%（部分商品為8%）優惠，做個精明消費者！下次東京之旅，記得要去上野御徒町「多慶屋」行個圈啦！
多慶屋 御徒町本店
- 地址：東京都台東區台東4-33-2
- 營業時間：
【TAKEYA 1】 09:00 - 21:00
※B1F及B2F Summit超市樓層為09:00 - 25:00
【TAKEYA 3、TAKEYA 4】 10:00 - 21:00
※2F以上樓層為10:00 - 19:00 - 定休日： 1月1日
- 官網：https://takeya.co.jp/chinese
Comments