今次嘅重現日本鄉土料理系列要介紹嘅係栃木縣嘅鄉土料理「水團」（すいとん）。係一款將糰子放入湯中嘅料理，就咁聽落好似同香港某種料理相似，但呢款鄉土料理「水團」嘅特徵係使用日本嘅調味料味噌&日式高湯製作而成。小編除咗會分享有關「水團」嘅歷史，仲會分享相關食譜與製作影片畀大家參考。不妨跟著以下食譜，挑戰一下自家製呢款將糰子放入湯中，擁有悠久歷史嘅日本家庭料理啦！
日本鄉土料理即係？
鄉土料理係指活用各地區嘅當地特產，結合當地風土民情所烹煮出，長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。
「水團」（すいとん）嘅起源
「水團」（すいとん）呢個名係源自於中文字「飩」、「團」中嘅日文發音「トン/ Ton」。據聞原本叫饂飩（うんとん/ Un ton），是將餡料加入小麥粉裡，再油炸而成嘅食品，繼而演變成將小麥粉攪拌捏製而成嘅食品。自室町時代，就經已存在將搓揉好嘅麵粉搓成長條狀嘅饂飩（即烏冬）享用嘅麵食。將麵糰摵開細細塊，再放入湯裡面享用嘅習慣，則可追溯至鐮倉時代。因為係放入湯（水）裡面嘅糰（團），所以被稱為「水團」。
昔日，「水團」係於稻田稀少嘅地區，作為彌補大米不足嘅食物，亦係餐檯上經常出現嘅日常家常菜，全國各地都有當地特有嘅「水團」，亦有各種唔同嘅稱呼喔。
栃木縣內那須鹽原市嘅舊西那須野地區叫做「Battō-jiru」（ばっとう汁），那珂川町舊馬頭地區叫「Hattō-jiru」（はっとう汁），據聞係取自「法度汁」嘅發音。宇都宮市舊上河內地區、日光市舊栗山地區、那須鹽原市舊西那須野地區等地，被稱為「Dango-jiru」（だんご汁）。佐野市葛生地區，因為糰子係用手捏兼摵甩而成，所以被稱為「Totcha nagi」（とっちゃなぎ）。
因為用料非常多，所以無需另外準備其他菜式，因此以前多數喺忙碌、大米不足時期烹煮，現時則作為家庭味被眾人喜愛。尤其喺冬天時特別多機會烹煮，皆因喺寒冷嘅冬季享用，可以為身體增添幾分暖意。另外，根據唔同季節，除咗小麥粉之外，亦會使用米粉製作，蔬菜配料亦可根據季節而作調整喔。
「水團」嘅材料（2人份）
- 薯仔（切成塊狀） 120g
- 紅蘿蔔（切成銀杏片狀） 70g
- 洋葱（縱向切成薄片狀） 100g（約1個）
- 牛蒡（用刀尖位，好似批鉛筆咁批出牛蒡絲，再放入水浸泡去除澀味） 50g
- 冬菇（去蒂切成薄片狀） 2~3個
- 葱（斜切） 50g
- 味噌 50g
- 油炸豆皮 1包
- 日式高湯 6~7杯
「水團」用麵糰嘅製作材料
- 小麥粉 200g
- 雞蛋 1個
- 水 150ml
- 鹽 1/2茶匙
＊可以根據個人喜好加入五花肉（切成薄片）、雞肉等。
「水團」嘅製作方法
- 將日式高湯倒入大鍋中。煮滾後，加入葱以外嘅蔬菜，烹煮8分鐘左右。
- 製作糰子。於容器裡打入雞蛋，加入水、鹽後攪拌至成蛋液狀。將麵粉過篩至另一容器裡，然後一邊加入蛋液一邊用刮刀攪拌至柔軟嘅糰子用麵糰。
- 於①嘅鍋裡加入味噌，保持加熱嘅狀態下，用匙羮挖麵糰，挖成一口大小嘅糰子，放入湯裡。當糰子浮起後，加入葱，倒入碗中即大功告成。
Comments