日本因為氣候宜人雨量較少，景點與景點之間嘅移動距離唔會太遠，因此衍伸出多個相當適合踩著單車遊走嘅區域路線，當中嘅瀨戶內海就係向來深受國際車友喜愛嘅路線。
兩年一度嘅「瀨戶內島波海道國際單車大會」，對於世界車友們嚟講簡直係夢幻路線，更加係一生中絕對要參加一次嘅盛會。今次小編亦親自參加咗呢個「2022年瀨戶內島波海道國際單車大會」，帶大家去感受島波海道嘅魅力！
國際單車族熱愛嘅「島波海道」（しまなみ海道）究竟係邊度？
「島波海道」指嘅係橫跨日本本州廣島尾道市至四國愛媛今治市，串連日本瀨戶內海上嘅向島、因島、生口島、大三島、伯方島、大島等六座島嶼嘅七座跨海大橋，全長約70公里嘅路線。
島波海道係日本唯一一條將汽車道路、單車道與行人道並設嘅高速公路，單車相關設施設置完善，除咗可以一邊踩著單車一邊欣賞風光明媚嘅瀨戶內風景，沿途仲有旅遊景點、滿載當地特產美食嘅休息站，令島波海道唔單止喺車友之間獲得高評價，喺一般遊客嘅知名度亦不斷上升。
國際盛事「瀨戶內島波海道國際單車大會」
「瀨戶內島波海道」於2019年11月被日本政府定為「國家單車道」，成為全球知名嘅單車聖地，喺度舉辦嘅「瀨戶內島波海道國際單車大會」吸引來自世界各地嘅車手們共襄盛舉。大會期間，呢條汽車道路、單車道與行人道並設嘅高速公路僅提供單車使用，令車友們可以盡情享受開闊感十足嘅踩單車樂趣。
呢項單車大會並非只係以秒數拼輸贏嘅比賽，亦係一個可以讓大家盡情享受單車樂趣嘅活動。因此唔使擔心自己踩得慢，或者係單車新手而無法參加。大會準備咗8條唔同嘅路線，最短長度約30公里，最長約140公里，可自由選擇適合自己嘅路線，無論大人定係小朋友（小學4年級以上）都可以報名參加。
「2022年瀨戶內島波海道國際單車大賽」實際參與體驗分享
參賽事前準備
大賽開始嘅前一星期會收到選手號碼牌以及誓約書。號碼牌有3張，分別貼喺安全帽、衣服（或背囊）與單車上。誓約書要填寫並簽名，於活動當日報到時交畀工作人員。
考量到安全、氣候因素以及裝備嘅輕便性，建議攜帶裝備如下：踩單車用手套、安全帽、太陽眼鏡、輕便防水背囊、防風防水外套、單車褲等基本運動服裝與保暖衣物。零食、水等食品帶少量即可，因為沿途都會有補給休息站，完全唔使擔心！
當日注意事項
今次為咗參加大會，小編特別跟當地團參加。當日朝早4點從福山酒店出發，抵達集合場所向島運動公園，領取單車，無論係自行攜帶抑或係租借單車，全部統一領取並組裝設定。準備完畢後就可以向出發起點前進。
小編溫馨小提示，因為從起點一直到第一個補給休息站之前幾乎係不設洗手間，出發前記得先去廁所！
因為參加人數非常多，會分組從不同起點出發，所以一定要留意自己嘅選手號碼，喺出發前尋找自己嘅組別，千祈唔好跟錯其他組別排隊喔！
進入秋季，瀨戶內海嘅早晚溫差非常大，加上單車道穿梭於海島之間，海風強烈，非常之凍，所以一定要做好保暖措施！
正式出發！GO！
正式踩上島波海道，沿路係綿延不斷嘅瀨戶內海島嶼景色與雄偉橋樑，路邊會有工作人員指引路線並打招呼，唔使擔心會踩錯路線。
仲會見到當地嘅公公婆婆們搬定張凳坐喺自己屋企門口，手中揮舞著大會嘅充氣棒或自己嘅手巾仔幫你加油打氣，應該係旅程中最可愛嘅風景！
每條路線都會好幾個補給站，每個站所提供嘅食物都唔一樣，基本上會以當地特色小食為主。小編參加嘅A路線中途共有三個補給休息站，現場仲有太鼓表演、按摩等服務，令人感到非常放鬆。
抵達終點！
A路線嘅開始時間係朝早7點半左右，小編大約喺12:30通過終點線，比自己預期時間快咗2個小時（為咗趕上交還單車以及接駁車時間出盡全力衝刺）。抵達終點時，並無想像中有多人為你歡呼喝采，只有兩側默默指引嘅工作人員（笑）。
參加建議
參加「瀨戶內島波海道國際單車大會」，可以自行攜帶符合規定嘅單車參加，亦可以選擇於當地租借普通公路單車或電動變速單車「E Bike」。小編今次選擇嘅A路線全長約70公里，對於一日最長只係踩過35公里嘅小編嚟講，就好似跑半馬嘅人突然被拉去跑全馬一樣，加上對於路線、路況唔太熟悉，其實非常不安，再三猶豫之後，決定選擇租借有變速功能嘅「E-Bike」。
「E-Bike」配搭3段式調整，出發前工作人員有提及到，如果一直使用強度最高模式，電池續航力只可以支撐約40公里，最輕模式則可達到80公里。所以想要喺唔多用力嘅狀態下踩完70公里，就非常考驗切換「E-Bike」動能輔助與變速嘅協調性喔！
好在A路線只有上橋以及部份山路比較陡斜之外，其他路況大多平緩，加上小編因為擔心後面路況，前段幾乎完全無用到動能輔助，抵達終點時竟然仲有成63%嘅電力，覺得自己真係太厲害！如果你與小編有同樣擔憂嘅話，推薦租借「E-Bike」參加喔！
活動資訊
- 活動名稱：瀨戶內島波海道國際單車大會
- 舉辦時間：每年10月，兩年一次（下一次為2024年）
- 官網：https://cycling-shimanami.jp/zhtw/
Comments