【日本橫濱】遊橫濱必去！橫濱紅磚倉庫必食美食 & 必買手信精選推介

「橫濱紅磚倉庫」係神奈川縣橫濱嘅旅遊名勝之一，其紅磚外牆令人印象深刻，亦係大家多年來都非常熟悉嘅地標。呢座擁有紅磚外牆嘅建築「橫濱紅磚倉庫」先前進行改裝翻新，並於迎接開業20周年嘅2022年重新開幕。究竟改裝後嘅「橫濱紅磚倉庫」有咩新店舖？有咩新精彩位？FUN! JAPAN編輯部會為大家介紹必去店鋪、必嘆美食、必買手信等精選推介！

※本篇報導中登場嘅商品及其價格（含稅）皆為2022年12月採訪時資訊。相關內容或會出現有變更情况，詳情請於各店鋪官網確認。

「橫濱紅磚倉庫」於2022年12月翻新完畢並重新開幕！

如果想從東京都出發去一趟小旅行嘅話，從澀谷站乘搭電車約40分鐘，即可抵達嘅橫濱港未來區域可謂非常適合。相信唔少人講起該區嘅代表性旅遊景點，第一時間會諗起「橫濱紅磚倉庫」吧！創建於1910年代，從2002年開始作為文化、商業設施用途嘅「橫濱紅磚倉庫」於2022年迎接開業20周年，並實施開業以來首次嘅改裝翻新！

經過改裝升級後並重新開幕嘅「橫濱紅磚倉庫」，包括以前無嘅店鋪在內，共有60多幾間店鋪於1號館、2號館開業。當中更有全國首次開店嘅店鋪、當地橫濱企業嘅店鋪等等！以下落嚟，小編會將編輯部推薦嘅店舖，分成「美食」、「手信」兩大主題，去介紹享受「橫濱紅磚倉庫」之旅嘅最新方式。

【橫濱美食】橫濱紅磚倉庫推薦美食5選

「橫濱紅磚倉庫」重新開幕嘅最大魅力在於，人氣美食店舖通通齊聚一堂。去到「橫濱紅磚倉庫」，無論係代表著當地嘅橫濱老字號店舖，抑或係極受訪日遊客歡迎嘅連鎖店，都可以一口氣品嚐得到，一次過滿足你個胃好幾個願望。各位貪食嘅讀者們，記得到時要留定肚再出發啦！

崎陽軒（2號館1F）

「紅磚燒賣」（赤レンガシウマイ）（3個）/600日圓

1908年創業嘅「崎陽軒」燒賣，絕對係首樣必食美食！除咗有賣係日本人不嬲都知道嘅橫濱老字號店舖嘅經典款燒賣之外，仲有喺「橫濱紅磚倉庫」先至食得到嘅「紅磚燒賣」。「紅磚燒賣」正如其名，使用3種紅色（紅米、紅椒、螃蟹）食材製作，獨特嘅紅磚色外觀，相信好快會成為名物菜式喔！

另外，「燒賣便當」、「肉包」亦係該店嘅人氣商品。有唔少熟客會買嚟做手信，或外賣拎走食。

「橫濱Tachibana亭」（横濱たちばな亭）（2號館1F）

「洋食屋的蛋包飯」（洋食屋さんのオムレツライス）/1100日圓

與「崎陽軒」同樣喺2號館1F美食廣場開店嘅西式餐廳老字號店——「橫濱Tachibana亭」（横濱たちばな亭）經常於日本多個電視節目中出現，係廣為人知嘅名店喔。當中，「洋食屋的蛋包飯」係最推薦嘅必點美食！嫩滑鬆軟嘅雞蛋，再搭配上「Demi-glace Sauce」嘅組合，好味到令人感到停唔到口！

bills（2號館1F）

「Berry Berry Pancake」（ベリーベリーパンケーキ） / 1,900日圓

All Day Dining店舖「bills」嘅Pancake喺訪日遊客中擁有超高人氣，絕對係必食美食之一。橫濱紅磚倉庫限定菜單「Berry Berry Pancake」（ベリーベリーパンケーキ）係使用全麥麵粉製作，於綿密嘅Pancake再搭配上士多啤梨、莓牛油、福岡八女抹茶等組合，滋味無窮。如果係Pancake、甜品愛好者嘅話，就一定唔可以錯過！

MILK MARCHĒ（2號館1F）

Bottle Dessert（Seasonal Shortcake）/680日圓

全國第一間分店嘅甜品店舖。使用從日本屈指可數嘅生乳生產地提供嘅牛奶、奶製品，以及季節時令食材所製作嘅甜品非常受歡迎。除咗可以品嚐得到牛奶本來嘅美味，仲可以喺社交媒體上分享「Bottle Dessert」極吸睛嘅水果橫切面，與朋友們共旅遊嘅美好回憶。

UNI COFFEE ROASTERY（1號館1F）

「Strawberry Waffle」（ストロベリーワッフル）/ 1,300日圓

源自於橫濱嘅咖啡連鎖店「UNI COFFEE ROASTERY」，堅持使用於海拔1300至1800米緬甸高地所栽培嘅咖啡豆，可謂相當講究。另外，喺橫濱紅磚倉庫分店，可以品嚐到有別於其他店舖嘅三文治、窩夫等多款食品。不妨喺度一邊眺望橫濱港，一邊度過一個奢侈嘅咖啡時光。

【橫濱手信】橫濱紅磚倉庫嘅手信推介

既然去到橫濱首屈一指嘅旅遊景點，就一定要將極具橫濱特色嘅手信帶返香港。咁就要去可以講得上係手信選購天堂嘅1號館、2號館入手當地零食與雜貨啦。計劃緊去橫濱旅行嘅大家，準備好爆買嘅心情未吖？

「日本百貨店Akarenga」（日本百貨店あかれんが）（2號館1F）

（左）「Akarenga Beer」（あかれんがビール）（各種） / 770日圓
（右）「橫濱Craft Cola」（横浜クラフトコーラ）/ 2,904日圓

呢間係搜羅日本全國精選食品、雜貨嘅店舖。除咗有日本製嘅高質商品、原創「Akarenga Bee」，仲有多款喺神奈川縣橫濱、湘南、橫須賀製作嘅「Craft Cola」、日本酒、葡萄酒等特色產品，任君選擇。

近年喺日本掀起一股熱潮嘅「Craft Cola」之一嘅「橫濱Craft Cola」，更加係不可錯過嘅商品！除咗無使用任何添加物，最大特徵係帶有清凉感與甜味，兼散發著一股清爽香氣，非常易入口。

（左）「橫濱Akarenga Madeleine」（横浜あかれんがマドレーヌ）（５個裝）/ 1,850日圓
（右）「Akarenga Sakkuri糖果」（あかれんがさっくり飴）（各種） / 500日圓

包裝上繪畫上橫濱紅磚倉庫外觀嘅零食菓子類商品，亦要納入必買手信嘅候選名單喔。只可以喺紅磚倉庫先會遇上嘅限定商品實在多不勝數，令人選擇困難症發作！

Huffnagel（2號館1F）

（左）Gift Set（紅磚限定版等）
（右）Butter Sand（各種） / 430日圓

「Huffnagel」係由1949年創業嘅洋菓子製造商「Kawori」（かをり）於2021年春天所誕生嘅法式糕點品牌。除咗有原創、紅豆牛油、芝士、焙茶等經典味道之外，仲追加發售橫濱紅磚倉庫店限定嘅「Gianduja」朱古力、3款新作「Butter Sand」。唔單止可以單件買，亦可以揀「Customize Gift Set」，自選鍾意嘅口味變成套裝喔。加上外觀非常可愛，對方收到呢款手信一定會好開心。

Chocola Meets（2號館1F）

（左）「Akarenga Package Chocolate」（赤レンガパッケージチョコレート） / 800日圓（各種）
（右）「Akarenga Package Chocolate」（赤レンガパッケージチョコレート）/ 1,800日圓（２個裝）、3,400日圓（４個裝）

2021年3月誕生，源自於橫濱嘅「Craft Chocolate」品牌。所有工序都講究手工製作，店內排列著以Bean to Bar（*1）方法製作嘅「Craft Chocolate」。除咗以紅磚倉庫、橫濱為主題嘅店鋪限定包裝之外，由日本藝術家所繪畫嘅包裝亦為商品增添不少色彩。

*1：從可可豆製作成朱古力都一條龍貫徹進行所有製造過程嘅製作風格。

「Monoto Art」（ものとアート）（2號館1F）

（左）橫濱紅磚倉庫店限定嘅雜貨商品，最啱買嚟送畀朋友。
（右）手寫製作，世上獨一無二嘅留言卡片。

以「能夠使用嘅藝術雜貨」為理念，非常適合在此尋找世上獨一無二嘅藝術雜貨與飾品。手繪雜貨、文具、手工製作玻璃、陶器等，店內所有商品都係僅此一件。由年輕藝術家親手製作嘅「紅磚限定商品」超級可愛，令人想通通都帶返香港！

Bayu Factory YOKOHAMA（2號館2F）

（左）「生馬油Gold」（生馬油ゴールド）（50g） / 3,300日圓
（右）「馬油Shampoo」（馬油シャンプー）（200mL） / 2,200日圓

源自橫濱嘅馬油原創品牌「橫濱馬油商店」係一間販售多款無添加、對肌膚溫和嘅護膚產品專門店。日本製並使用100%馬鬃油所製作嘅「生馬油Gold」，除咗可以作為保濕乳液、護髮、仲係多方面都可以使用嘅萬能油。另外，更加係獲得橫濱市長獎嘅實力派產品。

仲有其他多款橫濱特有手信！

除咗上文所介紹嘅5間店鋪嘅商品之外，仲有多款充滿橫濱特色嘅手信！無論係1號館定2號館，都有多款令人心動嘅商品，絕對可以喺度大買特買當地手信。當你行勻晒成個橫濱紅磚倉庫後，仲可以順便去埋步行即可抵達嘅「橫濱太空世界」同「杯麵博物館橫濱」，一邊喺海灣區沿著海邊散步，一邊享受港口城市嘅魅力啦～

「橫濱紅磚倉庫」（横浜赤レンガ倉庫）

地址：神奈川縣橫濱市中區新港一丁目1
交通方式：從港未來線「馬車道站」或「日本大通站」徒步約6分鐘
營業時間：
【1號館】一般營業時間 10:00～19:00
【2號館】一般營業時間 11:00～20:00
※各店鋪營業時間請從官方網站確認。
官方網站：https://www.yokohama-akarenga.jp/

橫濱紅磚倉庫周邊景點：

【日本橫濱】遊橫濱必去！橫濱紅磚倉庫必食美食 & 必買手信精選推介

「橫濱紅磚倉庫」於2022年12月翻新完畢並重新開幕！