相信唔少人一講到靜岡縣，腦海中不其然就會浮現富士山與茶田嘅畫面，除咗山與茶之外，其實靜岡縣仲有唔少著名美食喔！當中，靜岡縣漁獲豐富，有多款美食都離唔開新鮮海產呢！當然，亦有海鮮以外嘅B級美食，今次我哋會為大家介紹並非使用海鮮為食材嘅當地美食啦！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
靜岡美味優勢
靜岡縣可以話係深受「水」眷顧嘅地方。除咗受惠於富士山所帶嚟嘅純淨水源與地下水，亦為農業帶嚟優質灌溉水，得以栽培對水質等周邊環境極為敏感嘅「靜岡水山葵」（静岡水わさび），令靜岡成為日本水秋葵產量第一大嘅都道府縣；另一方面，靜岡縣海岸線相當多樣化，擁有深達2,500米嘅深海港灣「駿河灣」、海岸長達115公里嘅「遠州灘」，與海水淡水交接嘅「濱名湖」，加上黑潮洋流嘅影響，令靜岡縣漁獲既豐富又多元，包括金目鯛、伊勢龍蝦、櫻花蝦等，濱名湖嘅鰻魚養殖亦遠近馳名。
靜岡B級美食
睇完上述所提及嘅美味優勢，可能會令人覺得靜岡縣嘅經典美食多數都係「海鮮」，但其實靜岡亦有唔少與海鮮無關嘅B級美食，今次小編就要為你介紹海鮮以外嘅當地美食。
濱松餃子
日本三大餃子之一，濱松餃子原先係指以豬肉、洋蔥與椰菜製作內餡，並於靜岡縣濱松市所製作嘅餃子，但現時嘅濱松餃子定義更為嚴格，製作者必須要喺濱松市居住三年以上先算數喔。
椰菜與洋蔥嘅甜味，搭配上豬肉嘅鮮味，成為絕妙嘅組合。另外，濱松餃子圍成一圈嘅擺盤方式亦相當獨特，亦係其特徵之一。
靜岡關東煮
靜岡關東煮嘅湯頭有別與一般常見嘅金黃色湯頭，靜岡關東煮嘅湯頭係「黑色」㗎。以醬油調味嘅湯頭，反覆熬煮牛筋、內臟等食材，湯頭變得越嚟越醇厚，加上深色嘅「半片」等魚板食材，令一整鍋關東煮嘅視覺更加「黑」。食嘅時候會撒上柴魚片、青海苔粉等一齊享用。
靜岡關東煮仲有另一個特色，就係會以竹籤將食材串好，喺當地零食店亦會以一串為單位發售，係靜岡人由細細個就已經開始接觸嘅零食之一。
富士宮炒麵
要講到富士宮炒麵嘅特色，就不得不提其口感獨特，極具彈性嘅特製麵條。一般麵條嘅製作步驟係先蒸後煮，而富士宮炒麵嘅麵條係蒸完之後直接冷卻。由於麵條中嘅水分含量少，因而造就爽口彈牙嘅口感。根據富士宮炒麵學會資料顯示，富士宮炒麵需具備12種特徵，先至稱得上真正嘅富士宮炒麵。另外，除咗麵條之外，使用油炸過後嘅豬背脂（豬背脂係使用豬背部位嘅脂肪，所提煉嘅豬油）與沙甸魚粉亦相當重要。
呢款當地炒麵更獲得日本B級美食大賽「B-1 Grand Prix」第一回與第二回嘅金賞，美味實力，有目共睹。
三島可樂餅
三島可樂餅曾連續2年入選日本B級美食大賽「B-1 Grand Prix」排行榜，亦有專門嘅愛好會。另外，三島可樂餅嘅定義非常簡單，只需使用100%當地生產嘅優質三島薯仔即可，可樂餅裡面要放咩材料完全隨店舖自由發揮！由於其條件簡潔不設限，激發出各式各樣、充滿樂趣嘅三島可樂餅，包括使用高級和牛、國產豬肉與加入半熟蛋等各種款式。
蓬鬆蒸雞蛋（たまごふわふわ）
製作蓬鬆蒸雞蛋嘅材料與做法與蒸蛋非常相似，將大量空氣打入蛋液中，不停攪拌至綿密狀後放入鍋蒸，製成品望落與梳芙厘蛋糕相似，食落則入口即融，好似將一舊雞蛋雲大大啖食咗落肚咁喔。
蓬鬆蒸雞蛋嘅起源可追溯至江戶時代，據聞受新選組局長「近藤勇」喜愛，而當時呢道菜式屬於高級料理，只有極少數人士可以品嘗，但現時靜岡縣袋井市將呢款夢幻料理完美重現，並成為大家都能品嘗得到嘅當地美食。
Comments