講起北海道就會諗到雪景，講起雪景就諗到溫泉，而講起溫泉，就不得不提到「登別」喇！喺日本全國溫泉排行榜上永遠都係名列前茅嘅「登別溫泉」，係北海道內最有名嘅溫泉。佢嘅魅力唔單止在於擁有9種溫泉泉質，仲在於呢度有一個景色絕美嘅「地獄谷」、好多唔得人驚反而好可愛嘅「鬼」，仲有全國唯一一個熊動物園。除咗景點推薦，今次我哋仲會為大家介紹美食同手信情報，千祈咪錯過！
北海道「登別」喺邊度？
登別位於北海道嘅南部，距離大家熟悉嘅札幌好近。如果搭飛機嘅話，最近嘅機場係新千歲機場，喺台灣、香港或者東京都有直航機可以到。由機場開車嘅話大約個幾鐘，搭JR特急嘅話，都只需要大約50分鐘，要前往非常方便。另外，喺札幌市內搭JR特急大約1個鐘頭10分鐘左右、喺室蘭搭普通電車大約35分鐘，或者喺苫小牧搭JR特急都只需要25分鐘。如果要策劃一場札幌周邊嘅小旅行，絕對要將「登別」加入你嘅旅程清單裡面！
登別係「鬼」嘅故鄉？點解周圍都有鬼？
聽到個「鬼」字唔洗咁驚住！此鬼不同彼鬼，佢指嘅並非台灣香港人心目中嘅「鬼魂」，而係有住尖角獠牙、外表兇悍並手持狼牙棒嘅一種妖怪。當然喺登別呢度亦唔係真係有鬼，只係因為呢度嘅名勝「地獄谷」，因為火山活動而不斷冒出白煙，睇起上嚟就好似鬼怪棲息嘅地獄咁。久而久之，「鬼」就成為咗登別嘅標誌喇！
喺登別溫泉街上，周圍都可以見到鬼嘅木像同石像。除咗最定番嘅「赤鬼」同「青鬼」以外，仲有好多大細、造型甚至顏色都唔一樣嘅鬼喺呢度「出沒」，稱登別為「鬼之街」絕對當之無愧。
喺夏天，呢度甚至會有「地獄谷鬼煙火」（地獄の谷の鬼花火）活動（※舉行時期可能會有更改）。曾經喺第24屆故鄉活動大獎中獲得「內閣總理大臣獎」嘅呢個活動，由地獄谷嘅守護神敲鑼打鼓、跳舞，並手持煙花向夜空發射。有機會嘅話，可以嚟睇吓呢個「鬼」咁有活力嘅表演！
當然平時喺唔同舖頭，你都可以搵到以「鬼」為題材嘅手信㗎。
嚟到登別萬勿錯過！必到觀光點推介
係地獄定係人間天堂？「地獄谷」一早一晚都充滿魅力
從登別溫泉商店街行大約10分鐘就可以到嘅「地獄谷」，係一個因為俱多樂火山嘅火山活動而形成嘅爆裂火山口遺跡。地獄谷內有多個噴氣孔，會噴出渺渺白煙環繞住山谷。同時地底間中會發出低沉嘅隆隆聲，而湧水口則會冒出滾燙嘅泡。淨係聽描述，係唔係十足十故事書裡面描繪嘅地獄咁呢？不過只要實際睇過呢度嘅風景，你就會發現其實地獄谷一啲都唔得人驚！
地獄谷嘅岩石因為受到多種溫泉水同氣體嘅化學影響，而產生藍、綠、紅同橙等多種唔同顏色，七彩繽紛非常引人入勝。春天群花盛放、夏天原生林綠意盎然、秋天紅葉燦爛絢麗，而冬天白雪更會為地獄谷添上蒼涼又神秘嘅氣氛，無論一年四季幾時到訪，都可以欣賞到美景！
地獄谷步道亦都連接住大湯沼步道，一路行落去可以前往「大湯沼」同「奧之湯」呢兩個景點。大湯沼底會噴出約130℃嘅硫黃溫泉，泛藍白色嘅泉水非常靚，加上源源不絕繚繞嘅白煙，會比人一種仿如置身喺人間仙景嘅錯覺！
再行大約10分鐘嘅話，可以到達「大湯沼川天然足湯」。由大湯沼溫泉水溢流成河嘅大湯沼川，泉水流到足湯呢度溫泉啱啱好適合浸腳，有時間嘅話記得帶埋毛巾嚟浸吓呢個秘湯啦！
值得一提嘅係地獄谷步道全年都會有「鬼火之路」活動，同樣好值得一睇！
喺「登別棕熊牧場」近距離觀察棕熊生態！
北海道「熊出沒注意」嘅標示板應該無人唔識，但實際上又有幾多人真係見過棕熊呢？如果你都想一睹棕熊嘅廬山真面目，就嚟「登別棕熊牧場」啦！牧場位於海拔550米高嘅四方嶺上，從登別溫泉街搭纜車，只需要7分鐘就能到達。喺探訪可愛蝦夷棕熊之前，可以好好善用呢幾分鐘嚟欣賞登別壯闊嘅美景！
山頂嘅牧場內一共住咗大約70頭蝦夷棕熊，幾個區域中比較特別嘅係一個稱為「人籠」嘅地方。人類身處喺由玻璃圍起嘅小屋入面，而棕熊就會係外面自然走動，大家可感受被棕熊包圍嘅刺激感覺！課金一吓買餵熊熊嘅零食，仲可以同佢哋拉近距離𠻹！
如果睇到特別嘅車廂代表你夠哂有運！
離開前可以到觀景台欣賞「俱多樂湖」景色
登別棕熊牧場
- 地址：北海道登別市登別溫泉町224
- 官網：https://bearpark.jp/
兩大主題公園「登別伊達時代村」、「尼克斯海洋公園」
如果係帶小朋友嚟玩嘅話，另外都很推薦以下兩個主題公園㗎！「登別時代村」內每一處都完美重現咗江戶時代嘅氣氛，古色古香嘅舖頭、著上一身古裝嘅工作人員、傳統遊戲體驗，仲有「忍者show」和「時代劇」表演等等，等你可以穿越時空，體驗做返一日古代人！
做完古代人，嚟「尼克斯海洋公園」做歐洲貴族啦！以丹麥曾實際存在嘅「尼克斯城」作設計主題嘅城堡，裡面竟然係一個可以欣賞各種魚類同水母嘅水族館！公園入面仲有各種機動遊戲，海豚同企鵝表演等等，大人同小朋友都一定可以盡興而歸！
登別伊達時代村
- 地址：北海道登別市中登別町53-1
- 官網：https://edo-trip.jp/
登別尼克斯海洋公園
- 地址：北海道登別市登別東町1-22
- 官網：https://www.nixe.co.jp/
溫泉街都有好多嘢睇！
喺離開前嘅最後幾個鐘，不妨到溫泉街行吓作最後衝刺啦。溫泉區內除咗有大大小小唔同嘅鬼像，比較特別嘅係仲有一個「閻王殿」（閻魔堂），定時會有閻王換面表演！另外「泉源公園」內有一個「間歇泉」，每隔三個鐘就會噴出溫泉水同氣體，場面超震撼！
喺雪季仲可以進行唔同體驗！
只有喺特定地區、氣候同季節先睇得到嘅樹冰，係一生人必睇一次嘅絕景。喺連接登別溫泉同洞爺湖嘅Orofure山區，你可以穿著雪鞋行走喺蓬鬆嘅雪地上，欣賞到非常罕見嘅樹冰。喺呢度，你可以投入於好似幻想世界咁嘅風景入面，盡情享受雪景。
登別Gate Way中心
- 地址：北海道登別市登別溫泉町26
- 官網：https://gwc.noboribetsu.co.jp
喺Sunlaiva滑雪場，除咗滑雪，仲有好多其他嘅樂趣。由5 至6 歲開始就可以體驗嘅雪地駕駛，係一種喺滑雪板上裝上座椅嘅新型雪具。佢有手柄同埋剎車器，操作起嚟非常簡單。只要練習30分鐘左右，就可以放心喺雪地上滑行。就算係唔識滑雪嘅朋友仔，都可以喺雪地裡面盡情玩得開心！
Karurusu溫泉Sunlaiva滑雪場
- 地址：北海道登別市Karurusu町27
- 官網：https://sanlaiva.com
當地人推介美食&伴手禮！嚟登別就係要狂食狂買！
登別閻魔炒麵
沒食過登別閻魔炒麵，唔好同人講你嚟過登別！呢款炒麵係登別市原創嘅當地美食，喺登別市內好多唔同嘅餐廳都食得到。要掛上「登別閻魔炒麵」呢個名號，就必須符合使用北海道產扁平麵、充滿芝麻香氣嘅特製微辣醬汁，同當地產食材呢三大條件。呢款炒麵雖然顏色紅當當，但味道就唔會好辣，反而係愈食愈能感受到醬汁具有多種層次嘅滋味。根據店家唔同，使用嘅配菜食材可能會係肉，又可能會係海鮮，全部都唔一樣㗎。如果食得落嘅話，不妨食多幾間比較吓啦！
地獄蟹飯
「地獄蟹飯」係溫泉街上一間叫「溫泉市場」嘅餐廳嘅名物。白飯上紅當當嘅，係店家細心用手撕開嘅毛蟹蟹肉加上泡菜醬汁，食起上來雖然都幾辣，但食真啲可以食到蟹香同醬香，好好味呀！食完一半之後溝埋蛋黃一齊食，味道會變得比較柔和，一樣咁推薦！
喺登別溫泉街上有好幾間手信舖，飲飽食醉浸完個靚溫泉後，可以慢慢嚟睇一睇，選購登別特有嘅手信！
雖然今次介紹嘅景點，只要兩日一夜就可以全部睇哂，但如果想嘗試登別共9種不同嘅溫泉，或者想浸吓各間旅館獨有嘅溫泉，就建議至少花兩個晚上住喺呢度喇。你都快啲嚟登別浸溫泉消除旅行嘅疲勞，同時享受觀光、美食同購物嘅樂趣啦！
Comments