日本有47個都道府縣，相信大家去日本旅行，一次過最多只可以踏足幾個縣吧！而且，多數都會偏向能夠互相以近距離移動嘅近郊區域。如果你想遊覽東京嘅同時，仲想享受埋其他都道府縣嘅特產與美食，咁就非常推薦你去一趟「當地物產店」，咁就可以實現你呢個奢侈願望啦！即刻跟著小編睇睇「當地物產店」有咩魅力咁吸引啦！
今次，小編去咗呢間從有樂町站徒步1分鐘即可抵達嘅「北海道Dosanko Plaza有樂町店」（北海道どさんこプラザ有楽町店），並由當店嘅副店長高島先生，親身為大家介紹「當地物產店」嘅魅力，以及熱門嘅暢銷商品喔。
其他地方嘅當地食材、調味料、飲品喺首都圈東京都可以能輕鬆入手 ⁉ 當地物產店的魅力
究竟「當地物產店」係乜東東？「當地物產店」係即使你身處東京，都可以購買得到日本其他都道府縣當地特產嘅商店。咁就可以喺住嘅地方輕鬆享受日本各地美食，當去咗當地旅行咁啦。
物產店係專門販售各都道府縣商品、甚至可以喺店內享用嘅店舖。喺銀座、有樂町等距離東京站非常近嘅地區，就有唔少「當地物產店」。
「北海道Dosanko Plaza有樂町店」對選擇商品種類的出品有咩講究呢？
北海道向來喺「物產店」當中人氣極高。今次，小編要向大家介紹嘅係呢間「北海道Dosanko Plaza有樂町店」，無論係北海道嘅農產品、海產品，抑或係人氣嘅零食點心等商品，一共有成1200件以上嘅驚人商品種類，令人目不暇給。以下係由副店長高島先生親自講述關於有樂町店嘅魅力之處。
「北海道Dosanko Plaza有樂町店」有販售北海道產嘅零食點心、海產品、農畜產品、乳製品、酒等商品。另外，如果想購買珍貴商品與獨特美食嘅話，就一定唔可以錯過專門擺放期間限定嘅珍貴商品，名為「ROOKIES STAGE」（ルーキーズステージ）嘅區域啦！以前曾經出現過甜蝦、柳葉魚乾、※「鮭冬葉」（鮭とば）等，以海鮮製作嘅珍饈食品。
除此之外，使用99.6%乳製品所製作嘅「北海道牛奶」、「夕張蜜瓜」雪糕、新鮮炸好嘅可樂餅、北海道名產嘅北海道炸雞「ZANGI」（ザンギ）、炸肉餅等可供外賣嘅商品亦相當充實，一年四季都用心經營令人感到歡樂無窮嘅店鋪。」
※將秋鮭縱向連皮切成細條狀，用海水清洗，以海風晾乾而成嘅食品
「北海道Dosanko Plaza有樂町店」 店員推薦5款食品
以下落嚟會介紹由高島先生推薦，可以喺店鋪裡面買得到嘅精選商品！
1. 三文魚RUIBE漬（鮭ルイベ漬）：佐藤水産1,890日圓
「最推薦係對於天然鮭魚（三文魚）極度講究嘅海產品專賣店『佐藤水產』嘅『三文魚RUIBE漬』！將北海道產嘅天然三文魚與三文魚籽放入名為「鮭醬油」嘅醬汁醃制而成，既美味且帶有入口即融嘅口感，相當受歡迎。呢款商品喺百貨公司裡面嘅北海道物產展上亦相當受歡迎，而且喺有樂町店全年都可以買得到，如果有機會嚟到嘅話，記得唔可以錯過喔。」
2. 海膽醬油（雲丹醤油）：LOCO FARM VILLAGE （ロコファームビレッジ）1,296日圓
「使用大量經過濾後嘅海膽所製成嘅海膽泥作為材料，大大咁提升口感，並以最大限度引出食材嘅濃厚、醇度、香味嘅極品醬油。適用於各種料理，最推薦用嚟做生雞蛋撈飯嘅調味料喔！」
3. 三文魚肉碎（ほぐし鮭）：杉野FOODS（杉野フーズ） 1,458日圓
「將充滿著脂肪嘅紅三文魚內嘅魚骨逐條抽出，仔細地拆成肉碎，用鹽與沙律油製作而成嘅即食三文魚肉碎罐頭。可以用嚟整飯糰、炒飯等各種料理。」
4. STICK HONEY［ACACIA］（スティックはちみつ［アカシア］）：HOTSPACE COSMOS（ほっとスペースこすもす） 594日圓
「據聞喺日本，國產蜜糖只有1%喺市場上流通。為咗方便食用，就將呢種稀有蜜糖製成個別包裝。擁有高雅香味與醇厚甜味，並無過於獨特嘅味道，相當易入口，亦推薦搭配乳酪、紅茶等享用。呢款係由位於旭川嘅精神障礙者福利設施「HOTSPACE COSMOS」（ほっとスペースこすもす）嘅設施使用者所包裝嘅商品，所以購買商品亦等同於間接支援相關設施，亦係其重點之一。」
5. 函館 KOGANE（函館こがね）：ISHIO食品（イシオ食品） 918日圓
「使用北海道近海產嘅北魷，製作出柔軟兼口感極佳嘅商品。極力抑制調味，能享受魷魚嘅香味之餘，仲可以品嚐到魷魚本身嘅美味，係一款非常講究嘅燒魷魚食品。」
「北海道Dosanko Plaza有樂町店」 店員推薦商品（飲品類）
即刻睇睇有咩飲品推薦，等你可以買返屋企慢慢嘆！
1. Co-up Guarana（コアップガラナ）：小原 162日圓
「呢款係從『Guarana（巴西香可可）』果實中所提取嘅巴西香可可提煉物為製作主材料嘅飲品，亦係北海道縣民嘅靈魂飲品，飲落帶點刺激嘅口感為其特徵。從發售起便使用聳立於北海道函館市近郊嘅橫津嶽所提取嘅天然水，加上天然成份製作嘅甜味劑，經過嚴格衛生監管下製作而成。餘味清淡，非常易入口喔！」
2. 北海道TOUKIBI茶（北海道とうきび茶）：伊藤園 173日圓
「呢款係伊藤園嘅地區限定銷售品，混合茶系列之中嘅北海道限定商品喔。100%使用北海道產原料（粟米、玄米等），於北海道生產工廠精心製作出零咖啡因及卡路里嘅混合茶飲品。」
「北海道Dosanko Plaza有樂町店」 店員推薦商品（零食點心類）
即刻睇睇最暢銷嘅零食點心有邊幾款，等你可以買返香港做手信！
1. AKAISAIRO（赤いサイロ）：清月 972日圓
「使用北海道產嘅牛奶、小麥、牛奶、雞蛋等製作而成，充滿北方大地恩惠嘅芝士蛋糕。其特點為一啖咬落去嘅時候，於口中擴散開來嘅牛奶與芝士醇香味，猶如梳芙厘般一觸舌尖便融化嘅輕盈度，搭配上結實嘅口感，成絕美滋味。喺平昌奧運會上，冰壺女子代表「LOCO SOLARE（LS北見）」於比賽中場休息時享用呢款芝士蛋糕後，隨即以形容「專注食嘢嘅時刻」嘅日文「MOGUMOGU TIME（モグモグタイム）」成為人氣熱話。」
2. KIBANA（き花）：壺屋總本店 1,001日圓
「連續35年獲得Monde Selection（モンドセレクション）金獎嘅甜品。酥脆可口嘅杏仁脆餅，夾上Couverture白朱古力，成為一款極為講究嘅杏仁白朱古力夾心餅！千祈唔好錯過呢款香甜酥脆嘅甜點零食喔。」
店舖資訊
- 名稱：「北海道Dosanko Plaza有樂町店」（北海道どさんこプラザ有楽町店）
- 地址：東京都千代田區有樂町2丁目10-1東京交通會館1F
- 交通：從JR有樂町站徒步1分鐘，從東京METRO有樂町站徒步3分鐘。
- 營業時間：10:00～20:00
- 定休日：年末年始
- 官網：https://www.maruiimai.mistore.jp/common/dosanko.html
Comments