你對日本OL（Office Lady）有咩印象？
「FJ STAFF圖鑒」係分享讀者們想知道嘅日本OL日常生活嘅主題專欄系列。今次，我哋邀請到FUN! JAPAN嘅網購平台負責人，超鍾意飲酒嘅山科綾小姐進行訪談。無論係FUN！JAPAN嘅工作內容，抑或係假日度過方式，山科綾小姐都大方地向小編講述自己嘅生活方式，跟住落嚟就等小編向大家逐一介紹，揭開日本OL生活方式嘅神秘面紗！
<山科’s Profile>
年齡：30多歲
出身：東京（離島出生）
興趣：排球、寶塚歌劇鑑賞
【工作篇】揭開日本OL・山科小姐過去工作經歷嘅神秘面紗
山科小姐出生於東京嘅一個離島，從高中時代開始住喺東京都內。曾經喺室內裝飾雜貨公司從事銷售一職、以及於與服裝相關嘅網購平台公司工作，其後再轉職到FUN！JAPAN（以下簡稱FJ）。究竟呢位積累咗各種職場工作經驗，可作多方面對應嘅日本OL，到現時為止，曾經過咩工作呢？
ー進入FUN! JAPAN之前做過咩工作呢？
「我喺前公司，係進行有關時裝系網購平台（電子商務） 嘅工作。工作內容包括商品登錄、尋找參考圖像和模特兒、決定採用圖片等，擔任公司網購平台網站嘅製作相關嘅整體業務。拍攝商品時，除咗攝影棚之外，亦會進行外景拍攝。 另外，確認用作網上發佈嘅橫幅廣告草案、製定銷售計劃亦係工作內容嘅一部分。」
ー 而家喺FUN! JAPAN係負責咩工作呢？
「最初被FJ企業理念『成為亞洲與日本嘅橋樑』所吸引，對於FJ嘅誇境網購平台（FUN！JAPAN SELECT SHOP） 深感興趣，所以决定加入公司。現時，喺FJ主要負責以台灣、香港為對象，所展開嘅跨境網購平台網站嘅工作。進行商品嘅樣品確認、攝影主題設計、思考提高銷售額等方案，每日與FUN！JAPAN嘅夥伴們齊齊反覆嘗試，不斷摸索。」
― 入職FUN! JAPAN前後印象有無改變？
「加入公司之前，覺得應該係一間集結少數精英、比較嚴厲嘅公司。我本身係因為想入職人數較少嘅公司，而選擇轉換工作環境，但係喺轉職活動中，首次認識到FUN！JAPAN，得悉係一間有唔同國籍員工嘅新創企業，不其然會覺得環境應該非常嚴厲吧？但係，實際加入公司之後，唔單止全部人都非常親切，日本人與外國工作人員嘅關係亦非常良好，令人感到安心感十足。」
「FUN！JAPAN嘅工作，與以前工作崗位嘅不同之處，在於每項工作所花費嘅工夫與時間。因為之前公司所運用嘅網購平台網站，對應語言只有日文，所以有非常多工作內容係可以自己一個人完成，但係FJ主要係以海外事務為主，因此所花費工時比以前多。特別係有關翻譯與用戶對應等方面，與各國工作人員互相合作亦係必須條件，我切身感受到與多人互相扶持嘅重要性。即使撰寫文章，亦要花時間從日文翻譯成各國語言，所以比起以前嘅工作，需要喺時間排程安排上花費更多精力。」
【平日度過方式】日本OL收工後通常會做乜呢？
應該有唔少讀者會好奇，喺工作上幹勁十足嘅日本職業女性，究竟喺平日工作結束後會有咩搞作。山科小姐為大家分享由工作結束後，直到瞓覺為止呢段時間嘅度過方式喇。
「朝早基本上係返9點半，收工時間唔多穩定，有時6點準時收工，有時會加班到8點左右。我非常鐘意飲酒，屬於平日1星期飲足5日嘅程度。所以，收工之後會喺屋企附近嘅酒舖買日本酒與葡萄酒，倒落平時收集嘅酒具，經常一個人邊睇電視，邊飲酒。」
「因為係一個人住，所以會嘗試重現多個喺Instagram見到嘅食譜。前幾日喺屋企，亦嘗試重現喺居酒屋食過嘅菜式喔！」
「我鍾意一邊聽前公司前輩介紹嘅『Podcast *1）』，一邊進行煮飯、摺衫等家務事。最近，我迷上收聽歷史節目！」
*1：可以從智能手機、電腦上收聽網上發佈嘅語音內容服務。
「為製造一個平心靜氣嘅時間俾自己，前幾日我嘗試自己親手刷抹茶。點心係喺商店街嘅日式和菓子舖度買。」
【假日度過方式】日本OL・山科小姐嘅假日係點過？
「開始對排球感興趣嘅契機，全因為喺電視上睇完排球比賽。之後，喺朋友推薦下，加入一個招募男女混合排球成員嘅社會人士社團，大概持續咗約5年左右。呢隊由社會人士所組成嘅業餘排球隊每星期都會喺體育館集合一次，令人感覺有如重返學生時代嘅社團活動一樣。間中都會去參加比賽喔！」
「我其實係寶塚歌劇（*2）嘅超級粉絲。所以，我每年都會去兵庫縣寶塚市睇一次歌劇。雖然喺東京都內嘅東京寶塚劇場都可以欣賞得到歌劇，但係寶塚大劇場（左）嘅存在，對於我嚟講就好似主題公園一樣意義重大！從車站到劇場，除咗有被稱為『花之道』（花のみち）嘅林蔭大道（右），仲有唔少與寶塚歌劇團團員（日文暱稱為「宝塚ジェンヌ」）相關物件等，非常鐘意成個都市嘅氛圍。」
*2：以兵庫縣寶塚市為據點，演出者只有女性嘅日本劇團，歷史長達一百多年。
「對於房間內嘅室內裝飾亦非常講究，自己親手培育觀葉植物亦係興趣之一。除咗會喺室內裝飾店選購泥土、肥料、花盆之外，仲會買幼苗、木板等，務求要佈置到極具時尚感。另外，日本嘅100 yen店都有賣觀葉植物嘅幼苗，性價比相當高，都非常推薦！」
「最近，我迷上收集石頭。喺旅行目的地、河灘上發現可愛嘅石頭就執起佢，並將至今為止執返嚟嘅礦物與石頭等，都放晒喺間房度做裝飾，望住佢哋心情會不其然地變得平靜。或者欣賞可愛嘅室內裝飾，個感覺應該同欣賞鍾意嘅畫作係一樣喔！
順帶一提，相片中左邊嘅石頭係喺高知縣仁澱川嘅河灘上執到㗎。洗得好乾淨，而家放咗間房度作觀賞用嘅裝飾擺設！當然，亦有買市面上販賣嘅天然石作裝飾啦。」
日本OL某一休息日時間表（山科Ver.）
08:30～ 起床 | 食早餐、洗衫、打掃
↓
11:00～ 移動
↓
11:30～ 同朋友一齊睇電影
↓
13:00～ 同朋友一齊食Lunch
↓
14:00～ 散歩＆購物
↓
16:00～ Tea Time
↓
18:00～返屋企
↓
18:30～一邊聽收音機，一邊準備晚飯
↓
19:30～ 食晚飯
↓
21:00～ 睇電視劇
↓
22:00～ 一邊飲酒一邊瀏覽社交平台or觀看寶塚專業頻道
↓
24:00～ 沖涼
↓
25:00～ 瞓覺
後記：日本OL・山科小姐所認為嘅日本職場文化係？
到此為止，山科小姐分享咗有關喺日本企業工作時嘅工作內容，以及假日充實嘅生活方式。
不過，喺Google嘅搜索引擎主頁上輸入「日本 職場 文化」等關鍵字嘅話，無可否認會出現「過勞死」、 「加班」等關鍵字和相關報導。最後，請日本人OL山科小姐講講有關現今日本企業嘅勞動環境。
「我啱啱踏入社會工作之際，當時所任職嘅公司工作時間確實比較長，因此會認為長時間工作係一種美德。但係最近日本政府正進行推動與此相關嘅法律修改政策，進行企業內嘅『工作方式改革』等行動，我認為長時間工作呢種風潮會得到莫大嘅改善。我邢家要準時收工嘅時候都係會準時收工返屋企㗎！」
關於日本職場文化嘅相關文章：
Comments