而家只要行入眼鏡舖，隨手就可以買到一副眼鏡。不過，大家又知唔知每副眼鏡至少需要經過200個工序，先會送到大家面前呢？呢次小編就嚟到生產全國95%日本製眼鏡框嘅福井縣「鯖江」，帶大家了解眼鏡框零開始製作，以至送到顧客手上嘅每個過程。當然嚟到鯖江唔單只可以買到高品質嘅眼鏡，仲可以品嚐特色醬汁豬排丼，同埋同超可愛嘅小熊貓見面㗎！想知道點先最好玩，快啲嚟參考呢一篇文章啦！
福井縣．鯖江市喺邊？要點去？
鯖江市位於福井縣北部，香港嘅朋友想要前往，可以坐直航機到達位於隔離石川縣嘅小松機場，乘巴士到福井站再轉電車前往。不過如果係由東京或者名古屋出發，就更加推薦坐JR東海道新幹線到米原站，再轉JR北陸本線特急白鷺號喺鯖江站下車。而如果係喺大阪出發嘅話，更可以坐JR特急雷鳥號直達鯖江站𠻹！2023年底，北陸新幹線嘅終點站更將會延伸至鯖江市附近嘅「敦賀」，到時候要去玩就更加方便啦！
全個城市都係一間大工場！鯖江成為「眼鏡之城」嘅故事
「鯖江」因為生產高品質又耐用嘅眼鏡而聲名遠播，唔止喺日本國內非常出名，甚至亦係世界著名眼鏡產地之一。而鯖江又係喺咩時候成為眼鏡之城嘅呢？喺百幾年前，福井縣每年到咗冬天都會俾白雪覆蓋，務農維生嘅老百姓因為無法耕種，日子過得非常貧苦。當時因為報紙嘅普及率上升，眼鏡嘅需求亦到隨之上升。擔任村會議員嘅「增永五左衛門」睇準咗呢個機會，由大阪同東京引入當時普及嘅眼鏡生產技術，希望可以解決故鄉嘅貧困問題。佢非常重視人才培訓，好快擁有唔同技術嘅人開始自立門戶，全個縣就好似變成咗一間巨大嘅眼鏡工場咁。1981年，全球第一個鈦金屬眼鏡框喺鯖江面世，鯖江製作眼鏡嘅技術亦從此得到全世界嘅認同。
深入眼鏡工場，見證職人嘅無價手藝技術！
眼鏡框可以分為「金屬」同「醋酸纖維」兩大種類，無論係邊一種都至少經過200個工序先能夠完成到。從設計、切割材料、打磨、組裝以至檢查成品，每個步驟都非常考驗職人嘅技術同經驗。鯖江嘅每一間眼鏡工場，通常只會專門負責當中部分工序。因為唔會大量生產而且唔駛分心處理其他步驟，職人可以花更多資源同時間喺自己擅長嘅部分，長年累月自然愈做愈「精」，技術同手藝都會琢磨得愈嚟愈好。
今次小編得到特別許可，潛入咗幾個工場嘅內部，發現咗「日本製」產品之所以能受到世界各地使用者嘅認可，原因在於日本人認真、細心同一絲不苛嘅個性。稍有污蹟同損傷嘅眼鏡框，佢哋都絕唔隨隨便便送出市場㗎。就算大家對眼鏡唔係好了解，只要認住「鯖江製」呢個「品牌」嚟揀就一定無錯！
「手作職人之都」鯖江唔止製造眼鏡，仲有漆器同織布！
喺成為著名眼鏡產地之前，其實鯖江就已經有同工藝製作相關嘅歷史。喺1500年前左右，鯖江市片山村落一位塗師因為修補好皇子嘅王冠而獲獎賞，自此呢度就成為咗生產「越前漆器」嘅著名產地喇。所謂嘅漆器，係自古以嚟一種以漆樹樹液塗抹喺物體表面作保護膜嘅工藝品。由於經過反覆多重塗抹，漆器會變得非常堅固耐用，同時擁有亮麗嘅光澤，既實用又美觀。為咗增加藝術性，職人更加會用「沉金」同「蒔繪」手法，喺漆器上面添加色彩同圖案𠻹㗎！
另外，傳承自江戶時代嘅「石田縞」係一種以天然草木染色棉線作原料，並以人手一梭一梭咁織成嘅布料。呢種材質輕薄、透氣度高，著上身非常舒適，好多當地人喺以前都好鐘意用。但隨住大正時代化學纖維嘅誕生，呢種要用好長時間先整到嘅布料，有一段時間都無再出現喺大家面前。不過好在1972年地域產業復興，石田縞呢種珍貴又有傳統價值嘅布料又再重見天日喇！
對以上兩種工藝有興趣，想要進一步體驗嘅朋友，推薦可以喺鯖江進行體驗。喺宮森昭弘先生嘅工作坊內，大家可以體驗簡單嘅沉金同蒔繪，亦都可以現場購買宮森先生手繪嘅蒔繪匙扣。而喺鯖江市纖維協會內，就展示咗石田島嘅製造機器同成品，如果提前預約，仲可以體驗織吓小杯墊㗎！
宮森昭宏Studio
- 地址：福井縣越前市赤坂町48-35-3
- 官網：https://www.wanushi.com/
鯖江市纖維協會
- 地址：福井縣鯖江市糺町32-1-1
- 官網：https://s-senkyo.com/
萬勿錯過鯖江嘅美食同超好玩景點！
嚟到鯖江，首先絕對唔可以錯過嘅景點就係「西山公園」喇。公園係當地人日常散步休憩嘅後花園，到咗春天，呢度更加係賞櫻同賞杜鵑花嘅名勝嚟。除咗賞景之外，公園裡面仲有一個可以免費入場嘅動物園，裡面有好多隻超得意嘅小熊貓，一舉一動都俘虜人心，超治癒呀！
西山公園
- 地址：福井縣鯖江市櫻町3-7-20
- 官網：https://www.city.sabae.fukui.jp/nishiyama_zoo/
講到鯖江市嘅代表性地標，咁就絕對係「眼鏡博物館」喇。大樓外牆上巨大嘅眼鏡招牌，等您喺遠處都可以知道佢嘅位置。當您行到去博物館附近，您會好驚喜咁發現自動販賣機、長櫈，甚至係停車場嘅地面上都有好多「眼鏡」，好得意㗎。入到博物館，會有視頻介紹眼鏡嘅製作過程，同埋展示咗過去實際使用過嘅工具。
眼鏡博物館
- 地址：福井縣鯖江市新橫江2-3-4 眼鏡會館
- 官網：https://www.megane.gr.jp/museum/
離開前食盡所有美食！
觀光完後，梗係要搵啲好嘢食下再走啦！有「PA軒」（パ軒）呢個別稱嘅「ヨーロッパ軒」，係當地人好鐘意嘅一間醬汁豬扒飯專門店嚟。喺福井縣，一講豬扒飯大家都會諗到係醬汁豬扒飯。呢種代表住福井縣嘅縣民美食，特色係用咗比較薄嘅豬扒，以幼麵包粉包住炸熟之後，淋上加咗喼汁同唔同香料嘅特製醬汁嚟整成。食起上嚟好脆口又無油炸味，酸咪咪嘅醬汁唔單止開胃，仲保證會令你扒哂成碗飯𠻹！
ヨーロッパ軒（歐洲軒）神明分店
- 地址：福井縣鯖江市水落町1-12-21
如果午餐唔想食得太重口味，推薦你可以嚟返碗以石磨蕎麥粉整成嘅蕎麥麵。喺福井縣同鯖江市內有唔少地方都食到放滿咗蘿蔔蓉嘅蕎麥麵，不過呢款「炸油豆腐蘿蔔蓉蕎麥麵」，就係只要喺「二男坊」先食得到嘅名物。加入咗福井縣原材料、使用咗8蕎麥粉:2小麥粉比例嚟整嘅蕎麥麵煙煙韌韌，好有咬口。放喺上面用油炸過嘅油豆腐外脆內軟，加埋蘿蔔蓉同特製醬汁，味道雖然清新，但會令人食過返尋味！
越前 蕎麥處 二男坊
- 地址：福井縣鯖江市吉江町512
喺FUN!JAPAN SELECT SHOP 感受鯖江眼鏡嘅魅力
由青山眼鏡設計、由鯖江市嘅工廠生產，優秀嘅「約翰列儂眼鏡」既輕便又耐用，佩戴起嚟非常舒服。最重要嘅係，呢款鏡框就好似提醒住我哋約翰列儂幾時都咁型咁有個性咁，無論係喺邊個時代佩戴，都一定唔會過時。快啲嚟FUN!JAPAN SELECT SHOP買呢款顏值同實用性兼備嘅商品啦！
FUN! JAPAN Select shop - 約翰藍儂眼鏡系列
https://fun-japan-select.com/zh/collections/john-lennon-glasses
雖然今次無辦法一一介紹，但其實鯖江仲有好多懷舊味濃嘅街道同建築物㗎。下次一定要親身嚟鯖江，親眼睇下呢個生產出無數精美眼鏡嘅城市有幾咁靚！
Comments