今次呢個「重現日本鄉土料理系列」會介紹山形縣嘅芋頭料理，使用為芋屬植物嘅芋頭作食材。製作方法簡單之餘，食材亦可輕鬆入手，推薦大家可以跟住以下食譜試試自家製喔！可以一邊品嚐美味日式料理「芋煮」（芋頭鍋），一邊感受好似去咗一趟山形縣旅行咁啦。
日本鄉土料理係？
鄉土料理係指活用各地區嘅當地特產，結合當地風土民情所烹煮出來，並經過長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。
「芋煮」起源&歷史
相傳「芋煮」嘅起源可追溯至1600年代中期，歷史相當悠久。當時，被稱為「最上川舟運」終點嘅中山町長崎一帶係將貨物從上方經由酒田搬運落嚟嘅接收地點，但由於當時並無任何可通知船隻已到達嘅通信手段，船上嘅船夫們往往要等好幾日，收貨人先至會出現，因此會趁空檔喺河灘上圍著鍋舉行宴會。據聞因碼頭附近嘅小鹽村落係芋頭名產地，所以會使用其芋頭同船上裝載嘅「棒鱈」（棒ダラ）等食材煮成鍋物料理，繼而演變成現今嘅「芋煮」。而加入牛肉嘅「芋煮」係於昭和初期先至開始出現。
「芋煮」嘅特徴
「芋煮（いも煮）」以芋頭為主要食材，加入蒟蒻、葱、菇類、牛蒡、肉類等煮成鍋物料理，係山形縣自古傳承嘅鄉土料理。
「芋煮」經常會喺秋天至冬天芋頭收成期間享用。將鍋具、食材帶到河灘上，與家人和朋友相聚一堂齊齊品嚐，又或者會喺運動會、當地活動等結束後於野外享用，此舉被稱為「芋煮會」。當然，亦會作為家庭料理經常喺屋企煮嚟食。「芋煮會」係山形縣名物，與新年會、忘年會同樣被列為年度活動之一，對於山形縣民嚟講，「芋煮」係與家人、朋友團聚時不可缺少嘅鄉土料理。
並且，於秋天至初冬9月~11月期間，為咗向全國推廣經常舉辦嘅「芋煮會」嘅魅力所在，由1989年開始每年9月都會舉行「日本第一芋煮會」（日本一の芋煮会フェスティバル），成為秋季嘅一大活動。2018年為咗紀念「日本第一芋煮會」踏入第30週年，實施一項眾籌活動，獲得全國各地嘅協助下，直徑6.5米嘅「第3代 大鍋・鍋太郎」便隨即誕生！
呢個「第3代 大鍋・鍋太郎」唔止鍋大，所使用嘅烹調器具、製作方法陣容亦非常強大！大膽使用喺建設工程等現場出現嘅起重機——「移動式起重機規格機、挖掘機」（移動式クレーン仕様機・バックホー），一口氣烹調超過30,000份量嘅食材，情景相當驚人，難怪被稱為「日本第一」嘅「芋煮會」。有機會記得喺9月中左右去山形一邊賞紅葉，一邊參與「芋煮會」喔。
相關文章：
「芋煮」製作方法
跟住落嚟，小編會開始介紹「芋煮」嘅製作方法。
「芋煮」材料（4人份）
材料（4人份）
- 芋頭 300g
- 蒟蒻100g
- 長葱 1條
- 牛肉片300g
- 水 800ml
調味料
- 砂糖 30g
- 醬油 50ml
- 酒 20ml
附上「芋煮」嘅製作影片
- 將芋頭嘅頭尾部分切走，去皮切成一口大小。
- 長葱斜切成1cm闊，用匙羹將蒟蒻挖成一口大小。
- 於鍋裡放入①、水、各調味料嘅一半份量，用中火加熱。
- 芋頭煮熟後，放入②與牛肉片。
- 牛肉片煮熟沸騰後，撈起泡沫浮沫。
- 放入剩低嘅調味料，用中火煮5分鐘。
- 裝盤即大功告成。
Comments