日本最大型嘅汽車製造商——豐田汽車(TOYOTA)，發跡自愛知縣，當地仲有個「豐田博物館」，除咗可以瞭解到豐田與汽車嘅發展歷史，仲可以欣賞到聚集世界各地嘅珍貴汽車與微型模型等，可謂精彩位滿載！下個旅程不妨去「豐田博物館」行個圈，順便去埋2022年11月開幕嘅「吉卜力公園」，一於玩盡愛知縣！即刻去睇睇「豐田博物館」有咩精彩魅力位啦。
關於豐田汽車&豐田博物館
「豐田汽車」可以稱得上係日本汽車製造商嘅代表。自1936年開始量產汽車以來，其技術得到世界認可，如今已成長為汽車全球銷量每年超過1000萬部嘅頂級品牌。喺香港都經常會見到「T」字豐田標誌嘅汽車出現。
「豐田博物館」於1989年設立，係豐田汽車成立50周年嘅紀念事業之一，係一個可以接觸到關於汽車嘅發展與文化嘅博物館。除咗有汽車展示、國內外嘅汽車產業研究之外，仲會舉行「Toyota Automobile Museum Classic Car Festival」等活動。
豐田博物館位於日本磁浮電車「Linear motor car（リニアモーターカー）」（簡稱:Linimo）沿線車站之一，前兩個站仲係愛·地球博紀念公園同2022年11月開幕嘅「吉卜力公園」所在地，小編非常推薦大家可以順路去埋喔！
相關文章
豐田博物館嘅「汽車館」
於汽車館一樓坐鎮嘅係豐田首部生產型號嘅轎車——「豐田AA型轎車」（1936年）嘅複製品。當時最流行嘅流線形設計與黑車身嘅亮麗外觀，令眾人皆迷戀。
從2樓到3樓，有象徵著日本、美國、歐洲等各地區約140部汽車，按年代、並分別喺13個區域進行展示。令人感到驚訝嘅係在場所有汽車，至今仍能照常行駛！
汽車起源於1700年代，由法國所製造嘅蒸汽汽車開始，及後電動汽車、汽油汽車相繼誕生，滲透去大眾嘅日常生活。1910～1920年代古典嘅車身，時至今日依然覺得呢款設計相當型仔！
可以靠近車身進行觀察與拍攝。
去到1930年代，日本政府加强培養國產汽車製造商，「豐田自動織機」（TOYOTA）等人正式挑戰真正嘅汽車生產。
戰後嘅日本人生活水準提高，老百姓亦有能力擁有私家車。1960～1970年代所發售嘅汽車，運動型設計為其特徵。
去到1970年代之後，考慮到空氣污染、交通事故等，引進可改良相關問題嘅技術同符合日常生活方式嘅車款亦繼而誕生，汽車界進入多樣化嘅時代。另外，以氫氣為燃料與電動汽車更於2000年代誕生。大家可以喺度一邊欣賞著唔同年代嘅車款，一邊回顧汽車歷史。
豐田博物館嘅「汽車文化資料室」
「汽車文化資料室」聚集並展示約4000件，國內外與汽車相關嘅展品。
更將展示於汽車館、具歷史性嘅汽車款式，打造成1:43嘅迷你微型車。呢度有成約800部嘅迷你微型車，皆相當精緻，令人喺欣賞嘅同時，不禁忘掉時光嘅飛逝。
亦有展示回顧日本交通工具文化嘅「錦繪」，馬車、人力車、初期嘅汽車、鐵路等珍貴畫面，皆可以透過「錦繪」感受得到。
更加從汽車製造廠收集咗約400件汽車徽章、世界各國嘅汽車車牌、汽車郵票、海報、出版物品等，入場人士唔單止可以欣賞到實體車，仲可以睇埋與汽車相關嘅各種資料。去勻晒「汽車館」與「汽車文化資料室」兩個區域嘅話，更能感受到汽車嘅精彩魅力。
豐田博物館嘅Café、餐廳、商店
豐田博物館嘅餐廳「AVIEW」，提供以西餐為主嘅創意料理。除咗可以品嚐附送午餐餐墊嘅「TOYOTA 2000GT Hot dog」（1300日圓）之外，仲可以品嚐到季節限定嘅菜式。
位於博物館呢間「CARS & BOOKS」Café，係是一間彙集關於車嘅寫真集、藝術書籍嘅Café。不妨嚟感受一邊單手拎書，一邊沐浴於從窗戶照入嚟嘅和煦陽光，放鬆享受一個美好時光。
一場嚟到，就梗係要去博物館商店，買返幾款手信，紀念博物館嘅旅遊回憶。當中，係將匙羹嘅手揸部分，設計成「士巴拿」咁款嘅「士巴拿匙羹」（550日圓）相當受歡迎。而且呢款匙羹係豐田博物館限定嘅原創商品喔！
食品類嘅手信亦非常受歡迎。當中包括將包裝設計成人氣車款嘅「博物館咖喱」（432日圓）、模仿名車外型嘅副食品（4塊裝140日圓）、以豐田車為設計模樣嘅年輪蛋糕（540日圓）等人氣商品。
唔單止係汽車迷，對於對設計與近代史感興趣嘅人，豐田博物館絕對係你嘅最佳景點。下次不妨去欣賞一下珍貴嘅汽車與相關資料吧。
「豐田博物館」（トヨタ博物館）
- 地址：愛知縣長久手市橫道41-100
- 交通方式：從Linimo「藝大通」站徒步約5分鐘
- 開館時間：09:30~17:00（最終入館16:30）
- 休館日：週一（如當日為假日，會改為翌日休館）及年末年始
- 入場費：成人1200日圓，65歲以上700日圓，13～18歲600日圓，6～12歲400日圓
Comments