據聞愛知嘅飲食文化，喺日本嚟講算非常獨特。名古屋更加係以「名古屋美食（名古屋めし）」而廣為人知，當中燉煮鳥冬、味噌關東煮、味噌鰹魚等，以豆味噌所燉煮製作出嘅美食亦非常出名。另外，名古屋獨特嘅喫茶店文化、極具象徵性嘅「小倉吐司」，亦係遊客必食名物之一。FUN! JAPAN編集部今次會為大家介紹多款名古屋美食，進行徹底式報導！不過，今次就唔會介紹大家成日聽見嘅「名古屋美食」，係會介紹更獨特、令大家意想不到嘅「深度」美食喔！即刻去睇睇名古屋有咩特色美食啦！
提供「驚人餐單」嘅喫茶店「Mountain」
從名古屋地下鐵名城線「八事日赤站」徒步8分鐘便可抵達喫茶店「Mountain」。呢間並非普通喫茶店，除咗會提供極特別兼具個性嘅美食，更加成為社交媒體上嘅人氣熱話，唔少遊客都係為去「Mountain」朝聖而特地到此一遊。FUN! JAPAN編集部亦決定挑戰「Mountain」所提供嘅個性料理，當中又分成「登頂」與「遇難」兩個結果，只要將點返嚟嘅菜式通通食完，就稱之為「登頂」，反之，食唔晒就會被稱為「遇難」，究竟FUN! JAPAN編輯部係成功「登頂」定會「遇難」？「Mountain」又會提供點樣嘅菜式？即刻去文睇到尾啦！
鍾意抹茶嘅人都可能會食唔晒！甜味抹茶小倉意大利粉
使用抹茶特製嘅意粉，放上鮮忌廉與小倉紅豆餡嘅「甜味抹茶小倉意粉」（甘口抹茶小倉スパ），可以稱得上係「Mountain」嘅代名詞。據聞自從創業起，就已受眾人喜愛，喺甜味意粉系列當中，亦擁有扎根嘅人氣度。送到餐檯瞬間就開始飄著抹茶香氣，粗身嘅麵條配上鮮忌廉，小倉紅豆餡齊齊放入口，簡直係好味到停唔到口！不過，由於鮮忌廉會跟著時間嘅流逝而漸漸變暖，所以「登頂嘅Main Point」係要與速度競賽，簡單嚟講，就係要盡量食快啲呀喂。食第一啖會感覺到甜味，不過食完一啖又一啖之後，就可以感受到抹茶獨特嘅香澀味喔！
係咪搞錯Size？份量竟然厚到好似積雪咁⁉
喺搽咗植物牛油嘅法國麵包上，放上較硬嘅小倉紅豆餡，再放一層厚到好似積雪咁款嘅鮮忌廉，視覺衝擊力非常強大。呢個麵包有分大、中2個Sizes，不過如上圖所顯示，中Size嘅份量已經相當驚人，加上售價為1,350日圓（含税），CP值非常高。咬落麵包口感鬆軟，加上甜度適中嘅紅豆餡，相當好味道！不妨與幾位親朋好友Share嚟食，咁就可以輕鬆「登頂」無難度。
「登頂」定「遇難」？結果發表！
今次FUN! JAPAN編集部3人最終係食唔晒，好遺憾地要向大家宣佈我哋係得到「遇難」嘅結果。連勁鍾意食「甜嘢」、自信心爆棚嘅小編M都自我反省地表示「食得太悠閒，唔覺意就經已食飽」。有自信心可以「登頂」嘅人，下次去名古屋嘅話，不妨去挑戰一下「登山」啦！
店鋪資訊
- 店鋪名稱：「Mountain」（マウンテン）
- 地址：愛知縣名古屋市昭和區瀧川町47-86
- 營業時間：09:00〜21:30
- 定休日：週一（如遇公眾假日會照常營業，改為翌日週二休息）、年末年始
- 支付：僅限現金
- 從地下鐵名城線「八事日赤站」徒步8分鐘
- 從鶴舞線「杁中」站徒步10分鐘
命名獨特，無法想像食材嘅壽司店「丸八壽司」
「丸八壽司」位於距離JR名古屋站非常近嘅柳橋中央市場嘅一角。驟眼一望，與一般壽司店好似無咩分別，但再睇真啲放喺入口處嘅餐單招牌，就會發現寫著ABC卷、雪糕卷、龍卷等多款別具一格嘅「壽司卷」。
行入店舖之後，望著貼喺牆上嘅菜單，除咗有「間寬平卷」、「櫻桃小丸子卷」之外，仲有「他人卷」等多款完全唔知係會放咩材料嘅壽司卷。另外，仲有「性騷擾卷」等，多款18禁字眼嘅卷物都可以喺度見到。由於FUN! JAPAN係一個相當健康嘅網站，所以有關18禁字眼嘅卷物介紹就到此為止（笑）。
實際挑戰！「丸八壽司」嘅變種壽司卷
小編想先確認一下一般壽司菜式嘅味道，所以首先係點咗鐵火卷、三文魚卷等幾款普通壽司卷。因為「丸八壽司」位於販售各種鮮魚嘅市場一角，所以無論係邊款食材都相當高質，滿足度非常高。
正式挑戰「變種卷物」！首先出場嘅係「ABC卷」（圖中最前方）與「戶塚帆船卷」，望落普普通通，不過究竟「ABC卷」係包咗咩食材喺裡面？小編走去問完店員之後，得知原來係包咗「蝦」與「維他命C（檸檬）」喺裡面。由於日文「蝦」嘅發音與「AＢ」非常接近，再加上「維他命C（檸檬）」，就變成ABC卷。 「戶塚帆船卷」係一款使用經過敲打嘅鰤魚幼魚(Hamachi)，所製作嘅辛辣壽司。喺日本，有一間叫做戶塚帆船學校嘅補習班，曾經發生過敲打（虐待）小朋友嘅辛辣事件，亦因此使用大量辣椒製作呢款「戶塚帆船卷」。
然後到「雪糕卷」登場啦。顧名思義，壽司裡面係有雪糕喔。雖然呢個組合，令人覺得可行性近乎係零......但其實食落好好味㗎。
小編亦點咗款叫做「剩餘卷」（落ちこぼれ巻き）（圖左）嘅壽司卷，點解會叫呢個名？因為係收集製作手握飯糰、刺身等，並無用到嘅多餘部分所製作而成。因為呢款壽司卷放入多款食材，所以非常抵食！唔會有令人覺得「剩餘」係負面感覺喔。另外，店內仲有多款變種菜式，在場各位如果有信心可以挑戰未知食材嘅壽司卷，就一定要鼓起勇氣，去挑選呢間「丸八壽司」啦！
店鋪資訊
- 店鋪名稱：丸八壽司 站前店
- 地址：愛知縣名古屋市中村區名站4丁目21-5
- 營業時間：24小時（現時為短時間營業，AM10:00～AM05:00）
- 休息日：無
- 支付：僅限現金
- 從JR「名古屋」站徒步10分鐘
- 從地下鐵櫻通線「國際中心」站徒步5分鐘
Comments