如果日本旅行時想四處遊走多個旅遊景點嘅話，少不免會乘搭新幹線與特急列車等進行跨縣移動。喺鐵路旅程中，如果從車窗欣賞美景係為咗保養眼睛嘅話，咁喺車廂內享用美食亦算得上係為保養舌頭喔。今次小編想介紹一下鐵路旅行中，不可或缺嘅「車站便當」（駅弁）相關歷史、人氣便當、以及購買地點等資訊。
「車站便當」係？
「車站便當」係指於鐵路車站和列車內銷售，對象為鐵路旅客嘅便當。除咗有喺白飯上放上好幾款菜色嘅幕之內便當、仲會有飯糰、壽司捲等便當，根據唔同製造商所提供嘅便當種類亦會有所不同。車站便當會為咗防止細菌繁殖，於食材放涼後再塞滿便當盒，所以重點係要使用讓食物無須加熱，可直接享用嘅調味與烹調方法。因此，日本嘅便當唔使翻叮，直接食就已經好好味喔。
現時乘搭新幹線，從東京到新大阪大約需要2小時30分鐘。不過喺新幹線尚未出現嘅年代，利用鐵路作交通工具前往日本各地需要花費更長嘅時間。因此，為滿足車內飲食嘅需求，設計出可以攜帶車站便當，於車廂享用嘅飲食習慣。關於其發源地眾說紛紜，最有力嘅傳聞係栃木縣宇都宮站。1885年7月，日本鐵道（現JR東日本）宇都宮車站開業嘅同時，旅館「白木屋」製作並銷售一款以竹葉包著梅乾飯糰與醃蘿蔔嘅便當，呢個便當被認為係日本車站便當歷史嘅開端。
1889年，日本首次發售，於盒中塞滿米飯與小菜嘅車站便當。當時，山陽鐵路（現JR山陽線）鋪設於兵庫縣姬路嘅原故，喺姬路車站附近經營飲食店嘅竹田木八氏，以乘搭鐵路嘅客人為對象，所銷售嘅「幕之內便當」，被稱為現代車站便當嘅始祖。鹽烤鯛魚、玉子燒、紅蘿蔔、梅乾等13種小菜，再搭配上白飯，呢種便當於當時經已屬於非常奢侈嘅級數。
「車站便當」有邊幾種？
日本嘅車站便當已誕生約140年。現時種類增加到有如天上繁星一樣多，據聞全國各地嘅種類更超過2,000種！不過可以將便當大致分為以下3種――
- 裝滿各種食材嘅「幕之内便當」
- 以牛、雞、豬等肉類為主角嘅便當
- 使用海鮮特產製作嘅海鮮便當
當中除咗有與動畫角色合作嘅便當，亦有食材與容器都相當講究嘅車站便當喔。跟住落嚟小編要介紹嘅車站便當，絕對會令你口水流過不停！
①可以一次過品嚐多款菜色嘅「幕之内便當」
由白飯或飯糰，與多款小菜組合而成嘅經典車站便當。喺歌舞伎中，戲劇和戲劇之間嘅中間休息時間被稱為「幕間」，因為帶有「於幕與幕之間嘅休息時間，所享用嘅便當」之意，而被命名為「幕之内便當」（來源之說可謂眾說紛紜）。小菜嘅菜色有烤魚、天婦羅、玉子燒等和風食材，亦會有漢堡、炸蝦等西式家常菜。
「味DUKUSHI」（味づくし） / 1,150日圓（含税）
瀨戶內產嘅真八爪魚(真ダコ)、淡路島產嘅洋葱、兵庫縣產嘅黑豆等，講究使用當地特產食材去製作嘅「幕之内便當」。另外，包裝上印有產姬路城嘅插圖，亦係旅行獨有嘅回憶之一。
② 親民價就可以嘆到高級品牌牛！以肉類為主角嘅車站便當
除咗有神戶牛、松阪牛、近江牛「日本三大和牛」，亦有使用米澤牛、飛驒牛、宮崎牛等多款品牌牛嘅車站便當。因為價格約為1,000日圓起，非常實惠且選擇多多，想以親民價嘆多幾款高級和牛互相比較一番嘅話，就一定唔可以錯過呢個好機會喔！
「但馬牛 牛肉飯」（但馬牛 牛めし）/ 1,180日圓（含稅）
以關西嘅壽喜燒風烹煮兵庫縣嘅最高級和牛「但馬牛」，再搭配上吸盡日式高湯嘅米飯，令人食欲大增！
「匠之技松阪牛物語」（匠の技松阪牛物語）/ 3,800日圓（含稅）
使用松阪牛與三重縣產嘅越光米，所製作嘅加熱式壽喜燒便當。容器附有加熱用嘅繩索，一拉便可直接加熱，等約5~8分鐘即可享用熱騰騰嘅便當。作為日本首個加熱式車站便當而廣為人知。
「牟太郎便當」（モー太郎弁当）/ 1,500日圓（含稅）
日本首個打開後會播放音樂嘅車站便當。打開蓋後會聽到日本童謠《故鄉》嘅旋律。牛頭形狀嘅外盒，放著黑毛和牛嘅壽喜燒嘅組合相當吸睛。
③ 勁足料！奢侈地加入大量新鮮海鮮嘅車站便當
日本係一個被海包圍嘅島國，一場去到又點可以錯過各縣引以為傲嘅海鮮呢。不妨嘆返個放入勁多蝦與螃蟹嘅車站便當，感受舌尖上周遊日本吧。
「越前蟹肉飯」（越前かにめし）/ 1,380日圓（含稅）
代表福井縣嘅冬天美食，螃蟹料理。加入香箱蟹（即雌性松葉蟹）嘅蟹黃、蟹膏等所烹煮出嘅炊飯，搭配香住蟹碎肉與松葉蟹嘅肥美蟹肉，熱愛螃蟹嘅你，又點可以錯過呢款螃蟹車站便當呢。
※本商品並無使用越前螃蟹。
「越前甜蝦 × 螃蟹合戰」（越前甘えび×かに合戦）/ 1,430日圓（含稅）
甜蝦與松葉蟹嘅夢幻組合，海鮮愛好者絕對會受不了！肥美嘅松葉蟹鉗唔單止夠晒份量，仲相當吸睛！
車站便當可以喺電車上享用嗎？
鐵路誕生於明治時代（1868年～1912年），當時喺人前食飯被認為係無禮貌嘅行為，因此車內飲食曾被批判、禁止。不過，現時並無特別明文規定禁止電車內飲食。因為新幹線、特急列車等以長途行走為前提，所以攜帶食物入車廂嘅乘客亦非常多。話雖如此，記得要注意避免攜帶味道强烈嘅食物，唔好發出太大聲響，要注意車內禮儀。另外，盡量避免於朝早等繁忙擠擁嘅時間，於車內飲食。
對於車廂內嚴禁乘客飲食嘅香港人嚟講，可能會感到意外吧？
「車站便當」可以喺邊度買呢？
除咗鐵路車站之外，日本全國嘅超市、百貨公司、便當專賣店等都可以購買得到「車站便當」。唔知大家喺旅途中，會遇到點樣嘅車站便當呢？
- 各縣主要車站嘅便利店與賣店：
【東京】東京站、新宿站、品川站、上野站等
【大阪】新大阪站、梅田站等
【福岡】博多站等
【北海道】札幌站、函館站等 - 百貨公司舉辦嘅車站便當大會與地方物產展：
京王百貨店、阪神百貨店等 - 大型超市舉辦嘅車站便當展覽會：
AEON、UNY、ITO-YOKADO等 - 車站便當專門店：
位於JR東京站驗票口內嘅「驛便屋 祭 GRANSTA東京」（駅弁屋 祭 グランスタ東京）、位於JR新大阪驗票口內、外嘅「旅便當 鐵路便當NIGIWAI」（旅弁当 駅弁にぎわい）等
另外，喺日本除咗車站便當之外，仲可以喺機場見到以乘搭國內航線嘅乘客為對象，所發售嘅「飛機便當」（空弁）。可以即場買嚟食，亦推薦買返屋企慢慢嘆，或當手信與親朋好友齊齊分享。另外，大部分嘅車站便當都係以冷凍方式作長期保存為前提，記得買嘅時候要留意返保質期限，有唔少係「到購買當日嘅夜晚」喔。
如果有讀者想進一步發掘日本車站便當文化，記得要留言話畀小編知！或會推出試食大會、開箱影片、後續篇…?
Comments