面向太平洋嘅「大洗町」迷人景點多多，除咗有被稱為能量景點嘅「大洗磯前神社」，仲有高透明度大海、美麗海灘相連嘅「大洗陽光海灘」等多個必去景點。另外，因為離海邊非常近，所以可以品嚐到使用新鮮海鮮所烹調嘅豐富美食。今次小編就要介紹一下「大洗」嘅推薦景點。
茨城縣大洗町嘅特徵
大洗町係位於關東地區茨城縣嘅海邊度假勝地，從東京上野站乘搭電車約90分鐘即可抵達。因為面向太平洋，所以可以一邊眺望豐富嘅大自然景色，一邊體驗各式各樣嘅海上活動。除咗有可以品嚐到新鮮海鮮嘅美食景點、日本頂級規模嘅水族館「Aqua World 茨城縣立大洗水族館」、仲有唔少打卡必去嘅好地方，絕對係一個可以享受各種樂趣嘅都市喔。
大洗町係動畫「少女與戰車」嘅舞台
「少女與戰車（ガールズ&パンツァー）」係一套戰車競技動畫，描述女高中生們為咗嬴得使用坦克嘅武道——「戰車道」全國大賽嘅勝利，而共同戰鬥嘅故事，而大洗町正正係呢套「少女與戰車」動畫嘅舞台。作品內亦忠實重現大洗町嘅街道與設施。當你行走於大洗町嘅街道上時，令人彷似親歷動畫其景一樣，相當過癮。另外，大洗鹿島線亦有以「少女與戰車」為主題嘅彩繪列車作不定期運行（運行時間可以喺鹿島臨海鐵路株式會社嘅官方網站確認）。而且，喺大洗町嘅街道上，仲可以買到多款大洗限定嘅原創商品，不妨喺度揀返幾件原創商品返香港做手信啦！
海上鳥居絕景！神聖嘅「大洗磯前神社 」
「大洗磯前神社」供奉著「大己貴命」（亦被稱為大國主神），以及作為拯救萬民於難病嘅神明而被信仰嘅「少彥名」。相傳於856年，御祭神降臨於海中岩礁，因此創建「大洗磯前神社」。另外，作為神聖場地而成為禁足地嘅礁石上，建造咗呢座海上鳥居——「神磯鳥居」。除咗可以喺清晨時分，欣賞到「神磯鳥居」於波濤中，凜然佇立於海上嘅神聖姿態之外，仲可以欣賞到當太陽從海上緩緩升起時，朝陽與鳥居相交織成嘅絕景，可謂美麗到令人陶醉喔。
「大洗磯前神社」嘅祭神係保佑醫療與福氣嘅神明，亦有唔少人為此地所湧出嘅御神水而到訪。曾於16世紀時嘅兵亂被燒毀，並於1730年重建嘅本殿、拜殿等建築物，被指定為茨城縣嘅文化財，係極具歷史價值嘅建築物。
景點資訊
- 地址：茨城縣東茨城郡大洗町磯浜町6890
- 交通方式：從鹿島臨海鐵路大洗鹿島線「大洗站」乘搭巴士「大洗海遊號」約15分鐘，喺「大洗磯前神社下」落車即可抵達
- 開門時間：（4月～9月）5：30～18：00 （10月～3月）6：00～17：00
- URL：https://www.oarai-isosakijinja.net/
打卡影靚相必去景點！大洗陽光海灘「天空之鏡海灘」
以北關東面積最廣闊而自豪嘅「大洗陽光海灘」，係一個可以享受海水浴等海上活動嘅海岸，亦係日本著名嘅遠淺型海灘，潮漲過後3~4小時，海面會化成身一面大鏡，夢幻般嘅水倒影景致美不勝收，海天一色嘅「天空之鏡」秘境海灘瞬間呈現。
當你企喺反映出天空美景嘅神秘水面上，除咗可以影返幾張好似水上漂浮嘅靚相，仲可以加入跳躍動作，拍攝出翱翔天際嘅吸睛畫面喔。就等天空與海洋成為你嘅拍攝背景，影返幾張專屬於你嘅靚相留倩影啦！
景點資訊
- 地址：茨城縣東茨城郡大洗町大貫町地先
- 交通方式：從大洗鹿島線「大洗站」乘搭巴士約10分鐘
大洗町名産品
大洗町一年四季都可以品嚐到新鮮美味嘅海鮮。冬天去大洗嘅話，就一定唔可以錯過象徵冬季美味，美食家都大推嘅「鮟鱇魚」啦！另外，於昔日嘅江戶時代，「鮟鱇魚」曾經係用嚟獻畀將軍嘅高級食材喔。
從春天到初夏期間，可以品嚐到名為「鹿島灘蛤蜊」（鹿島灘はまぐり）嘅大洗品牌化蛤蜊（香港又稱文蛤、沙白），肉身肥大之餘，味道亦顯得份外濃厚。夏天到秋天期間，則可以品嚐到喺寒流與暖流交匯嘅常盤海域附近所捕獲嘅「常盤鰹魚」，脂肪濃厚豐富且味道鮮美，令人一食難忘！
除此之外，仲可以搵到唔少美味名產。小編非常推薦淋上特製蜜漿、黃豆粉嘅大洗糰子甜品「蜜糰子」（みつだんご）。
必住「GLAMP MARE茨城大洗」
無敵太平洋海景就在眼前！置身於「GLAMP MARE茨城大洗」，就可以喺直徑達6米、既豪華又時尚嘅圓頂大帳篷，飽覽大洗海灘嘅無敵大海景。全10間帳篷都被大自然包圍，相當療癒！想要享受一個悠閒舒適嘅露營好時光，就一定唔可以錯過呢間住宿設施啦。
其廣闊面積與優良嘅隔熱性，係令人感到舒適嘅理由之一。寬敞嘅帳篷裡面係以雙重結構所構造，與一般帳篷相比，具有極佳嘅隔熱性。而且所有客房都有配備冷暖兩用空調，一年四季都可以舒適度過。另外，各圓型帳篷嘅旁邊，都有配備專用嘅BBQ空間、淋浴間、廁所。等大家可以擁有私人空間，盡情享受一個舒適寫意嘅假期。
除咗可以享用得到使用當地產嘅豪華食材嘅BBQ同Craft Beer、無酒精飲品等免費無限暢飲服務之外，仲有使用提供天然溫泉嘅包廂服務，係一個可以盡情享受「Glamping Stay」嘅住宿設施。
景點資訊
- 地址：茨城縣東茨城郡大洗町大貫町1212-11（check-in地點）
- 交通方式：從大洗鹿島線「大洗站」搭的士約5分鐘
- HP：https://www.ibaraki-glamping.com/
從東京到大洗町嘅交通方式
從東京「上野站」經由JR常盤線「水戶站」，喺鹿島臨海鐵路大洗鹿島線「大洗站」落車。 所需時間約90分鐘。
Comments