古都「奈良」，唔單止擁有小鹿與大佛，亦係日本食文化嘅發源地，茶、清酒、豆腐等，現時日本飲食中經出現嘅食材，都係發源於此。而家奈良除咗傳承舊時嘅古老味道，仲會從中創造出新嘅美食文化，今次就等我哋齊齊出發去一趟古都味覺巡禮吧。
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
奈良美味優勢
奈良係日本8個非靠海嘅內陸縣之一，盆地地形、溫暖氣候加上日夜溫差大，有助栽培出優質農產物，因此奈良自古農業就已經非常發達，例如大和野菜、大和茶（奈良古稱為「大和」）、水稻等，亦成為支撐日本食文化發展嘅基礎。
奈良嘅農業產量與面積喺日本國內並唔算大，近年亦將農業目標鎖定於多種類、低產量，致力於更多樣化、更獨特嘅農業生產，如1989年開始培育著名士多啤梨品種「古都華」，並持續種植自古傳承落嚟嘅「古代米」，新舊農業並存產生嘅火花，帶畀奈良飲食文化更多面貌。
奈良B級美食
與其他縣相比，奈良嘅B級美食可講相當清淡，肉類比率亦比較少，或者係因為奈良唔少飲食文化都係發源於神社寺院嘅關係吧！今次就等我哋齊齊去探索一下，極具「奈良風」嘅B級美食啦！
茶粥
弘法大師喺9世紀初，從中國帶茶種子返嚟，於奈良縣宇陀市嘅佛隆寺栽種，據聞呢個就係日本茶嘅開端，同時亦係奈良嘅「大和茶」成名嘅原因。
以茶代水煮出嚟嘅粥就叫做「茶粥」，喺1200年前就經已存在，多數用作僧侶飲食，及後漸漸普及於庶民，喺朝早作早餐享用，成為奈良人民嘅日常飲食。不過，現時品嘗茶粥嘅時間已經無分晝夜。
素麵
呢款白細麵條亦係起源於奈良，地點係奈良縣櫻井市三輪地區，喺呢度生產嘅素麵亦稱為「三輪素麵」，從江戶時代就經已廣為人知，甚至被記載於當時嘅美食典籍《日本山海名物圖會》，更被譽為日本第一美味嘅素麵喔。
造就呢款素麵美味嘅原因，係嚟自奈良產嘅優質小麥與製粉技術。素麵本身味道單純，因此適合各種烹煮手法，無論係夏季嘅冷素麵（冷やし素麺） ，抑或係冬天熱湯煮麵（にゅうめん）都超級百搭。
大和肉雞
喺第二次世界大戰前，奈良曾被譽為日本三大養雞地之一，農民除咗正職之外，亦會飼養雞群作副業，造就第一代嘅「大和肉雞」（大和かしわ），脂肪適中、彈性極佳，令大和肉雞風靡關西，但於第二次世界大戰後曾一度消失，及後花費長達8年時間重新培育，並於1982年再度流通市場，呢款重新培育嘅第二代大和肉雞，可以稱得上係珍貴嘅夢幻復活雞肉喔。
天理拉麵
發祥於奈良縣天理市嘅拉麵，特色係使用大量白菜，湯底加入豆瓣醬、大蒜，完成上檯時，會見到一碗接近紅色嘅拉麵出現喺你眼前，但由於辣味被富含水分嘅白菜中和，令人毫無阻礙地食完一啖又一啖，整體嚟講係屬於重口味嘅拉麵。
由於天理市是以宗教「天理教」為名嘅地方，亦有傳聞話天理拉麵係為咗信徒所製作，從而誕生嘅美食喔。
刨冰
日本食刨冰嘅起源，可追溯至奈良時代（710~794年），發源地點就喺奈良。昔日，向皇室獻上冰塊嘅冰室神社，亦被稱為「冰之聖地」。現時，日本製冰相關業者，都將呢座神社奉為信仰中心。
亦因為呢個緣由，近年奈良市內推出多款創新刨冰，甚至有刨冰專門店出現，一舉成為刨冰之聖地。刨冰專門店中最出名嘅就係「寶石箱」（ほうせき箱），堅持以奈良產食材創作出既吸睛又美味嘅刨冰，成為奈良必去嘅名店。
Comments