講起古都「奈良」，除咗大群小鹿與雄偉大佛引人注目之外，對於鍾意日本城池嘅人嚟講，奈良有一座非去不可嘅山城城跡。其難以攻陷嘅險峻地勢，被譽為「日本最強之城」，呢座城就係「高取城」。
天然險要地勢，日本最強之城
所謂「山城」，即係利用山脈天然嘅地形環境，順著其佔地與高度所建造出嘅城池，擁有一定高度，令敵人移動困難，亦難以登高望遠來迅速獲取四遭嘅動靜，係易守難攻嘅城池類型。
日本三大山城為岐阜縣「岩村城」、岡山縣「備中松山城」與奈良縣「高取城」，當中高取城嘅規模最令人驚嘆。高取城最高處本丸與山腳高低差距高達390米，係全日本古城中落差最大。佔地廣闊有成60,000平方米，城牆長約30公里。再加上位於其中嘅33棟門、27座櫓，與3層高天守閣，喺標高583米嘅山頭建造大量大面積嘅建築物，除咗少見之外，根本就係超乎想像犯晒規喔。敵人都仲未開始進攻，心就涼咗一半，實際攻城之後，感到正式絕望，不愧為「日本最強之城」。
逐漸進化之城
不過高取城並非一開始就咁無敵喔。呢度最早係作為另一座城池「貝吹山城」嘅支城，於南北朝時代1332年建立，後來一度於1580年廢棄。1584年其戰略重要性再度被重視，因而重建，並於1589年進行大規模整修，增建天守閣、櫓等建物，防禦等級再提升，正式成為日本最強山城。
最強姿態嘅高取城，接連捱過1600年關原之戰，亦打贏咗1863年嘅天誅組之變（日本幕府末期，由脫藩藩士所發起嘅倒幕武裝行動），尤其喺天誅組之變中僅得2名人員輕傷，再次證實高取城地形嘅高度優勢。
戰國三英傑與高取城
戰國三英傑：織田信長、豐臣秀吉、德川家康，三人都與高取城有些少緣分。
與織田信長係唔多好嘅緣份，因為喺1580年決定廢棄高取城嘅就係織田信長；豐臣秀吉係再生緣份，1585年豐臣秀吉嘅細佬「豐臣秀長」統領高取城，安排重臣「本多利久」擔任城主，1589年進行大規模整修嘅就係本多利久；1640年，高取城嘅統治者換成「植村」一族，植村一族係德川家康嘅親信，管理高取城長達228年，直到明治維新高取城正式廢城，呢座城池嘅最後時光係喺德川勢力下度過。
遺留山林嘅壯大石垣
現時嘅高取城跡並無留下任何建築物，建物大多數隨著無人管理而自然崩壞於山林之中，僅有兩座城門被移築作為寺廟山門與兒童公園入口，其他現存可見嘅遺構，係一座又一座嘅巨大高聳嘅石垣。
雖然現時見到嘅係遺跡，並非完整城池，但經已足夠令人感到驚嘆。高取城嘅巔峰時期究竟有幾強大，雖夢幻但唔難想像。
高取城珍貴，被指定為日本國家史跡，名列日本100名城中，由於位處山間，四季景色如畫，除咗城堡愛好者之外，亦有唔少遊客特地到此一遊。
不過，由於呢度係山地範圍，建議前往時要穿著合適嘅服裝，尤其要準備一對好行又好爬嘅鞋喔！咁先可以充分感受高取城跡嘅美麗，以及高取城嘅險峻。
景點資訊
- 名稱：高取城
- 地址：奈良縣高市郡高取町高取
- 利用時間：隨時可自由參觀
- 交通方式：近鐵吉野線「壺阪山｣站乘搭奈良交通巴士「往壺阪寺」，喺「壺阪寺前」落車徒步約1小時
Comments