2日1夜遊廣島「竹原」，發掘定番＆不為人知的魅力景點！

位於廣島縣嘅「竹原市」有「安芸小京都」嘅稱號，喺江戶時代建造嘅傳統建築自今仍然保存完好，形成咗一個古色古香嘅「街景保存地區」。另外，飄浮喺瀨戶內海上面嘅兔仔島「大久野島」，有大約600隻可愛得意嘅兔仔等住迎接大家，治癒度滿分，同樣係竹原市重點推薦景點！下次嚟廣島縣旅行記得要嚟竹原市參觀一下！

竹原老街保存地區景點推薦：

穿越時空，感受幾百年前的城市風貌「竹原老街保存地區」

「竹原老街保存地區」嘅老街，每個角落都散發住濃厚嘅歷史氣氛，走喺街上面會有種好似穿越咗去幾百年前咁嘅感覺。喺江戶時代後期，好多商家喺呢度以製鹽同釀日本酒起家。街道兩邊一棟棟灰藍外牆嘅建築，正正紀錄住昔日嘅輝煌歷史。當中創業於1863年嘅「藤井酒造」，至今仍然係當地非常有名氣嘅酒廠。佢哋嘅門市除咗有提供日本酒試飲服務，仲有販賣唔少日本酒同酒具，適合愛酒之人嚟買手信。

另外如果中午時段嚟到，推薦到「堀川」享用特色「純米吟釀竹原燒」。堀川原本係當地一間創業自1919年嘅豉油廠，後來佢哋將醬油倉庫其中一部分改建成廣島燒店，所以舖頭懷舊氣氛非常濃厚。「純米吟釀竹原燒」嘅麵糊中，加入咗竹原地區3間酒藏嘅吟釀酒糟嚟整，食起上嚟有淡淡酒糟香，係只有喺竹原地區先食得到嘅限定美食嚟㗎！

竹原老街最特別嘅地方，係直至今時今日為止仍然有唔少居民住喺建築物入面。相反，地區內無乜商業設施或者商店，因此氣氛相對比較閒靜，好適合大家嚟慢慢觀光散步。當然唔止一般遊客會嚟呢度影靚相打卡，甚至由某人氣組合拍攝嘅廣告、NHK晨間劇同時代劇電影都曾經嚟過呢度取景，粉絲們一定唔能夠錯過！

Google Map : Takehara Townscape Conservation Area

https://goo.gl/maps/a29B3Nmd3mWndXpVA

藤井酒造：https://www.fujiishuzou.com/

Google Map :https://goo.gl/maps/spvQHLqPK6vTsuV99

堀川：https://www.horikawa-1919.co.jp/

Google Map : https://goo.gl/maps/n8J5rNWpHasDPLKRA

重拾純真與美好，手製超可愛竹風車「竹原machinami竹工房」

嚟到竹原，「竹」係一個非常重要嘅關鍵字。喺「竹原machinami竹工房」嘅店內，所有嘅竹片精品全部都係由人手製成，每件都非常精緻而且有特色，拎嚟做手信一定唔怕太「行」。如果對自己嘅手工同日文能力有自信嘅話，大家仲可以試下整竹風車或者係小竹籃𠻹！極有經驗嘅導師們會一對一手把手指導，雖然每個步驟都絕對唔算容易，但完成後會非常有滿足感，值得挑戰。工房入面仲有一個放滿咗心形風車嘅秘密景點，如果有時間記得要嚟望下呀！

竹原machinami竹工房：https://tourist-attraction-2136.business.site/?utm_source=gmb&utm_medium=referral

Google Map :https://goo.gl/maps/9WBx1Yimxicur6VF8

入住「NIPPONIA HOTEL 竹原製鹽町」，近距離感受傳統建築美

旅行住酒店住到悶？喺「NIPPONIA HOTEL 竹原製鹽町」住返晚，絕對會帶比你意外驚喜！改建實際使用過嘅舊銀行同舊倉庫而成嘅旅館，外觀雖然保持住傳統面貌，但房內經過徹底翻新，可以住得非常舒服。雖然各種生活用品設備齊全，但客房內唯獨無擺放電視同時鐘，目的就係要大家可以享受老街緩緩流動嘅時光，並忘記日常生活嘅壓力，可以同家人朋友好好一齊放鬆。

呢間旅館仲有同竹原市嘅重要文化財產、百年大宅「舊森川家住宅」合作推出特別早餐套餐，等大家可以喺呢個重要文化財裡面包場享用早餐。早餐使用咗大量竹原當地嘅食材製成，既新鮮、講究又美味。一邊品嚐早餐一邊欣賞大宅內嘅庭園美景，絕對係非常奢侈又難忘嘅體驗！

NIPPONIA HOTEL 竹原製鹽町：https://www.nipponia-takehara.com/

Google Map :https://goo.gl/maps/FLmgTHvwsTwDJ9X6A

大久野島景點推薦：

兔仔迷的天堂「大久野島」

無論你本身鐘唔鐘意兔仔，相信嚟到「大久野島」都一定會比佢地可愛嘅魅力深深吸引！雖然大久野島以前係軍隊製造毒氣嘅基地，但而家已經完完全全改頭換面，變成咗數百隻可愛兔仔自由自在生活嘅地方。如果想多花時間同兔仔慢慢互動，可以喺島上嘅酒店「渡假村大久野島」住返晚，順便享受酒店提供嘅各種消閒活動。

渡假村大久野島：https://www.qkamura.or.jp/sp/ohkuno/

Google Map : https://g.page/kyukamura-ohkunoshima?share

交通方面，大家除咗可以喺忠海碼頭出發之外，亦都可以喺竹原地區觀光完直接喺竹原港乘搭海上的士「Setouchi Cruiser」前往大久野島，船程大概20分鐘左右。天氣好嘅話推薦坐喺露天位置，可以一邊感受海風，一邊全方位欣賞瀨戶內海嘅美景！

預約網站：https://www.asoview.com/item/activity/pln3000036849/

其他推薦：

細嚐天然健康滋味與人情味「農家餐廳西野」

想體驗真正「媽咪嘅味道」，可以到「農家餐廳西野」。呢度嘅特色係有多位當地嘅媽媽坐陣，佢地會以親切態度招呼客人，令人簡直會有好似返咗屋企一樣嘅溫暖感覺！唔單止係咁，呢度嘅料理講求健康同天然，使用嘅米同蔬菜都全部係自家製有機產品，保證客人食得安心。午市時段可以跟住媽媽們手製「日式薯仔燉肉」同「手握飯糰」。從批皮、切塊以至落鑊炒同調味，都要靠大家親力親為。當然一路煮，媽媽們都會在旁指導，甚至有時候可能更會忍唔住幫大家煮埋一份，所以平時少下廚嘅朋友都唔需要太擔心！

預約網站：https://www.asoview.com/item/activity/pln3000036855/

農家餐廳西野：https://www.nouka2474.com/

Google Map : https://g.page/noshino_nouka?share

天然溫泉治癒旅途疲勞「賀茂川莊」

一進入湯坂溫泉「賀茂川莊」館內，首先可以喺大堂欣賞一下日式庭園嘅景致。之後可以揀返件精美浴衣，到大浴場享受天然溫泉！呢度嘅泉質為弱放射能冷礦泉，據講有紓緩神經痛同慢性皮膚病等等功效，正好可以消除旅程中嘅疲勞。由於旅館位置正正就喺廣島縣嘅中心，無論住宿前後要去邊度觀光都一樣方便。只要係旅館周邊15分鐘車程左右嘅距離嘅地方，包括廣島機場同JR竹原車站，旅館都會提供接送服務，相當體貼，有需要就記得喺預約時聯絡旅館喇！

賀茂川莊：https://kamogawaso.co.jp/

Google Map : https://g.page/kamogawaso?share