【食譜影片】重現日本鄉土料理系列④秋田縣：烤米棒鍋

今次嘅重現日本鄉土料理系列要介紹嘅係秋田縣嘅鄉土料理「烤米棒鍋」。使用雞肉與牛蒡，烹煮出清爽鮮甜嘅湯底，「烤米棒」吸收了鮮美湯底後，口感變得更可口綿密，既美味又暖胃。再搭配上皇帝菜清爽嘅香氣，令人食慾大增！不妨跟著以下食譜，挑戰一下自家製「烤米棒鍋」，文章最後仲會有相關嘅製作影片畀大家參考，記得要睇到最尾啦！

日本鄉土料理即係？

鄉土料理係指活用各地區嘅當地特產，結合當地風土民情所烹煮出，長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。

「烤米棒鍋」嘅起源

相信唔少人都會有疑問，究竟「烤米棒」係乜東東？其實「烤米棒」係將白飯搗碎，再捏喺作為芯嘅木棒上，然後燒烤而成嘅米棒。將「烤米棒」放入鍋裡面烹煮嘅料理，就叫做「烤米棒鍋」。

另外，由日本農林水產省所挑選嘅「農山漁村鄉土料理百選」中，「烤米棒鍋」更被選為秋田縣嘅鄉土料理。相傳「烤米棒」起源於冬季獵人「又鬼」，當時「又鬼」會於進行狩獵期間，以「烤米棒」作為儲存食物而隨身攜帶，此舉便成為「烤米棒」嘅起源。

秋田縣北部嘅大館，與鹿角地區周邊被稱為「烤米棒」發源地。當地有個傳統習俗，喺「秋田小町」 (あきたこまち)等新米收成後，為犒賞慰勞喺農務上付出嘅辛勞，大家會相聚圍爐，兼齊齊享用「烤米棒鍋」，而呢個傳統習俗亦持續至今。

秋田縣內嘅學校，「烤米棒」亦被納為冬季嘅校餐菜單之一，極受大家歡迎。

「烤米棒鍋」嘅特徴

通常會於新米收成時期製作，秋田縣北部每年收穫新米後，為犒賞慰勞喺農務上付出嘅辛勞，大家會相聚圍爐，兼齊齊享用「烤米棒鍋」。喺大館市，「烤米棒鍋」唔單止係每個家庭代代相傳，亦係招待客人不可或缺少嘅料理。另外，喺「冠婚葬祭」嘅時候，亦經常以「烤米棒鍋」作招待菜式喔。

「烤米棒」＆「烤米棒鍋」嘅材料（2人份）

「烤米棒」材料

• 溫熱白飯 400g
  
• 水 適量

「烤米棒鍋」材料：

• 雞脾肉（切成一口大小） 200g
  
• 長葱（白色部分） 2條
• 舞茸菇 100g
• 牛蒡 100g
• 水（浸牛蒡用） 適量
• 皇帝菜（又稱茼蒿） 50g
• 蒟蒻絲 120g
• 水（湯底用） 800ml
• 雞粉 1湯匙
• 醬油 3湯匙
• 料理酒 4湯匙
• 味醂 2湯匙

請參考食譜影片嘅製作方法

1. 先製作烤米棒。於磨缽（可以大碗取代）裡放入白飯，用杵棒搗碎至剩餘一半飯粒左右，帶點黏稠度嘅狀態即可。然後雙手沾水，將白飯捏成3個圓柱型飯糰。
2. 拎起即棄筷子，將飯糰捏喺筷子上，由上往下慢慢將飯糰包裹於筷子上。邊於手上沾水邊調整形狀。米棒捏至距離筷子最底部約3cm左右即可。
3. 用中火加熱平底鍋，一邊煎一邊滾動米棒約20分鐘左右，整體煎至微焦即可。
4. 趁熱從筷子中抽出烤米棒：先用乾布輕輕包裹烤米棒，然後㩒住烤米棒底部，再慢慢從筷子中抽出烤米棒。放涼後，斜著切成3等分。
5. 好似批鉛筆咁批出牛蒡絲，再放入水浸泡5分鐘，然後瀝乾水分。
6. 將長葱斜切成約2cm闊嘅葱段。切除舞茸菇底部後，拆成小朵備用。
7. 將皇帝菜切成3cm左右嘅長度。
8. 於砂鍋中放入湯底用嘅水、牛蒡、雞肉、雞粉，輕輕攪拌後蓋上蓋子，以中火加熱。煮滾之後，加入醬油、料理酒、味醂 、蒟蒻絲、步驟④、步驟⑥嘅材料，然後蓋上蓋子，用中火煮5分鐘左右。
9. 喺中火嘅狀態下，放入步驟⑦嘅材料，煮滾即大功告成。