唐吉訶德（香港稱為「DON DON DONKI」，下文簡稱為「DONKI」）係日本最大規模嘅連鎖折扣店，相信大家去日本玩嘅時候，可能都曾經喺店內購物過吧？截至2022年10月，DONKI喺日本國內一共有605間分店(包括系列店），從北海道到沖繩，喺日本各地都可以見到佢嘅身影。DONKI唔單止深受日本人喜愛，亦俘擄唔少外國遊客嘅心。究竟DONKI點解可以擁有咁多粉絲，箇中原因到底係咩呢？今次，編輯部親身前往位於大阪MINAMI區嘅地標之一「DONKI道頓堀店」一探究竟！更加喺度發現全日本只有呢度先至有嘅獨特魅力！係咪好想知道有咩魅力咁獨特呢？咁就一定要將文章睇到尾啦！
魅力①嘆為觀止嘅商品數量
DONKI嘅魅力，在於商品種類豐富又齊全。無論係化妝品、藥品、電器、零食、品牌商品等應有盡有，為外國遊客搜羅一大堆好想要嘅日本手信。從天花板到地板，商品陳列得密密麻麻，喺店內行個圈，簡直就好似喺叢林中尋寶一樣超級興奮。據聞，店內長期都會準備大約4萬至6萬件商品啊！
跟住落嚟，會以大阪嘅DONKI道頓堀店為例，為大家介紹編輯部所發現，富有魅力兼相當過癮嘅商品。樓高6層嘅建築物非常有氣勢，離遠望都可以一眼就認得出係DONKI（至於點解會使用黃色設施，後面將會有詳細介紹，大家千祈唔好錯過啊！）。
最受遊客喜愛嘅手信專區集中於1樓。有唔少好似大阪名物章魚燒風味嘅零食一樣，包裝精美又可愛嘅零食，相當吸睛。據聞，最受歡迎嘅商品，就係日本著名拉麵店嘅麵食商品。
店內亦擺放著極具人氣嘅朱古力零食，而且口味相當齊全。能夠以親民價為遊客提供咁多款唔同種類零食嘅店，喺市區實在好難搵到其他選擇啊。
至於化妝品方面，店舖亦搜羅多款日本各大人氣嘅品牌商品。藥品種類亦非常豐富，除咗一般感冒藥、頭痛藥之外，甚至仲有「DONKI限定」醫藥品。例如鼻炎藥、改善睡眠等藥物，擁有多款令人心動，好想買嚟試用嘅商品。
另外，店內仲有販售名牌袋、手錶等商品，有興趣嘅話記得要Bookmark定，順便去行個圈啦。
魅力②營業時間＆免稅皆到深夜 購物安心不受限
大多數嘅DONKI店鋪皆營業至深夜，更有部分店家甚至係24小時營業。對於想要由朝行到晚嘅遊客嚟講，長時間營業絕對係一個令人非常心動嘅服務。包括道頓堀店在內，唔少DONKI店舖都係位於市區中心位置，方便大家可以喺食完晚餐，返酒飯店前盡情購物，無須擔心時間方面嘅問題。
DONKI仲有另一個貼心服務，就係營業時間內嘅任何時段都會提供免稅服務。想要免稅嘅話，就話畀1樓櫃檯嘅店員知啦！另外，店內亦有可對應中文、英文、韓文嘅工作人員。如果利用視像通話，進行三方傳譯服務嘅話，最多可對應14種語言，令您嘅購物之旅倍加安心！
魅力③每間分店各有特色！設計理念大不同！
下次有機會前往DONKI嘅時候，不妨留意一下每間店舖嘅設計理念與特別嘅設施。今次，編輯部探訪嘅道頓堀店裡面，居然發現有摩天輪嘅存在！而且係全球第一架橢圓形嘅摩天輪，等大家喺購物嘅同時，亦可以享受得到15 分鐘嘅空中之旅。
踏入車廂，坐上座椅之後，摩天輪會先以水平旋轉，道頓堀嘅街景瞬間出現於眼前。隨著摩天輪緩緩上昇，大阪嘅城市風光亦隨即映入眼簾，感覺既新奇又興奮！不過興奮還興奮，正面嘅全玻璃設計實在有少少得人驚……。
摩天輪嘅最高位置，距離地面77.4m，可以喺呢個專屬於您嘅私人空間，盡情眺望令人感動嘅美麗景色！
乘搭「道頓堀摩天輪惠比壽塔」嘅費用為每人 600 日圓，時間從下午4點至晚上 10點。由於行駛日並非固定，建議出發前先上網站查詢相關資訊。
惠比壽塔官網（日語）：https://www.donki.com/kanransha/
去到DONKI簡直就好似喺叢林中探索一樣，既無須擔心時間限制又可以慢慢尋找自己想要嘅商品。除咗可以盡情購物之外，店內仲藏有唔少驚喜位相當過癮，亦係DONKI深受全球各地遊客喜愛嘅原因。想為日本之旅留下美好回憶嘅話，就記得要去DONKI行個圈啦！
唐吉訶德道頓堀店
- 地址：大阪府大阪市中央區宗右衛門町7-13
- 交通方式：地下鐵各線「難波站」徒步5分鐘
- 營業時間：11:00AM～03:00AM
- 定休日：無
Comments