完美重現吉卜力作品世界觀嘅主題樂園「吉卜力公園」，於愛知縣嘅愛‧地球博紀念公園正式誕生。自2020年宣布相關消息後，吉卜力嘅忠實粉絲應該已經急不及待想去朝聖一番吧！日前，官方正式宣布「吉卜力公園」於2022年11月1日（二）隆重開幕。今次FUN! JAPAN編輯部搶先一步進入「吉卜力公園」採訪，帶大家早一步感受「吉卜力公園」嘅獨特魅力！
吉卜力公園簡介
「吉卜力公園」係活用「愛‧地球博紀念公園」嘅廣大範圍，打造出令遊客可以盡情享受於吉卜力作品世界裡面嘅5大主題區。「吉卜力大倉庫」、「Dondoko之森」、「青春之丘」三區會喺11月1日率先開幕，「魔法故鄉」與「魔女之谷」預計於2023年度開放。踏入園區就可以體驗得到，吉卜力作品中嘅主角們氛圍，園區內雖然並無任何遊樂設施，但只要漫遊於森林、小徑中，隨著微風就可以發現藏身各處嘅小秘密。
前往吉卜力嘅世界 就從乘搭「升降機大樓」開始！
位於「吉卜力公園」北口附近，高達30m嘅升降機大樓將帶領遊客們進入吉卜力嘅世界。以《天空之城》、《哈爾移動城堡》等19世紀末奇幻科學世界為設計靈感，其外觀相當引人矚目。
吉卜力大倉庫
一踏入吉卜力大倉庫，迎面而嚟嘅係由彩色繽紛嘅磁磚，拼貼而成嘅中央階梯以及巨大飛天船。
當中最推薦嘅係，重現14部吉卜力作品經典場面嘅「企劃展示室」，令到訪者可以置身其中，化身為吉卜力作品裡嘅經典角色。
進入「企劃展示室」可以欣賞到重現多個作品嘅場景，例如《千與千尋》嘅千尋與「無臉男」搭著電車、《天空之城》裡栢斯用雙手接住從天而降嘅茜黛等經典場景，無論係邊一個場景都可以令您化身成動畫作品中嘅其中一員，與人氣角色齊齊影相留念。
另外，《千與千尋》裡湯婆婆處理工作事務嘅「館長室」，更加係必去景點！真實重現漂浮於半空中嘅文件等，令人瞬間變得與千尋一樣，不禁懷著緊張心情去見湯婆婆喔！
以《天空之城》為設計概念嘅「天空庭院」以及重現《借東西的小矮人亞莉亞蒂》中嘅小矮人世界「地板下的家與小矮人庭院」，每個角落都令人盡情沉醉於吉卜力嘅幻想世界之中。
而影像展示室「獵戶座」則播放著，只有喺東京都三鷹市嘅「三鷹之森吉卜力美術館」先至欣賞得到嘅吉卜力工作室原創短篇動畫作品。
盡情沉醉於《夢幻街少女》世界觀中嘅「青春之丘」
「青春之丘」完美復刻《夢幻街少女》嘅經典場景「地球屋」與圓環廣場，以及《貓之報恩》裡面嘅貓之事務所。
「地球屋」係《夢幻街少女》裡嘅月島雫，與電車上偶遇嘅胖貓‧阿月引導下，偶然嚟到嘅古董店。樓高三層嘅「地球屋」，玄關擺放著男主角天澤聖司嘅單車、外套。包含地下工作室在內，動畫中所描繪嘅地球屋於此處完美重現。一踏入工作室，就會諗起月島雫唱著「鄉村路（Country Roads）」嘅經典場景，瞬間令人不禁心頭一熱。入口喺2樓，1、2樓都設有露台，可以喺度眺望愛‧地球博紀念公園嘅景色。
《貓之報恩》裡嘅重要場景‧「貓之事務所」係以貓咪尺寸所打造嘅木造平房。大人要彎低腰先至可以透過窗戶，望入事務所裡面嘅迷你傢俬與裝飾物品，以及暢談中嘅男爵與胖胖。
會唔會見到龍貓呢？前進「Dondoko之森」
距離「吉卜力大倉庫」徒步約20分鐘路程，就可以抵達《龍貓》裡草子、次子住嗰棟紅色屋頂大屋。呢棟原本專為2005年愛知世界博覽會度身打造嘅展示館，亦完整保留於「吉卜力公園」。配合動畫設定，重現當時嘅生活面貌。大家仲可以喺度一探明信片、廚房、衣櫃裡嘅真實內容，感受一下草子、次子一家和諧，樂也融融嘅居住環境氛圍。
繼續往山頂前進，就會去到「Dondoko之森」。呢個區域係利用周邊擁有豐富生態嘅自然環境，所打造出嘅龍貓世界。據聞只有小朋友先至會見到龍貓，因此喺後山山頂上設有淨係得小朋友先至入到去嘅5ｍ高「龍貓造型木造遊樂場」。只要係小學生以下嘅小朋友，都可以進入龍貓嘅大嘴巴裡面大玩特玩。龍貓擘大個口嘅幽默神情亦超級療癒！
園區內嘅貼心服務！？
由於吉卜力公園各區之間嘅距離比較遠，園方因此喺園內設置免費接駁車。除此之外，仲有來往於「Dondoko之森」山頂與山腳下嘅地面纜車「Dondoko號」，就算推著嬰兒車、輪椅、行動不便嘅遊客都可以輕鬆登頂！
吉卜力公園門票資訊
吉卜力公園目前仍未發售可以暢遊全區域嘅共通套票，必須分區預約與購買。另外，各區皆採取時段預約制，因此必須分區預約與購票。目前只接受日本國內預約，開放海外購票日期未定。
景點資訊
- 景點名稱：吉卜力公園
- 地址：愛知縣長久手市茨之迴間乙1533-1 愛．地球博紀念公園內
- 門票：
- 吉卜力大倉庫
平日：大人 2,000日圓、4歳〜小學生 1,000日圓
星期六、日及日本公眾假期：大人 2,500日圓、4歳〜小學生 1,250日圓 - 青春之丘
大人 1,000日圓、4歳〜小學生 500日圓 - Dondoko之森
大人 1,000日圓、4歳〜小學生 500日圓 - 交通方式：
愛知高速交通東部丘陵線（LINIMO）「愛・地球博記念公園」站落車即可抵達。
於名古屋站・名鐵巴士總站4樓24號月台，乘搭往「愛・地球博記念公園（吉卜力公園）」方向嘅巴士。
於中部國際機場第一航廈乘搭經「藤之丘」往「愛・地球博記念公園（吉卜力公園）」方向嘅機場巴士。
© 2022 GHIBLI PARK Co., Ltd. All Rights Reserved.
© 2022 Studio Ghibli
近期有計劃要去日本玩嘅FUN!JAPAN會員們，就一定唔可以錯過呢個好消息！
外國人都可以預約嘅吉卜力公園門票連酒店住宿嘅套票行程，現正熱賣中！
想喺海外門票開賣前搶先一步體驗吉卜力公園嘅您，記得要預先訂購呢個套票行程啦！
Comments