日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係位於關東地區「茨城縣」。即刻去睇睇擁有著名水戶納豆、早開梅花勝地偕樂園嘅茨城縣，有咩不為人知嘅一面啦！
茨城縣民脾氣暴躁嘅個性係由江戶時代武士文化所演變而成！？
日本有句話叫做「茨城三易」（茨城の3ぽい），係形容茨城縣嘅縣民性，內容係「易怒」（怒りっぽい）、「易忘」（忘れっぽい）、「易厭」（飽きっぽい）。其源由可追溯至江戶時代，當時茨城縣為德川將軍家嘅分家，御三家之一嘅水戶藩長期間統治，「茨城三易」呢個詞語與其藩主「德川光國」（水戶黃門）調皮個性、脾氣暴躁有莫大關係。因當時會以「水戶三好」（水戶の3ぽい），分別為「好辯」（理屈っぽい）、「有骨氣」（骨っぽい）、「易發怒」（怒りっぽい）去形容居住喺水戶地區人士嘅脾氣暴躁之個性，其後，由「水戶三好」演變出「茨城三易」呢個講法。
另外，有唔少人對於茨城縣嘅印象係當地有大量嘅不良青少年，亦喺經常日本「不良青少年人數排行榜」中居上位，呢個結果亦有可能係受到江戶時代時期嘅縣民性所影響吧？
校餐經常出現嘅日本超級食物「納豆」！就連拉麵店、炸雞店、居酒屋菜單都可以見到納豆蹤影
茨城縣水戶市嘅水戶納豆廣為人知，納豆經已成為當地市民嘅餐檯上不可缺少嘅食物之一。日本中、小學等基礎教育學校有提供午餐嘅供餐制度，日文稱之為「給食」（向兒童與學校職員供應午餐嘅制度），而水戶嘅中、小學嘅校餐裡面，納豆係必定存在嘅食物喔。
其實，擁有強烈粘性、味道濃烈嘅納豆，喺其他地區好少會被選為校餐菜式之一，但對於水戶當地人嚟講，卻係一件非常平常嘅事。
大家去到「納豆王國」茨城縣，又點可以唔親身試一試當地嘅納豆美食呢！茨城縣內嘅居酒屋，「納豆菜式」亦非常之多，例如納豆炒飯、納豆茶碗蒸、使用鰹魚出汁製作嘅納豆奄列、加入納豆嘅炸雞、熱狗等美食，多到令人不可置信！就連喺茨城縣內嘅高速公路服務區（簡稱SA），亦可以見到大排長龍嘅納豆拉麵店喔。
另外，仲有於地上掘窿並燃燒禾稈草後放入納豆約2至3日所製作而成嘅「地獄納豆」、將納豆與蘿蔔乾混合於醬油等調味料中醃製而成嘅「Soboro納豆」、將調味好嘅納豆製作成最佳下酒菜嘅「乾納豆」等茨城縣特有嘅納豆美食！有機會記得要去試一試，當地納豆不一樣嘅好滋味啦！
原來係農業王國！？榮登日本哈密瓜產量之冠嘅並非北海道、靜岡，而係茨城縣
講起散發著芳醇香氣，甜美多汁嘅水果女王——哈密瓜嘅產地，相信唔少人首先會聯想到擁有著名夕張哈密瓜、富良野哈密瓜嘅北海道，又或者以栽培高級哈密瓜、皇冠哈密瓜而聞名嘅靜岡縣。但其實茨城縣先至係日本第一嘅哈密瓜產地喔。根據農林水產省嘅統計資料所顯示，茨城縣產嘅哈密瓜出貨量位居全國第一（令和2年度），從平成10年（1998年）開始，連續23年嘅生產量都係日本第一！
當中，以鉾田市最為著名，唔單止栽培出被當地人稱為「春之哈密瓜」，於4月中旬至5月中旬期間嘅哈密瓜收成品種「乙女」、仲有茨城縣原創品種「茨城王」等，市內栽培嘅哈密瓜品種高達9種以上。如果去直銷店嘅話，除咗可以買到多款唔同品種嘅哈密瓜之餘，仲可以品嚐得到哈密瓜雪糕、刨冰等美食！
除咗哈密瓜之外，當地亦盛行栽培其他農作物，例如蓮藕、青椒、小松菜、水菜、小白菜、栗子、芋頭等，亦以其產量之多而聞名，小編推薦大家如果想食得更滋味更道地嘅話，記得要親身去當地嘅直銷店、道之驛行個圈喔。
縣民誤以為係標準語 ⁉紮根於當地嘅茨城方言
茨城縣內經常使用嘅方言係「茨城方言」。
茨城方言屬於無重音聲調嘅方言。其他日本地區縣民面對「同一注音假名卻擁有唔同意思嘅詞彙」，例如「糖（あめ）」、「雨（あめ）」，以及「橋（はし）」、「箸（はし）」等詞彙時，會以唔同音調嚟區分，但茨城方言就無呢個說法。雖然口音特殊，會被認為「說話語氣嚴厲」，但似乎有好多茨城縣民仍然認為「我哋無口音。講緊嘅係標準語」喎。
小編跟住落嚟，將會介紹幾個極具代表性嘅茨城方言。但係要注意嘅係，當你離開茨城縣，去到東京、或其他關東地區嘅話，就算你講茨城方言，大部分人都聽唔明，記得留返喺茨城縣當地使用啦！
1.なんだっぺ（Na-n-da-ppe）
【意思】係咩呢？咩話？（なんでしょう、なんだ）
【例句——茨城方言】 なんだっぺ。そんなこどもでぎねの？（Na-n-da-ppe.So-n-na-ko-do-mo-de-gi-ne-no？）
【例句——標準語】 なんだ。そんなことも出来ないの？（Na-n-da.So-n-na-ko-do-mo-de-ki-nai-no？）
【例句嘅中文意思】 咩話？你竟然連呢樣嘢都做唔到？
2.青なじみ（A-o-na-ji-mi）
【意思】瘀青（青あざ）
【例句——茨城方言】青なじみになっちった。（A-o-na-ji-mi-ni-na-chi-tta.）
【例句——標準語】青あざになってしまった。（A-o-a-za-ni-na-te-shima-tta.）
【例句嘅中文意思】瘀咗添。
3.いがっぺ（I-ga-ppe）
【意思】幾好吖（いいんじゃない）
【例句——茨城方言】その服、いがっぺよ。（So-no-fu-ku,I-ga-ppe-yo.）
【例句——標準語】その服、いいんじゃない？（So-no-fu-ku,I-in-ja-nai?）
【中文意思】嗰件衫幾好吖。
4.ごじゃっぺ（Go-ja-ppe）
【意思】廢物、馬馬虎虎、廢柴等，可使用於形容人、或物件
【例句——茨城方言】ずいぶんごじゃっぺな車だごど。（Zu-i-bu-n-go-ja-ppe-na-ku-ru-ma-da-go-do.）
【例句——標準語】ずいぶんダメな車だなあ。（Zu-i-bu-n-ta-me-na-ku-ru-ma-da-naa.）
【例句嘅中文意思】架車真係好廢呀。
相關文章：
- 【日本47都道府縣特輯：鳥取篇】砂丘愛好者&必試美味咖啡盡在鳥取！
- 【日本47都道府縣特輯：山梨篇】原來全日本最鍾意食壽司嘅係山梨縣民！？
- 【日本47都道府縣特輯：石川篇】石川縣皮膚好嘅女性人數係日本榜首？究竟「美肌第一縣」嘅秘密係…？
- 【日本47都道府縣特輯：神奈川篇】逃離東京、移居神奈川嘅日本人正激增中！？
- 【日本47都道府縣特輯 Vol.1】 北海道不存在「小強」！？盤點日本全國城市傳聞 ～北海道篇～
- 【日本47都道府縣特輯 Vol.2】 沖繩人遲到係家常便飯！？盤點日本全國城市傳聞 ～沖繩篇～
- 【日本47都道府縣特輯 Vol.3】 千祈唔好輕易相信京都人嘅稱讚說話！？盤點日本全國城市傳聞 ～京都篇～
- 【日本47都道府縣特輯 Vol.3】 大阪每個家庭都有一部章魚燒機是常識吧！盤點日本全國城市傳聞 ～大阪篇～
- 【日本47都道府縣特輯 Vol.5】 邊個話奈良只得鹿！盤點日本全國城市傳聞 ～奈良篇～
- 【日本47都道府縣特輯 Vol.6】福岡縣點解特別多靚仔靚女！？盤點日本全國城市傳聞 ～福岡篇～
- 【日本47都道府縣特輯 Vol.7】買地就送森林 ！？盤點日本全國城市傳聞 ～佐賀篇～
- 日本47都道府縣特輯 Vol.8 鹿兒島篇「鹿兒島縣的〇〇好厲害！」
- 日本47都道府縣特輯VOL.9 「千葉縣民以縣嘅〇〇為榮，無得輸！」
- 日本47都道府縣特輯Vol.10 「愛知嘅○○好厲害！」
- 日本47都道府縣特輯VOL.11 栃木篇「栃木縣嘅○○好厲害！」
- 日本47都道府縣特輯VOL.12 兵庫篇「與其話係縣民特質、倒不如話係為市民特質？兵庫縣縣民人人都憧憬神戶市？」
- 日本47都道府縣特輯Vol.13 熊本篇「熊本縣的○○很厲害！」
- 日本47都道府縣特輯Vol.14 長崎篇「長崎的○○很厲害！」
- 日本47都道府縣特輯Vol.15 群馬篇「群馬嘅〇〇好厲害！」
- 日本47都道府縣特輯Vol.16 埼玉唔老土嘅「埼玉都(?)民」傲氣
Comments