講到愛知縣，通常大家都會直接聯想到其最大城市「名古屋」，然後就會開始爭論究竟名古屋好唔好玩？當中，「愛知縣美食」嘅實力絕對係無容置疑！今次就等我哋齊齊去探索一下，位於日本中部地區「愛知縣」嘅B級美食啦！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
愛知縣美味優勢
有別於關東嘅醬油文化、關西嘅高湯文化，位於日本中部地區交通要塞嘅愛知縣為「味噌文化」，而且係口味比較重、發酵時間比較長嘅「八丁味噌」。八丁味噌發源於愛知縣岡崎市八帖町，因為呢個地方嘅舊名叫做「八丁村」，味噌亦因此被命名為八丁味噌。據聞八丁味噌嘅誕生可追溯至南北朝時代（1337~1392年），於安土桃山時期（1568~1603年）確定已經有持續生產。其後邁入江戶時期（1603～1867年），岡崎市為水陸交通嘅重要要塞，往南北有水路矢作川，往東西有陸路東海道，交通可謂相當方便，因此大豆、鹽等味噌製作原料輕而易舉便可入手，同時擁有矢作川優良水源與溫暖氣候，造就製造味噌嘅絕佳環境，令八丁味噌發展更加蓬勃。
岡崎同時亦係德川家康嘅誕生地，八丁味噌亦備受德川家康嘅喜愛，其後德川家康統一天下，並以江戶（現時嘅東京）為據點嘅同時，八丁味增亦沿著東海道傳入關東，一躍成為聞名全國嘅味噌喔。
愛知縣B級美食
除咗知名美食「鰻魚飯三吃」、喺台灣根本唔存在嘅「台灣拉麵」（於名古屋開設台灣餐廳嘅台灣人所發明之辣味拉麵），今次小編將會介紹完美融合味噌嘅美味，以及當地人喜愛嘅愛知縣B級美食。
味噌豬扒（味噌カツ）
愛知味噌文化嘅代表性美食就係「味噌豬扒」，喺炸得金黃酥脆嘅豬扒上，淋滿以八丁味噌所製作，呈深啡接近黑色嘅味噌醬汁之美食。每間店家都係以八丁味噌為基底，加入砂糖、高湯等調配出自家製嘅獨家味噌醬汁配方。
醬汁唔單止望落顏色比較濃，食落味道亦相當濃厚。八丁味噌特有嘅豆味、酸味，與炸豬扒一同品嚐之下顯得更滋味，味道更出色，簡直係絕妙嘅搭配喔。關於呢款經典美食嘅誕生地與時間，流傳著多種講法，四散於名古屋市各地，但無論係邊種講法，都有再三強調八丁味噌嘅好味道。
味噌關東煮（味噌おでん）
一般嘅「關東煮」（おでん）係於高湯中烹煮至入味，到要食嘅時候再撈起鍾意嘅配料，按個人喜好淋少少湯、搭配和風黃芥末品嚐，但係愛知縣嘅食法就完全唔同！並非搭配湯、黃芥末，而係搭配味噌醬料享用，仲會喺放滿關東煮食材嘅砂鍋中間，放置一盤以八丁味噌為基底所製作嘅味增醬料，方便大家隨時點嚟食喔。
亦有另一種烹煮法係直接將食材倒入味噌高湯，將食材煮到從裡到外都充滿著濃厚嘅味噌好滋味，顏色呈深啡色，望落就好似八丁味噌咁濃厚。
土手煮（どて煮）
與味噌關東煮類似，都係將食材以濃厚味噌高湯烹煮入味，不過食材以牛豬內臟為主，有時亦會加入蒟蒻與水煮蛋等材料，烹煮至入味，係愛知縣各居酒屋嘅必備小菜。
小倉紅豆吐司（小倉トースト）
除咗味噌文化，愛知縣另一個有名嘅飲食文化就係「早餐文化」，縣內嘅喫茶店、Café等，都有喺早晨時段提供點咖啡、送吐司嘅早餐服務，而送到上餐枱嘅就梗係「小倉紅豆吐司」。
新鮮出爐嘅吐司，再加上牛油與極具厚度嘅紅豆餡，就係小倉紅豆吐司，據聞呢個食法係發源於1921年，正值處於和洋交融風氣嘅大正時代，喫茶店「満つ葉」（MATSUBA）嘅店主，見到有學生客將吐司浸入紅豆湯（ぜんざい）之後先至入口，因此靈機一觸，創造出小倉紅豆吐司。
炸蝦（エビフライ）
愛知縣民對蝦情有獨鍾，加上位於愛知縣南部嘅三河灣，係全國屈指可數嘅虎蝦產地。因此喺愛知縣各種慶祝場合中，用蝦製作嘅菜式可謂無處不在，當中，以炸蝦最為當地人熟悉。除咗可以喺喫茶店、洋式餐廳、居酒屋等見到炸蝦菜單，甚至仲會有任食炸蝦嘅專門店（エビフライ食べ放題）。
愛知縣炸蝦美食嘅知名度瞬間提高嘅原因係，日本知名搞笑藝人「TAMORI」（タモリ）曾經喺節目上惡搞名古屋人嘅炸蝦讀法，雖然實際上名古屋人嘅炸蝦讀法與其他地方一樣，並非如「TAMORI」所講得咁奇怪，但名古屋與愛知縣嘅炸蝦印象，確實因此傳遍全日本。
雞蛋煎餅（玉せん）
將炒蛋或煎蛋等配料夾入蝦煎餅中，就係「雞蛋煎餅」，係一款喺愛知縣嘅祭典、古早味十足嘅「駄菓子屋」經常出現嘅小食。除咗蛋之外，有時仲會出現炒麵，甚至係章魚燒等配料喔。
其實關西地區亦有一款同樣叫做雞蛋煎餅（たまごせんべい）嘅常見小食，兩者嘅不同之處在於關西地區係使用半熟蛋與普通煎餅去製作；而愛知縣係使用接近全熟嘅雞蛋，以及蝦煎餅去製作呢款雞蛋煎餅。
另外，關西地區係為咗減少垃圾，而發明以煎餅取代承裝容器嘅雞蛋煎餅；愛知縣係為咗回應小朋友「想食燒烤過嘅煎餅」嘅請求，雞蛋煎餅先至就此誕生。
Comments