講到福井縣嘅日本100名城，相信大部分人都會最先聯想到現存12 天守之一嘅「丸岡城」吧？但其實福井縣仲有一座遠比丸岡城歷史悠久嘅城池，就係位於山谷河畔旁，曾經擁有繁華廣大嘅城下町，甚至曾經被稱為「北陸小京都」嘅城池「一乘谷城」。
超出想像嘅山城「一乘谷朝倉氏遺跡」
名列日本100名城嘅「一乘谷城」，其實係屬於「一乘谷朝倉氏遺跡」嘅一部分。「一乘谷朝倉氏遺跡」所在地嘅「一乘谷」，係距離福井市東南方約10公里，沿著一乘谷川南北長3公里，東西長500米嘅狹長細小谷地。
一乘谷東、西、南三方皆被山谷圍繞，北方係足羽川，擁有天然要塞作防衛，足羽川嘅支流一乘谷川係作為相當方便嘅交通手段之一，與大野市等地相鄰亦形成易守難攻嘅優勢，於戰略上佔據一大重要席位。因此於戰國時期1467年，統領著越前國（現福井縣）嘅大名「朝倉氏」以一乘谷被作為據點，第7代當主「朝倉孝景」築起城池、武家屋敷、寺院等，將一乘谷周邊發展成工商皆有嘅繁榮城下町。
100年後嘅1573年，朝倉氏被織田信長所滅，城下町被燒毀。1967年進行挖掘調查，現時一乘谷被列為「一乘谷朝倉氏遺跡」。
日本最大規模，中世時代遺跡都市
雖然當時被織田信長一把火燒毀，但於挖掘調查後發現，面積達278公頃嘅一乘谷朝倉氏遺跡，竟以完整嘅狀態沈睡於黃土之下，係極為珍貴嘅中世紀時代遺跡都市（日本中世時代：12世紀末～16世紀末），並出土多樣珍貴文物。
因此，一乘谷朝倉氏遺跡被指定為國家特別史跡，當中，庭園遺跡被指定為特別名勝，大量文物被指定為重要文化財。同時擁有國家三重指定嘅地點，全日本只有6個地方。一乘谷朝倉氏遺跡亦唯一位於北陸嘅史跡，可見一乘谷朝倉氏遺跡嘅珍貴性。
（其他5個地方為：京都金閣寺、京都銀閣寺、京都醍醐寺三寶院、奈良平城宮、廣島嚴島神社）
深受京都薰陶，北陸小京都
京都府與福井縣地理位置相連，一直以嚟雙方交流往來頻繁，甚至有一條名為「鯖街道」嘅相連街道，專門運輸福井若狹灣嘅漁獲至京都，當中佔最高比率嘅海鮮為鯖魚（青花魚），因而得名「鯖街道」。
朝倉氏統治下嘅越前國，繁榮一時，吸引唔少京都、奈良貴族、僧侶等知識份子前往交流拜訪，亦因此傳入唔少京都文化，曾獲封「北陸小京都」之稱。朝倉第11代「朝倉義景」特別關心文藝活動，自己本身繪畫、和歌水準亦非常高，可以想像得到一乘谷當時嘅文化氣息係幾咁濃厚喔。
文化嘅象徵，四大庭園遺跡
「庭園」係和歌會、茶會等，代表著京都文化活動嘅舉辦地點，因此從一乘谷朝倉氏遺跡中，發現4個庭園遺跡，足以感受到當時朝倉氏相當重視文藝範疇。
朝倉館遺跡庭園、諏訪館遺跡庭園、湯殿跡庭園、南陽寺遺跡庭園，為以上提及到嘅4個庭園遺跡，合稱為「一乘谷朝倉氏庭園」。朝倉館係朝倉義景嘅居所，除咗有起居建築之外，仲會有日本最古老嘅花壇，壯觀嘅庭園石造景；諏訪館係朝倉義景妻子「小少將」嘅居所，擁有嘅庭園面積係最大規模；湯殿跡庭園係當中最古老嘅庭園，風格與其他三者完全唔同；南陽寺係第9代當家「朝倉貞景」為女兒重建嘅尼姑寺，庭園擁有三段式瀑布嘅石造景，相傳更擁有美麗嘅枝垂櫻，1568年，當時室町幕府第15代將軍「足利義昭」（亦係最後一代）仲喺度舉辦過賞櫻會。
2020年NHK大河劇《麒麟來了》中，亦曾重現一乘谷朝倉氏嘅夢幻庭園景色。
朝倉氏夢幻百年
朝倉氏建構嘅一乘谷城下町，和平繁榮僅維持約100年，呢100年彷如夢境般，瞬間消失於火花之中。現時一乘谷朝倉氏遺跡中所見到嘅建築物，都係重建而成，完整復原部分城下町，重現當時武家屋敷與町屋嘅街道景觀。
最出名嘅唐門，係從朝倉義景嘅菩提寺松雲院移築過來，旁邊正係一棵櫻花樹，每逢春季綻放，如詩似畫嘅景致，彷彿訴說著朝倉義景對繪畫詩歌嘅熱愛真誠。
景點資訊
- 景點名稱：一乘谷朝倉氏遺跡（一乘谷城）
- 地址：福井市城戶之内町
- 交通方式：從JR福井站乘搭「越美北線」約15分鐘於「一乘谷站」落車
- 營業時間：24小時
- 門票：免費
景點資訊
- 景點名稱：一乘谷朝倉氏遺跡 復原城下町區（復原町並）
- 地址：福井市城戶之内町
- 交通方式：從JR福井站乘搭「越美北線」約15分鐘於「一乘谷站」落車
- 營業時間：每天9:00～17:00（16:30最後入場）
- 定休日：年末年初（12月28日～1月4日）
- 門票：每人330日圓
2022年10月新開幕！一乗谷朝倉氏遺跡博物館
一乘谷朝倉氏遺跡至今已進行50年以上嘅發掘調查，出土大量文物，為咗可以令更多人了解呢個珍貴遺址，福井市打造出全新嘅「一乗谷朝倉氏遺跡博物館」，以原尺寸重現朝倉館、城下町模型、遺址展示室等，可以令參觀者以更近距離認識朝倉氏嘅夢幻百年。
景點資訊
- 景點名稱：一乗谷朝倉氏遺跡博物館
- 地址：福井縣福井市安波賀中島8-10
- 交通方式：從JR福井站搭乘「越美北線」約15分鐘於「一乘谷站」落車，步行3分鐘
- 營業時間：每日9:00～17:00
- 定休日：每週一、年末年初（12月29日～1月2日）
- 門票：成人700日圓、高中生400日圓、中小學生200日圓、70歲以上350日圓
- ※目前需事先預約方能入館
Comments