係秋天吖！紅葉嘅季節又來臨啦！
踏入11月，一年一度賞紅葉季節即將迎來最佳觀賞期。繼小編之前喺櫻花季節時，撰寫過一篇【遊日懶人包】港人遊日不失禮！出發賞櫻前必知禮儀與必備物品嘅文章之後，今次輪到秋天紅葉篇，同大家介紹去日本賞紅葉前，不可不知嘅基礎知識全攻略！
無論係第一次去日本賞紅葉，抑或係已經多次去日本擁抱紅葉嘅常客，不妨將呢篇文章當做去日本賞紅葉前嘅預習或複習，細閱一番吧！
日本紅葉嘅觀賞期係？
計劃日本賞紅葉行程之前，首先要把握好日本各地紅葉嘅最佳觀賞期。往年紅葉嘅觀賞期如下：
- 北海道・東北地區：10月上旬～11月下旬
- 關東甲信・東海地區：11月下旬～12月上旬
- 近畿、中國、四國、九州地區：12月上旬～12月中旬
不過，紅葉嘅進展情况會根據每年嘅氣候條件而有所不同，建議喺出發前先確認各個地方所發表嘅紅葉觀賞期預測。
小編想同大家分享一下超好用兼具代表性嘅查氣象網站，就係日本氣象協會官方嘅天氣預報專門媒體「tenki.jp」、以及株式會社Weathernews.jp運營嘅「weathernews.jp」，每年10月上旬開始，就會上載全國各地紅葉名勝觀賞時期嘅地圖解說，並於季節期間頻繁更新最新資訊，大家想知道紅葉觀賞預測資訊嘅話，記得去上述網站參考一下啦。
相關文章：
喺眾多紅葉名勝中，位於北海道大雪山國立公園，海拔2,291m嘅旭岳，以「日本最早可以賞紅葉嘅景點」而廣為人知，竟然從8月下旬開始變色，每年9月中旬就可以欣賞得到全國最早出現嘅紅葉景致。
另一方面，靜岡縣熱海市熱海梅園嘅紅葉，被稱為「日本最遲開嘅紅葉」。11月下旬至12月上旬係最佳觀賞期，早開嘅梅花從11月中旬左右開始開花，如果時間配合得啱啱好嘅話，仲可以同時欣賞到紅葉和梅花喔。
景點資訊
- 名稱：熱海梅園
- 地址：靜岡縣熱海市梅園町8-11
- 交通方式：乘搭JR熱海站開往「梅園・相之原方向」嘅巴士約15分鐘，從「梅園」巴士站徒步約2分鐘
紅葉嘅開始時期，根據不同地域而有所不同。從晚夏到初冬，全國各地都可以欣賞到紅葉景致，記得根據返自己嘅旅遊時期，去决定賞紅葉嘅旅行目的地吧。
相關文章：
「紅葉前線」係？常用嘅紅葉相關用語5選
决定好旅行目的地，機票、酒店住宿都預約好，萬事俱備只欠收集資訊嘅話，就一定要Bookmark低可以大派用場嘅紅葉相關用語啦。記住日本媒體經常使用嘅用語，嚟搜尋最新嘅紅葉資訊吧。
狩獵紅葉（もみじがり / Mo-mi-ji Ga-ri）
日本現存最古老嘅和歌集《萬葉集》當中，就已經有提到「狩獵紅葉」，即「去賞紅葉」嘅意思。關於「狩獵紅葉」亦流傳著另一種講法，古代貴族將喜歡大自然比喻為「狩獵」，因此寫上含有狩獵意思嘅日文漢字「狩」。
紅葉前線（もみじぜんせん/ Mo-mi-ji Ze-n-se-n）
將紅葉、銀杏嘅紅葉時期與場所，連接成線狀便稱之為「紅葉前線」。日本紅葉前線於10月上旬左右由北海道開始，然後一直往南，至12月上旬左右會抵達鹿兒島。（因為沖繩屬於亞熱帶氣候，全年氣候溫暖，所以只會出現部分變紅嘅植物，好難會見到紅葉）
其實除咗「紅葉前線」，亦有於春天櫻花季節時，連接日本各地櫻花開花預測日嘅「櫻花前線」（櫻花前線/Sa-ku-ra Ze-n-se-n）一詞喔。
日本紅葉名所100選（にほん こうよう の めいしょ ひゃくせん / Ni-hon Ko-u-yo-u no Me-i-sho Hya-ku-se-n）
從日本觀光協會於2010年選出全國約680個紅葉名勝景點，以及出版社「主婦友社」據此精選出「日本紅葉100選名勝 」。當中，包括宮城縣鳴子峡、東京都高尾山、香川縣寒霞溪等地點。
櫻花紅葉（さくらもみじ / Sa-ku-ra Mo-mi-ji）
新瀉縣・新瀉市嘅櫻花紅葉
©新潟観光コンベンション協会 / ©Niigata Visitors & Convention Bureau
櫻花紅葉係指櫻花葉於秋天變成紅色嘅狀況。櫻花一向帶畀大家「春天」、「粉紅色」等固有印象，但實際上櫻花嘅葉子亦係紅葉。當中，遊客熟悉嘅染井吉野櫻，被稱為比其他櫻花紅葉更美麗嘅品種喔。
青紅葉（あおもみじ / A-o Mo-mi-ji）
雖然係叫做「青（Blue）」紅葉，但其實係指5月到7月，仲未變成紅葉嘅綠色楓葉。特別係京都府嘅京都車站周邊、祇園、清水寺、嵯峨野・嵐山等，有唔少青紅葉嘅名勝地。另外，於新綠季節時期遊客雖然比較少，不過近年來，以享受初夏風景而特地前往嘅旅遊愛好者亦有所增加。
景點資訊
- 名稱：八幡市立松花堂庭園・美術館
- 地址：京都府八幡市八幡女郎花43-1
- 交通方式：從京阪電車「石清水八幡宮站」駕駛出發約10分鐘
必讀紅葉小知識①：「紅葉=紅色嘅葉」係錯誤觀念！？
各位正在學日文嘅FUN! JAPAN讀者們要注意，由而家開始會致深入發掘，對紅葉進行相關解說喔。
日文中嘅「紅葉（Red leaves）」，係指從秋天到冬天，植物嘅葉子變色現象。雖然使用漢字「紅」一字，會令人潛意識認為係講緊「紅色嘅葉子」。但其實，日文「紅葉」所指嘅葉子，並唔一定係紅色。
一般情况下，葉子變成紅色嘅時候，日文漢字會寫成「紅葉（こうよう / Ko-u-yo-u）」，當葉子變成黃色嘅時候，日文漢字會寫成「黄葉（こうよう / Ko-u-yo-u）」。而「紅葉」一詞含意相當廣泛，以泛指所有秋天至冬天，3種變色葉子嘅總稱，分別係「紅葉」、「黄葉」、以及咖啡色嘅枯葉 「褐葉（ka-tsu-yo-u）」，簡單嚟講，「紅葉」一詞就係指植物葉子嘅變色現象。
必讀紅葉小知識②：原來「紅葉（こうよう / Ko-u-yo-u）」與「紅葉（もみじ / Mo-mi-ji）」係唔一樣？
相信學緊日文嘅FUN! JAPAN讀者們，都會有見過日文漢字「紅葉」，仲有另一種讀法「もみじ / Mo-mi-ji」。可能唔少人都會覺得只不過係讀法唔同，意思係完全一樣吧？其實「もみじ / Mo-mi-ji」基本上係稱呼植物本身，並不包含變色現象嘅意思。
順帶一提，「もみじ / Mo-mi-ji」亦係「鹿肉」嘅隱語（只有朋友先會明白嘅言語與措辭）。
必讀紅葉小知識③「紅葉（もみじ / Mo-mi-ji）」與「楓葉（かえで / Ka-e-de）」到底有咩分別？
由於外形相似，「楓葉（かえで / Ka-e-de」經常與「紅葉（もみじ / Mo-mi-ji）」混為一談，但其實喺植物學嘅分類上，紅葉係楓葉嘅一種，兩者都係楓科楓屬植物。日本人一般會以葉子嘅切口深淺度去區分兩者，切口深嘅係「○○紅葉」，切口淺嘅係「○○楓」，並無明確區別條件，亦只有日本人先會咁詳細區分紅葉與楓葉。
葉子切口深（左）被視為係紅葉，加拿大的國旗嘅葉子切口淺（右），被視為楓葉。
同場加映：原來銀杏都係「紅葉」？
作為秋天風物詩，紅葉（autumn leaves）時期仲可以欣賞得到另一美景，就係金黃色嘅銀杏樹啦。被分類為銀杏科銀杏屬，與「紅葉（もみじ）・楓」並非相同分類。因為其葉子轉變成「黄葉（こうよう / Ko-u-yo-u）」嘅狀況，被稱為「紅葉」。
如前所述，當葉子變黃時，漢字寫作「黃葉」並非「紅葉」，並使用「紅葉（こうよう する / Ko-u-yo-u su-ru）」呢個日文寫法。即使發音相同，漢字稍微不同意思亦有所不同，日文真係令人又愛又恨喔！
Comments