日本嘅傳統文化——茶道中不可或缺嘅「抹茶（Matcha）」，除咗紅遍日本之外，喺海外更被稱為「超級食物」而備受歡迎。皆因抹茶中含有多種維他命、礦物質等營養素，無論係對美容、身體健康等都相當有益處，營養價值非常高。
另外，由於抹茶與多種食材嘅味道都好夾，因此除咗飲用之外，仲會用嚟整唔同嘅菜式、甜品等各種美食，被廣泛使用。今次小編要為大家介紹嘅係「抹茶豆腐蛋糕」食譜，簡單免焗又易整。
喺介紹食譜之前，首先了解一下「抹茶」究竟係何方神聖，以及當中所含嘅營養價值。介紹完畢後，除咗會有文字食譜記載，仲會有附上字幕嘅食譜影片，記得睇完之後，不妨跟住食譜試試落手整返個抹茶豆腐蛋糕啦！
抹茶係？
抹茶係由「碾茶」研磨而成嘅粉末狀茶品。
碾茶嘅培育方法有別於普通茶葉，茶樹園會使用「蘆葦棚」（用蘆葦織成嘅遮陽棚）等特殊遮陽方式，用以覆蓋抹茶，避免茶葉受猛烈陽光直接照射。據說培育出嘅碾茶，比普通茶葉更多柔嫩嘅新芽葉片，更甘甜更好滋味。將碾茶嘅茶葉，以茶臼等磨成粉末狀後，就成為廣為人知嘅抹茶啦。
抹茶含有嘅營養成分
抹茶富含兒茶素、維他命C、維他命E、食物纖維、礦物質等營養，而且抹茶係將茶葉直接磨成粉飲用，因此身體所吸收嘅營養成分，比起放茶葉入茶壺再用熱水沖嚟飲嘅煎茶多更多。
皆因茶葉中含有嘅食物纖維、維他命、 β-胡蘿蔔素等營養素難以溶於水中，而抹茶係由茶葉研磨而成嘅粉末狀茶品，換句話說，飲抹茶就等於將被粉碎嘅茶葉齊齊飲落肚，所以除咗屬於水溶性嘅維他命C等之外，仲可以攝取難以溶於水中嘅營養素。
抹茶嘅相關介紹就到此為止，即刻去睇睇「抹茶豆腐蛋糕」嘅製作方法吧！
食譜影片請參考（附有CC字幕）👇👇👇
「抹茶豆腐蛋糕」材料
- 豆腐…160g
- 抹茶粉…1湯匙
- 雞蛋…1隻
- 砂糖…1湯匙
- 低筋麵粉…1湯匙
- 糖粉…適量
- 藍莓果醬…適量
＊醬料可以隨意配搭，不妨揀返幾款鍾意嘅果醬或朱古力醬自由配搭喔♪
「抹茶豆腐蛋糕」製作方法
- 於耐熱容器中，倒入豆腐、雞蛋、砂糖、低筋麵粉、抹茶粉、然後攪拌至光滑。
- 倒入另一個耐熱容器中。
- 以600W微波加熱約5分鐘。
- 待冷卻後，放入雪櫃雪1小時左右。
- 雪完之後從耐熱容器中取出蛋糕、灑上糖粉。
- 放上果醬、即大功告成。
Comments