【日本東京】勁抵買免稅店推介！去東京・阿美橫町「二木菓子」爆買手信！

「二木菓子」唔單止有多款大容量包裝零食，仲有提供免稅服務，絕對係買手信畀親朋好友嘅好地方！

除咗想搵廣為人知嘅著名日本零食之外，仲想將創意十足嘅驚喜零食帶返香港，同親朋好友或屋企人開心Share？咁就一定唔可以錯過「二木菓子」啦！今次，FUN! JAPAN編輯部親身去到「二木菓子」進行實地採訪，為大家報導箇中魅力。

「二木菓子」係？

「二木菓子」創業於1947年，係一間進行零食批發和零售嘅店舖，唔單止價錢實惠，商品種類相當豐富，仲可以搵得到日本一般超市，並無販售嘅超大容量商品喔。

除咗東京・阿美橫町之外，東京都、埼玉縣、千葉縣亦設有店鋪。另外，於阿美橫町等部分店鋪更可享免稅優惠服務，等大家可以大買特買。

首先要同大家介紹「二木菓子」嘅係1號店——「二木菓子第一營業所」。

「二木菓子第一營業所」有兩層樓層，除咗陳列著糖果、朱古力等經典零食之外，仲有日本人氣下酒菜「珍味」（將魷魚等魚貝類加工，經過乾燥等方式所製成嘅食品）等，總共販售約5,000種商品，不禁讓人感到花多眼亂。

「二木菓子」嘅工作人員，每個月仲要試食成1,000種以上嘅商品，並只容許販售試食結果令人滿意，有一定水準嘅零食商品喔。

貨架上堆滿嘅係深受日本人喜愛超過40年嘅國民零食「美味棒」（うまい棒）！可以喺「二木菓子」搵到納豆味、牛舌味等，各種令人意想不到嘅「美味棒」口味，非常推薦大家大量入手，將各種口味嘅「美味棒」帶返香港做手信。至於價錢方面，30條裝嘅售價為318日圓，CP值非常高。

仲有明太子味、日式牛扒味等，口味比一般「美味棒」高級嘅「PREMIUM美味棒」，10條裝嘅售價為194日圓。

呢款巨型包裝袋裡面，裝著好多包細細包名為「椰菜太郎」（キャベツ太郎）嘅零食，相當吸睛。

「椰菜太郎」其實係一款以粟米為原材料嘅零食，由於圓碌碌嘅外形望落好似椰菜咁款，所以被命名為「椰菜太郎」。

圖片左：海外亦擁有高知名度嘅龍角散喉糖，10粒裝X10組，售價為1080日圓（含稅）。

圖片右：海外亦相當受歡迎嘅「KitKat」，種類相當豐富。採訪當日，除咗人氣爆燈嘅抹茶味之外，仲有栗子、鹽檸檬等極具特色嘅口味。

糯米餅皮包上紮實紅豆餡嘅傳統日式菓子——「福MOCHI」（福もち）最中麻糬餅，係店舖嘅人氣商品。10個裝只售297日圓，真係平到您唔信！

2樓有淺草、台場等東京各地所販賣嘅特式零食手信。就算唔記得喺即台場買手信，都可以喺度補買返喔。

記得要仔細留意「二木菓子」嘅價錢牌！上圖為例子，買1件嘅價錢為270日圓，買5件以上則每件嘅價錢為257日圓。換句話說，買得越多越划算。

免稅櫃位於2樓，買滿5400日圓以上即可享免稅優惠，除咗可以用現金，仲可以用VISA、Master Card、銀聯等付款。

跟住落嚟，會介紹「二木菓子」另一間店舖，位於「二木菓子第一營業所」對面嘅「二木菓子BIC館」(二木の菓子ビック館)。呢間店舖除咗零食之外，調味料、罐頭、拉麵等其他種類嘅食品亦相當豐富。

小編見到呢包蟹拉麵即刻眼前一亮！皆因呢包係將蟹提取物，揉進麵條所製作而成嘅拉麵喔。可以喺東京遇到由北海道食品製造廠製造嘅食品，可以話係非常難得！另外，「二木菓子」陳列著大量罕有、充滿未知數嘅商品，亦係其魅力之一。

店舖牆壁上畫有彷如東京下町地區嘅插圖♪

「二木菓子BIC館」嘅陳列架上，放有日本各地零食嘅商品。即使去唔到日本各地旅行，都可以喺度一次過買齊晒日本各地嘅零食。

「二木菓子BIC館」仲有販售自家原創品牌「FUTATSUGI」（ふたつ木）嘅點心零食，更與講究味道和品質嘅製造商合作，進行商品開發。當中，有日式菓子「最中」、「金鍔」，仲有法式糕點「費南雪」（financier）等不同種類嘅零食。

從經典嘅日式菓子到創意款式食品，「二木菓子」選擇豐富多元，可謂應有盡有。如果您都有去過「二木菓子」嘅話，記得留言話同小編分享當時嘅戰利品或感想喔！