近年成為日本旅遊人氣景點嘅福岡，除咗有熱血沸騰嘅博多祗園山笠祭、種類繁多嘅美食小食、夠晒地道嘅屋台等，最重要仲係擁有距離市區超近嘅福岡機場吖！不過，對於日本戰國歷史愛好者而言，福岡本來就係必去之地喔。因為福岡與天才軍師「黑田官兵衛」擁有密切關係，更擁有其最後所建之城「福岡城」。
傳說中嘅天才軍師「黑田官兵衛」
相信對日本戰國歷史稍有接觸嘅人，應該都有聽過真名叫「黑田孝高」嘅黑田官兵衛。其一生參與了織田信長、豐臣秀吉、德川家康戰國三大豪傑嘅時期，立下多場卓越戰功。作為軍師由群雄爭霸至亂世嘅結束，黑田官兵衛到最後選擇隱居不問政事，其波瀾萬丈嘅人生，被翻拍成2014年NHK大河劇《軍師官兵衛》。
除咗以傑出軍事響名四方之外，黑田官兵衛仲有一個被後世津津樂道嘅稱號，「三大築城名人」之一。藤堂高虎、加藤清正與黑田官兵衛，三人被譽為戰國時代「三大築城名人」，三人經手多座名城，各有所長，而黑田官兵衛最後建造嘅「福岡城」，更受到加藤清正嘅稱讚。
黑田父子嘅傑作「福岡城」
慶長5年（1600年），關原之戰開打，最後由德川家康所帶領嘅東軍取勝，黑田官兵衛與其子「黑田長政」隸屬東軍，成功征伐九州，獲得德川家康肯定，賞賜筑前國嘅領地（現福岡縣）予黑田父子。
慶長6年（1601年），黑田父子開始建造城堡，足足用咗7年時間先至完成，佔地約24萬坪嘅廣大平山城，築城之地原本係名為「福崎」嘅丘陵地，後來黑田父子使用祖先於「備前國」（現岡山縣）嘅居住地「福岡」呢個名，將城堡命名為「福岡城」，而從博多灣望向城池，城池形狀有如鶴鳥展翅，因此獲得美麗別名「舞鶴城」。
從城堡構造方面經已睇得出，福岡城係一座以戰略作考量嘅城池。石垣錯綜複雜，擁有十幾座城門與47座櫓，並設有3座大小不一嘅天守台，縝密嘅配置令整座城堡難以進攻，就連建造了號稱「難攻不落」熊本城嘅「加藤清正」亦敬佩不已，曾話過「自己建造嘅城堡3～4日就會被攻破，但福岡城即使用30〜40日亦無法攻入。」可見黑田官兵衛喺築城考量方面係有幾咁高明。
眾說紛紜嘅謎之天守
福岡城擁有3座天守台，卻無天守閣呢樣謎一樣嘅構造，一直以來都係專家學者、城郭愛好者反覆研究、討論嘅謎題。
所謂嘅天守台，亦即係天守閣嘅底座，根據早期嘅研究所顯示，福岡城係並無天守閣嘅存在。另外，於1646年所描繪，現存最古老嘅福岡城繪圖〈福博惣繪圖〉（福博惣絵図）中，並無畫上天守閣。不過於近年新發現嘅文獻，喺1620年嘅書信中發現，由於黑田長政擔心會引起幕府注意，而拆除天守閣嘅記載，因此推斷福岡城過去的而且確有天守閣嘅存在。但因為並無實際嘅遺構或出土證據，直至現時為至，仍然無法準確說明究竟係咪真係曾經有「福岡城天守閣」嘅存在。
風華成為追憶
（少數完整保留嘅多聞櫓）
明治時代（1868〜1912年）頒布廢城令，福岡城與其他日本城一樣，面臨拆毀嘅命運。當中，部分建物則移築至其他地方，如黑田家別邸、寺廟等。現時所見嘅福岡城跡雖然仍保有當時嘅石垣與佔地，但卻只剩下有幸得以保留嘅多聞櫓、潮見櫓等，寥寥可數嘅建築物。
福岡城跡現被指定為國家史跡，名列「日本100名城」，同時亦被整修為舞鶴公園與大濠公園，成為當地居民嘅休息場所，春天會染上一片粉櫻，秋天則染滿橙黃色景致，係當地人氣嘅季節景點。
景點資訊
- 景點名稱：福岡城
- 地址：福岡縣福岡市中央區城内
- 交通方式：福岡市營地下鐵「赤坂站」2號出口徒步約10分鐘
- 營業時間：24小時
- 門票：免費（特殊活動除外）
福岡地名由來
有去過福岡嘅人，或曾有過以下疑惑：到底呢個城市係叫「福岡」定係「博多」？
前文提到，黑田父子將城池命名為「福岡城」，其城下町區域亦因此稱作福岡，但早喺福岡城建立之前，因博多灣而蓬勃發展嘅港灣城市「博多」經已存在，商人城市「博多」與武士區域「福岡」，兩者隔著那珂川各據東西一方。
於明治22年（1889年），日本頒布新嘅地方制度，必須決定市名為「福岡」或「博多」，因此引發一場混戰，最後共識係將都市名命名為「福岡」，而市區中心車站則命名為「博多」。
Comments