相信大家去日本旅行除咗睇靚景之外，品嚐日本當地美食亦係一大重點。熱愛日本美食嘅您，今次呢個「重現日本鄉土料理系列」，就一定唔可以錯過啦！皆因唔單止會介紹日本各地特色美食＆鄉土料理，仲會使用與原創食譜不盡相同嘅食材去重現其製作方法，等大家可以煮得更精彩，食得更滋味。今次介紹嘅係北海道鄉土料理「湯咖喱」，並會以混合咖喱粉代替一般常用嘅咖喱磚去烹煮，別有一番風味。不妨跟著以下食譜，挑戰一下自家製「湯咖喱」喔。
日本鄉土料理係？
鄉土料理係指活用各地區嘅當地特產，結合當地風土民情所烹煮出，長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。
湯咖喱嘅起源
湯咖喱，係喺日本北海道誕生嘅鄉土料理。據聞湯咖喱嘅發源地係位於札幌市，名為「AJANTA」嘅喫茶店（出售咖啡、紅茶、甜品等簡單食品嘅日本特色餐館），以及名為「MAGIC SPICE」嘅咖喱專門店。湯咖喱嘅創始者「MAGIC SPICE」，將以雞肉為主嘅印尼菜「Soto Ayam」雞湯，加入「薬膳咖喱」去創作出料多又香辣嘅菜式——「湯咖喱」亦就此誕生。其後，「MAGIC SPICE」首次以「湯咖喱」此名將其提供予顧客。
另外，雖然於1980年代「湯咖喱」此名字並未出現，但當時加入「湯」元素嘅咖喱飯，於札幌已有一定人氣，專門店亦陸續出現。2000年過後更一躍成為熱潮，札幌市內提供「湯咖喱」嘅店鋪就已經超過200間！「湯咖喱」就此迅速成為代表北海道嘅鄉土料理之一。
湯咖喱嘅特徴
一般日式咖喱嘅醬汁質地呈濃稠狀，幾乎係睇唔清裡面嘅配料。湯咖喱則係於帶有清爽辣味嘅湯裡面，加入「大件兼多樣嘅食材」，並且「湯與米飯會分開盛載」。從湯咖喱嘅湯裡面，可以感受到辛香料嘅強烈感，亦係其特徵之一。
湯咖喱材料 （4人份）
混合咖喱粉…120g
- 雞肉（雞搥）…8隻
- 鹽…少許
- 黑胡椒粉…少許
- 洋葱（中型）…1個(200g)
- 紅蘿蔔（中型）…1個(200g)
- 孜然粒…1茶匙
- 蒜頭…1瓣
- 經已切粒嘅蕃茄（中型）…1個
- 清湯粒…2粒
- 沙律油…2湯匙
- 水…800ml
食材配料
薯仔（中型）…1個(150g)
- 南瓜…70g
- 矮瓜…2條(160g)
- 青椒…2個(60g)
- 鴻喜菇…1包(100g)
- 烚蛋（切成對半）…2隻
- 油炸油…適量
附上製作影片
食譜影片請參考（附有CC字幕）👇👇👇
- 沿著雞肉骨頭切開，加入鹽、黑胡椒，稍微用手揉抹一下。洋葱縱向切成4等分，逆紋切成薄片。紅蘿蔔切成3等分，縱向切成1cm大小。
- 於厚鍋裡加熱沙律油（2湯匙），然後放入數粒孜然粒，當放入孜然粒後出現聲響，便加入所有孜然粒。當散發香味時，放入步驟①嘅洋葱，炒至顏色變透明為止。
- 加入①中嘅雞肉、蒜頭，用細火～中火將雞肉煎至表面變色（要注意火力，不要讓孜然粒煎燶）。*表面煎至變色，讓其散發出香味係美味嘅關鍵。
- 加入水、紅蘿蔔、切好嘅蕃茄、清湯粒，沸騰後撈走浮出嘅白泡沫，用細火～中火煮15～20分鐘，直至食材變軟身。
- 趁著烹煮④嘅時候，將薯仔洗乾淨，連皮用保鮮紙包好後，用微波爐以600W加熱約3分鐘，將其稍微加熱變得軟身後，連皮切成4等分嘅圓塊狀。
- 將矮瓜直切成兩半，於矮瓜皮上劃上格仔紋，使其容易通火。青椒直切成兩半，鴻喜菇分成8等分。
- 充分去除⑤嘅薯仔、⑥嘅矮瓜、青椒、鴻喜菇水分後，於平底鍋裡放入1~2cm左右高嘅油炸油（沙律油），按種類分別油炸。*可以通過油炸，讓作為配菜嘅蔬菜食材味道昇華，經油炸過嘅蔬菜配菜，與湯簡直係完美搭配喔。
- ④嘅鍋先熄火，加入咖喱粉待其溶化，再以細火煮約5分鐘。
- 將⑧嘅咖喱盛盤，放上⑦嘅炸薯仔、矮瓜、青椒、鴻喜菇與切對半嘅烚蛋後，再搭配上米飯，即大功告成。
Comments