去日本旅行，又點少得欣賞美景與品嚐美食！今次FUN! JAPAN編輯部要介紹嘅景點，分別係大阪「通天閣」、京都「京都塔」以及神戶「神戸港塔」。以上提到嘅關西三大高塔，唔單止係大家耳熟能詳嘅知名景點，更係同時可以滿足欣賞美景，與品嚐美食呢兩個要求嘅好地方。加上地理位置優越，皆坐落於關西旅遊城市嘅中心位置，可以順路前往周邊嘅旅遊勝地以及品嚐當地美食。事不宜遲，即刻為大家家介紹關西三大高塔嘅魅力之處！
※以下文章內嘅景點資訊為2022年9月情報
大阪地標「通天閣」&人氣熱話新景點「TOWER SLIDER」
通天閣建於擁有100多年歷史嘅鬧市區「新世界」嘅中心位置，可謂大阪極具象徵性，無人不知嘅旅遊地標之一。
從4樓到6樓，每層都有唔同主題嘅觀景展望台。例如4樓「光之展望台」（標高84m）一到夜晚，鏡面玻璃球就會反射閃爍起華麗燈光，成個氣氛就好似Disco舞廳般，洋溢著一股活力；5樓「黃金展望台」（標高87.5m），全層都佈滿金光燦爛嘅裝飾，豪華程度可以媲美豐臣秀吉嘅「黃金茶室」喔。另外94.5m高嘅特別室外展望台「天望樂園」，以及前端設有透明地板、令人感到驚險萬分嘅突出觀景台「TIP THE TSUTENKAKU」等，通通都可以為到訪人士提供獨特體驗嘅景點，亦正正係通天閣嘅魅力。
除此之外，於2022年5月作為全新體驗型遊樂設施誕生嘅「TOWER SLIDER」，亦成為大家嘅熱門話題之一。
TOWER SLIDER係一個全長60m，斜度約有30度嘅巨型螺旋瀡滑梯。可以從距離地面22m高嘅地方，環繞塔外圍一圈瀡到地下一樓（離地面4.5m），成個過程只需短短10秒鐘！
呢條巨型螺旋瀡滑梯，係由高耐用性嘅不銹鋼管所製成，而且天花板係使用透明材質製造，咁就可以邊瀡邊仰望通天閣喔！下次去大阪玩嘅話，一定要去瀡返一轉啦！
通天閣
- 地址：大阪市浪速區惠美須東1-18-6
- 營業時間：【一般展望台】10:00～20:00(最後入場時間19:30) 【特別室外展望台】10:00～19:50(最後入場時間19:30) 【TOWER SLIDER】10:00～19:30
- 一般觀景台收費：【大人（高中生以上）】900日圓 【小童（5歲～中學生）】400日圓
- 特別室外觀景台追加收費：【大人（高中生以上）】300日圓 【小童（5歲～中學生）】200日圓
- ※前往特別室外展望台/突出展望台需要額外收取追加費用。
- ※特別室外展望台與突出展望台門票僅以套票形式出售。
- TOWER SLIDER收費：【大人(高中生～65歲)】1000日圓 【小童(小學生～中學生)】500日圓
- 公式URL：https://www.tsutenkaku.co.jp/index.html
「京都塔」360°欣賞古都・京都全景&品嚐美食！
從JR京都站徒步2分鐘即可抵達嘅京都塔，係距離地面100m高嘅觀景名勝。塔身就建於集酒店與餐廳於一身嘅綜合大樓頂樓，從塔上可以飽覽到京都三山嘅美景。
觀景展望室內設置了可供免費使用嘅望遠鏡，透過望遠鏡，可以欣賞得到京都著名嘅棋盤格狀街景、清水寺、東寺、知恩院和三十三間堂本堂等國寶及代表著京都嘅著名景點。如果撞正好天氣，甚至可以望得到大阪吖！當您身處距離地面100m嘅高空，或可體會到不一樣嘅旅遊角度。
另外，可以喺京都塔內享受各種美食與美酒亦係一大魅力。位於展望室3樓嘅天空休息室「空」-KUU-，您可以一邊欣賞夜景，一邊享用美酒、汽水、甜品和輕食。店內既雅緻又極具質感嘅裝修與燈光搭配下，營造出一種充滿高級感嘅氛圍，絕對係一間「大人可以盡情享受嘅酒吧」喔！當中，除咗有2種吧台座位、情侶座位、仲有包廂座位和餐檯座位等，座位種類選擇非常多，唔單止適合帶重要人士前往慶祝紀念日或開Party，就算喺旅遊時嘅空餘時間，都可以去嘆返杯美酒喔。
如果您想喺京都塔旅遊嘅同時，品嚐美食與體驗盡情購物嘅樂趣，小編推薦您去京都塔樓內嘅商業區「KYOTO TOWER SANDO」行個圈喔。從地下1樓到2樓共有三層，裡面有當地人氣商店、和服專門店、京都甜品店等等，既講究又極具格調嘅店舖林立。飽覽完絕景之後，記得去行個圈，盡情大出血，揀返幾款手信返香港啦！
京都塔
- 住所：京都府京都市下京區烏丸通七條下 東鹽小路町 721-1
- 營業時間：10:30〜21:00（最後入場時間20:30）
- ※營業時間可能會有所變動，恕不另行通知。
- 一般收費：【大人】800日圓【高中生】650日圓【小・中學生】550日圓【小童(3歲以上)】150日圓
- 官方網站：https://www.kyoto-tower.jp/en/
「神戶港塔」（現正休館中）將於2023年迎來開業60周年紀念嘅神戶地標
※為整修工程前相片。外牆現正進行工程
神戶港嘅地標「神戶港塔」，具有完美對稱嘅外觀，望落就好似拉長咗嘅日本獨有傳統樂器之一「鼓」（如漏斗般嘅形狀，於胴體兩邊貼上皮革，配合被稱為「緒」嘅繩所製成）。由於「神戶港塔」係世上首個以獨特管道構造嘅高塔，因此亦被美譽為「鐵塔美女」。觀景台共分成五層，最上層嘅觀景台可以將神戶港灣景色、城市街景和六甲山景盡收眼簾！日頭可以望見蔚藍天空與湛藍大海嘅完美交融景致，而夜晚則可以欣賞浮於海面上、燈火通明嘅神戶港和城市街道夜景。
目前神戶港塔正休館以進行整修工程，準備於2023年重新開幕，並迎接開業60週年嘅大日子。因此現時包括觀景層在內，無法進入建築物內所有樓層，而外牆亦以施工保護布覆蓋。
不過，相關人員發揮巧思，例如喺施工保護布上繪製紅線，令人聯想起高鐵優美嘅線條，仲會喺夜晚進行光雕投影等等，等大家喺工程期間亦唔會失望而歸。等我哋齊齊期待2023年，神戶港塔嘅60週年紀念與重新開業吧！
神戶港塔
- 地址：兵庫縣神戶市中央區波止場町5-5
- 營業時間：整修工程期間休館（預定於2023年度重開）
- 官方網站：http://www.kobe-port-tower.com/language/english.html
Comments