大家好，我係日籍小編Shiori。無論係新年、婚禮、抑或是葬禮等各種場合，日本人都會通過贈予金錢以表心意。本篇文章將介紹日本金錢文化、以及相關禮儀與習俗規矩。唔知比較香港嘅金錢相關文化之下又係點嘅呢？覺得有趣嘅地方歡迎各位慷慨留言，或同小編分享讀後感喔！
原來投5日圓作香油錢係最好意頭！？
相信大家去日本神社參拜時，都曾於「賽錢箱」投過香油錢，唔知您當時投咗幾多錢呢？
其實日本喺香油錢方面，並無規定一定金額，可謂隨意捐獻，投入自己想投嘅金額即可。話雖如此，有唔少日本人認為最好投5日圓硬幣。
原因係日文發音中，「5 日圓」（go-en）與「緣份」（ご緣）發音一樣，夠晒好意頭！所以唔少人都認為「於賽錢箱投5 日圓，就會行好運、結好緣」。
除此以外，仲有另一個原因，因為5 日圓正中間有個窿，可以從中望見眼前景色，被認為具有「展望美好將來」嘅好兆頭。
另一方面，唔少人會避開以10日圓作為香油錢。因為日文發音中，「10」有「juu」與「tou」兩種發音，如果將10 日圓讀成「tou-en」嘅話（※雖然一般發音為juu-en。），就會同「遠緣」嘅發音一樣，唔多好意頭。
不過，正如一開始時所講，並無規定香油錢嘅一定金額。無論係1日圓、5日圓、抑或係10日圓，甚至唔投銀仔投紙幣都無問題，將您想放入嘅金額投入「賽錢箱」吧。
日本新年習俗——包「年玉（利是）」畀小朋友
日本於元旦新年時，會包「お年玉（otoshi-dama）」（下文將會一律統稱為年玉）畀自己嘅小朋友、侄仔侄女、外甥姨甥，即係類似香港嘅「利是」，而用嚟包「年玉」嘅信封，日文叫做「ポチ袋（pochi-bukuro）」。
日本「年玉」究竟要包幾多錢？
「年玉」金額並無規定金額，但隨著收利是嘅人年齡增長，金額亦會跟著增加。
以下為「SBI Sumishin Net Bank」2020年所公佈，關於「年玉」金額嘅調查結果。「SBI Sumishin Net Bank」係根據不同學年嘅小朋友，所收取嘅「年玉」金額進行調查，以當中數據所顯示嘅主流金額範圍，數據反映如下。
| 小學生以下 | 1,000日圓以下 |
| 小學生1～3年級 | 1,001日圓～3,000日圓 |
| 小學生4～6年級 | 3,001日圓～5,000日圓 |
| 中學生、高中生、大學生 | 5,001日圓～10,000日圓 |
夏季版「年玉」之「盆玉」！
「年玉」有著祝福之意，亦係日本人過新年時，根深蒂固嘅習俗。最近，有個名為「お盆玉 （obon-dama）」（下文將會一律統稱為盆玉）嘅習俗亦逐漸普及。
首先說明一下，於日本夏季舉行嘅習俗——「盂蘭盆節」吧！
盂蘭盆節係指祭祀祖先靈魂等活動期間，多半於8月15日左右，並會舉行數日。唔少日本人會趁著呢個時期放暑假，帶埋小朋友返鄉下見見屋企人，對於呀爺、呀嫲、呀公、呀婆等長輩嚟講，呢個亦係可以見到孫仔、孫女嘅寶貴機會。亦因為咁，會封「盆玉」畀久別重逢嘅孫仔、孫女，可以話係「年玉」嘅夏季版本喔。
據聞「盆玉」係從江戶時代（1603~1868年）嘅山形地區開始。當時盂蘭盆節期間，山形縣嘅屋主人會有畀零用錢自己嘅家僕（被武士家、商人家所雇用，幫忙做家務的工作者）嘅習俗，此舉被認為係「盆玉」嘅起源。
根據「Sumitomo Mitsui Card Company」調查（2018年）所顯示，日本每3個小朋友，就有1個會收到「盆玉」。另外，「盆玉」與「年玉」相比，金額通常會比較少。
規矩多多！日本婚禮嘅「祝儀」原來要咁封至啱！？
喺日本，受邀出席婚禮者，需要準備金錢作賀禮贈予新郎新娘，稱之為「ご祝儀 （goshugi）」（下文將會一律統稱為祝儀），亦即係香港俗稱嘅「人情」。關於日本嘅「祝儀」方面，必須注意以下事項，避免造成新郎新娘嘅誤解，認為您係一個無禮貌嘅人喔。
「祝儀金」要使用未用過嘅紙幣
用嚟封「祝儀金」嘅信封，被稱為「ご祝儀袋 （goshugi-bukuro）」。據稱放入「祝儀袋」嘅紙幣最好為無任何摺痕和皺紋嘅新紙鈔（於發行後並無使用過嘅紙幣）。
使用新紙鈔嘅原因有好幾個，首先係因為婚禮係慶祝對方，邁向「新」生活開始嘅，用「新」紙鈔會較為合適。
另一個原因，出席者特意去銀行或郵局，排隊換新紙鈔等舉動，亦代表可向新郎新娘傳遞「為出席婚禮做足充分準備。」嘅訊息。出席者如此用心準備作「祝儀金」嘅新紙鈔，更可向對方表達「非常期待您哋嘅婚禮，所以特別好好準備。」嘅誠意。
金額開頭嘅數字必須要係單數
日本「祝儀金」嘅行情價係30,000日圓。新郎新娘嘅上司則要封50,000日圓或更多。必須要注意嘅係，「祝儀金」嘅開頭數字一定要係「3」、「5」等單數喔。關於箇中理由，請參考此文章。
絕不可以新紙鈔作日本葬禮嘅「香典」！
出席親屬或熟人葬禮時，會贈予「香典 （kouden）」，即類似香港俗稱嘅「帛金」，以表慰問心意。「香典」被定位為代替獻給故人嘅線香與花等供品。
「香典」金額根據與逝者關係而有所不同。假設去世嘅係自己父母，一般為100,000日圓，兄弟嘅話一般為50,000日圓，其他親戚一般為10,000日圓。至於同事或朋友一般為5,000日圓，但根據關係嘅深淺度，亦會有數萬日圓嘅情况出現。如果係鄰居或街坊街里嘅話，一般為3,000日圓或5,000日圓。
不能有4和9嘅金額數字出現
禁止使用4,000日圓、9,000日圓等，以「４」和「９」開始嘅金額數目。因為日文發音中，「４」有「yon」和「shi」兩種讀法，而「shi」嘅發音與「死」相同。另外，「９ 」嘅發音「ku」則令人聯想到「苦」，均屬於不吉利嘅數字。
不可使用新紙鈔作「香典」
上文提到婚禮中要使用並無任何摺痕嘅新紙鈔作為「祝儀金」，而「香典」則相反，不可使用新紙鈔。正如剛才提及到，需要去銀行排隊方能換得到新紙鈔，如果將其作「香典」嘅話，會畀人一種「早預想到逝者會去世，為準備出席葬禮預先做足準備」嘅感覺。如果手頭只有新紙鈔嘅話，建議先將其摺出摺痕後再使用。
唔知大家睇完以上文章之後有咩感想？覺得同香港又有咩分別或相似嘅地方呢？記得留言同小編分享讀後感喔！
相關文章
【日本匪夷所思嘅文化】日本大學生搵工原來係咁嚴苛！？日本人親身解說何謂「就職活動」
Comments