2022年6月25日，東京都北區瀧野川（滝野川）一條小巷中，一大早就出現無數人影於某座建築物出出入入，原來該建築物係啱啱整修完畢嘅百年木造長屋，隔離仲有一座更大更顯眼嘅建築－錢湯「稻荷湯」！呢一棟長屋曾經係稻荷湯員工宿舍，改建成為倉庫後甚少使用，而今日就係兩者重生嘅大日子。
一切從「錢湯」開始
錢湯即係日本嘅「公共浴場」，於家庭衛浴尚未普及嘅年代，錢湯係民眾每日必去報到嘅地方。喺度沖返個靚涼，洗走全身汗水兼全日疲勞，與街坊街里閒話家常、交換情報，最後嘆返杯凍飲作為一日嘅結尾，雖樸實無華，卻令人感到無比幸福。
但隨著日本國民開始擁有家庭衛浴設施，錢湯定位逐漸變低、使用者日漸減少。錢湯業界繁華不再、消失嘅速度出乎意料地快，原因唔只係因為顧客變少，亦包括經營者衰老、後繼無人、維修經營成本過高等種種因素。截至2022年7月，雖說東京仍然係日本錢湯數目最多嘅縣，但錢湯數目已不足500間。
近幾年，喺各項影視、文藝作品嘅推波助瀾下，大眾開始重燃對傳統錢湯嘅興趣，甚至有唔少年輕一代投入錢湯相關活動，發揮所長只為保留錢湯文化，其中一個例子就係「一般社團法人SENTOTOMACHI」（一般社団法人せんとうとまち）。
年輕建築師與古老錢湯刷出火花
「一般社團法人SENTOTOMACHI」（以下簡稱SENTOTOMACHI），當中「SENTOTOMACHI」嘅日文含意「錢湯與社區」亦係團體理念。自2020年創立以來，團體成員不斷關注錢湯文化保存，尤其致力維護錢湯與社區關係，「稻荷湯」就係佢哋傾盡全力嘅成果。
2018年，SENTOTOMACHI嘅代表理事「栗生はるか」（Kuryu Haruka）因工作關係去到稻荷湯採訪，熱愛錢湯嘅栗生與店主非常投契，作為建築師嘅栗生提出稻荷湯整體建築調查計畫，亦從此展開與稻荷湯嘅深厚緣分。
栗生與志同道合嘅夥伴們一共花費約9個月時間，實際測量成棟稻荷湯──一棟超過90年歷史嘅建築物。確認其珍貴性、並取得店主同意後，一眾人就著手整理資料，向政府申請成為「國家登錄有形文化財」（国登録有形文化財），成為東京都第二座有形文化財錢湯。
及後，「稻荷湯修復再生計畫」（稲荷湯修復再生プロジェクト）於2020年得到美國「世界建築文物保護基金會」（WORLD MONUMENTS FUND）垂青，使得稻荷湯旁邊嘅長屋亦獲得資金投入展開保存計劃。
正式啟動！稻荷湯修復再生計劃
「一般社團法人SENTOTOMACHI」嘅主要成員唔單止係建築相關嘅專業人員，更加係一班「錢湯宅」，成員們打從心底喜愛錢湯，並運用自身所長去拯救錢湯。
計劃內容除咗整修稻荷湯本體建築內部，包括外觀修復、加強避震等，另一個重點係將隔離嘅長屋大改造。長屋係從其他地方移築至此，建築物歷史比稻荷湯更久遠，據估計超過百年。SENTOTOMACHI計劃將荒廢已久嘅長屋改造成活動空間，將錢湯所扮演嘅「交流」角色，從浴場延伸至此。
工程過程期間先處理大量廢料、拆走已遭腐蝕嘅地板與土牆，將成棟長屋清空至只剩主體解構，然後花費大量時間，尋找熟悉傳統工法嘅建築職人，盡可能以日本傳統工法修復土牆、木造玄關門、傳統玻璃等等整棟長屋設施。
經過大約2年嘅千辛萬苦，長屋修復工程終於順利結束，於2022年6月25日「稻荷湯長屋」發佈會上正式重生。當日除咗錢湯界相關大人物到場之外，仲聚集咗無數位錢湯愛好者前往，大家齊齊喺浴室裡舉杯，為重生稻荷湯與長屋獻上祝福。
錢湯文化保存腳步不間斷
「稻荷湯修復再生計畫」隨著長屋開幕而宣告完成，但SENTOTOMACHI嘅腳步並未因此停下。長屋先啱啱正式啟用，運用方法仍處於摸索階段。6、7月嘅試營運期間會開放作週末限定嘅喫茶店等用餐空間，惟8月後嘅營運模式仍持續調整中，預計需要再花費一段時間先至可以定下最適合長屋嘅使用方法，但可以確定嘅係，稻荷湯與長屋嘅新生計劃已為保存錢湯文化開啟全新道路！
設施資訊
- 名稱：瀧野川稻荷湯（滝野川稲荷湯）
- 地址：東京都北區瀧野川6-27-14
- 交通方式：都營三田線「西巢鴨站」、JR埼京線「板橋站」出口徒步約6分鐘
- 營業時間：15:00〜24:30
- 定休日：星期三
- 費用：錢湯入浴費 500日圓（12歲以上）、200日圓（6歲以上未滿12歲）、100日圓（未滿6歲）
Comments