日本必食嘅人氣「親子丼」，通常指嘅係用雞肉（親）同埋雞蛋（子）所烹調嘅丼飯。不過今次FUN! JAPAN「煮編」要分享嘅親子丼食譜卻係特別版—以三文魚＆三文魚籽海鮮親子丼！色彩鮮豔嘅三文魚，配上晶瑩剔透又脆卜卜嘅三文魚籽，唔單止好味道，賣相仲非常吸引，令人食慾大增！大家有機會不妨跟住以下食譜，自家製作出呢款清爽不油膩、最啱喺夏天品嚐嘅海鮮親子丼喔。
三文魚親子丼材料（2人份）
- 三文魚魚生 160 g
- 三文魚籽 2湯匙 (70 g)
- 白飯 2碗飯碗份量
- 紫蘇葉 8塊
- 長蔥蔥花
- Wasabi 適量
- 豉油 適量
三文魚親子丼製作方法
- 剪走紫蘇葉尾端莖部，將三文魚魚生切成容易入口嘅大小。
- 用丼碗裝飯，依順序放上紫蘇葉、三文魚魚生、三文魚籽。
- 隨意撒上切成蔥花嘅大蔥。
- 於豉油內放入Wasabi ，攪拌均勻。
- 將步驟4攪拌均勻後嘅Wasabi豉油倒入三文魚親子丼，美味可口嘅三文魚親子丼就大功告成！
＊切三文魚魚生時，為保持其完美形狀，記得要向住同一方向兼一鼓作氣地一刀切，咁就可以切出一片又一片形狀美觀嘅三文魚魚生喔。
＊將白飯換成醋飯亦同樣滋味喔。
Comments