相信大家去超市嘅時候，都有見過「北海道3.6牛奶」或「A5等級和牛」吧。雖然知道係「好嘢」，但實際上您又講唔講得出究竟好喺邊？想要將優質食品掌握喺手並非靠運氣，而係在於是否理解隱藏喺常見數字背後嘅意義。
「3.6牛奶」同「4.0牛奶」有咩分別？「A5和牛」真係比「A4和牛」好食啲？
只要掌握好以上數字背後嘅意思，成功入手優質食品嘅機率就會大大提高，無論係朋友，抑或係屋企人都會對您另眼相看！
疑問1：究竟「北海道3.6牛奶」上嘅「3.6」呢個數字係咩意思？
牛奶嘅商品名稱中經常會見到「3.5」、「3.6」等數字。相信唔少人都有數字越高、牛奶越濃醇高級嘅印象，但實際上並非如此。
實際上，呢個數字係表示「牛奶中嘅脂肪含量」。換句話說，即係表示牛奶嘅營養成份之一嘅脂肪含量比例。「3.6」代表100g牛奶中脂肪含量為3.6g以上、「4.2」就代表100g牛奶中脂肪含量為4.2g以上，如此類推。
一般而言，市面上所販售嘅「牛奶」可細分成以下6種ー
- 牛奶（成份無調整牛奶）：
100%鮮奶。殺菌後直接包裝嘅牛奶（法律禁止加入水等成份） - 成份調整牛奶：
將100%鮮奶中嘅水分、乳脂肪或礦物質等進行調整後嘅牛奶 - 低脂牛奶：
成份調整牛奶中，將乳脂肪含量調整為0.5%以上、1.5%以下嘅牛奶 - 無脂肪牛奶：
成份調整牛奶中，將乳脂肪含量調整為不足0.5%嘅牛奶 - 加工奶：
喺鮮奶中加入奶製品（脫脂奶粉、牛油、忌廉等），製作成濃厚或低脂種類嘅牛奶 - 奶類飲品：
以鮮奶及奶製品為主要原料，加入非奶製品（維他命、咖啡、果汁等）所製成嘅牛奶（多為「特濃」、「濃厚」商品）
根據日本所發佈嘅「乳與乳製品成份規格相關省令（乳等省令）」規定，第1種嘅「牛奶」乳脂肪含量成份必須為「3.0%以上、100%鮮奶，且成份無調整牛奶嘅乳脂肪必須為3.0%以上、無脂乳固體成份為8.0%以上」。如果乳脂肪含量為3.6%以上，就可以將商品名命名為「3.6牛奶」。咁究竟「乳脂肪含量又係味越高越好味道？」，答案係唔一定！
乳脂肪含量越高，牛奶無疑會越醇厚、香味越强烈，但乳牛嘅飼料、成長季節、或生產過程中嘅殺菌溫度、時間長短等等都係會影響味道嘅因素。睇完以上關於各種牛奶嘅定義，以及數字背後嘅意思之後，下次去買牛奶嘅時候就唔好再被數字搞到頭都大埋喇。
疑問2：究竟「A5和牛」嘅「A5」係咩意思？
相信大部分嘅人食肉時都會參考「A4」、「A5」等等級，作為判斷肉質嘅基準，甚至有唔少人會認為「A5等級=好食」吧？
但其實所謂嘅「A4」、「A5」，並非用以表示味道好與壞嘅等級，而係由日本肉品等級鑑定協會（JMGA，通稱「日格協」）於1961年根據「牛枝肉取引規格」，將評級標準分為「步留等級（字母）」與「肉質等級（數字）」2項基準。綜合以上2項評估後，再細分成15個等級去評估肉質，並以此作為訂定價格嘅基準。
「步留等級」係指「從枝肉（*1）中可取得嘅部分肉（*2）比例」，將「食用部分」嘅分量，分成A～C 3個等級（A為最高，C為最低）作評估。從枝肉中取得嘅可食用嘅肉越多，步留等級就越高。一般嚟講，和牛屬於A等級，和牛以外嘅肥育牛則屬於B等級。
*1：枝肉：從牛嘅身體去除皮、骨、內臟等部分之後取得嘅肉，被稱為枝肉。
*2：部分肉：從枝肉中去除骨頭、剩餘脂肪、肉渣等取得嘅肉，被稱為部分肉。分別有牛頸肉、肩胛肉、肉眼、西冷等13個部位。
另一方面，「肉質等級」正如文字所述，係對肉嘅質量進行等級劃分。評估項目為「脂肪交雜（肉質與脂肪比所呈現嘅霜降狀態）」、「脂肪色澤及品質」、「牛肉緊致度及紋理」、「牛肉色澤」共計4個項目，分別以5～1（最高為5，最低為1）去評定等級。有一點需要注意，「肉質等級」並非取其平均值，而係取以上4個項目中，最低分者作為最終標示等級。
例子如下、
| 評估項目 | 等級 | 肉質等級 | |
| 脂肪交雜 | 5 | ||
| 牛肉色澤 | 3 | → | 3 |
| 牛肉緊致度及紋理 | 4 | ||
| 脂肪色澤及品質 | 3 |
從上述判斷基準可得知，牛肉嘅等級並非指「味道」，而係「外觀」！您係咪覺得好意外…？當然，喺揀牛肉嘅時候，以肉色嘅鮮豔度，以及肉表面嘅口感等等作基準，亦係其中一種揀牛肉嘅方法，但係唔好忘記所使用嘅飼料、以及飼養環境亦會影響其肉質喔。
「糖度越高=水果越甜」亦係大錯特錯！
關於食物嘅評級標準仲有非常多，例如用嚟表示水果甜度時所使用嘅「糖度」亦係其中之一。喺水果區成日會見到寫著「糖度○度（以上）」嘅立牌，您係咪認為呢個數字越高就代表越好食（甜）？
糖度係指「溶解喺水中嘅固體物」嘅數量作測量單位。由於此測量單位對象包含所有糖分（葡萄糖、果糖、蔗糖等），而且鹽分、酸性物質亦屬於「固體物」，所以糖度表示嘅並非味道嘅甜度，而係指其濃度。（「Brix值」為糖度測定值嘅單位）
根據農林水產省所發表嘅「果樹相關情勢（平成26年6月）」資料顯示，一般水果糖度如下。
| 水果 | 糖度 | 酸度 |
| 橙 | 10.3% | 1.2% |
| 蘋果 | 15.0% | 0.4% |
| 香蕉 | 21.0% | 0.5% |
假設有兩個同樣為糖度12嘅蘋果（A&B）。如果A所含有嘅檸檬酸為3%，而B所含有嘅檸檬酸則為10%，咁就算糖度相同，B食落亦會比較酸；但如果2款用唔同嘅水果（例：蘋果VS檸檬）進行比較，由於兩者成份原本就唔一樣，所以係唔能夠淨係以糖度，去簡單地斷言蘋果&檸檬兩者之間究竟邊個比較甜。
根據唔同種類嘅糖，其甜味亦有所不同。另外，水果內含有嘅酸性物質分量亦會影響到所感覺嘅甜度，所以對味道相當講究嘅人，建議考慮埋整體嘅「糖酸比（甘味比）」。
簡單而言，總結如下：假如有一日，經已購買過好幾次嘅蘋果，其糖度突然上升嘅話，就係入手好時機啦！
Comments