【日本美食】地道B級美食巡禮「福岡」篇

近幾年人氣急升嘅「福岡」之所以人氣一直高企，原因之人就出於縣內「美食」嘅實力！福岡同北海道一樣，每當提到日本最「好食」嘅都道府縣嘅時候，福岡絕對係前三名位置。豬骨拉麵、水炊雞鍋、屋台料理等極具特色嘅料理，更係凸顯福岡獨樹一格嘅美食文化。今次就等我哋齊齊去探索一下，福岡嘅B級美食啦！

何謂「B級美食」

除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。

福岡美食嘅特色係「大量使用新鮮食材」，北部漁港面對著擁有豐富漁獲嘅「玄界灘」海域，鮮美海鮮加上新鮮蔬菜，福岡人嘅舌頭因而被養得無比挑剔，為咗滿足以上提及到嘅美食家味蕾，福岡餐飲界嘅實力極具水準，且發展相當蓬勃，造就多種傳奇美食。

講起福岡嘅經典美食，大家腦海中浮現嘅應該係種類豐富嘅豬骨拉麵，鮮味無比嘅水炊雞鍋、味道濃厚香醇嘅牛腸鍋吧。今日我哋要撇除以上經典美食清單，出發一趟尋找福岡大街小巷中，被當地人喜愛嘅B級美食之旅。

起源自福岡縣北九州市嘅「八幡餃子」，與栃木縣「宇都宮餃子」、靜岡縣「濱松餃子」統稱為「日本三大餃子」，當初係為咗令從事體力勞動嘅民眾都可以食得飽兼食得好，而誕生嘅平民美食。

八幡餃子嘅上菜方式係將煎好嘅餃子，放喺熱騰騰嘅鐵鍋裡直接上檯，一舉滿足視覺、嗅覺、聽覺，將餃子放入口嘅瞬間，美味程度更係滿分！喺鐵鍋嘅加持下，就算食到最後一啖，都係名符其實嘅「熱騰騰美食」，稱得上係色香味完美兼備嘅美食。

講到福岡嘅麵類美食，相信唔少人會瞬間諗起「豬骨拉麵」，但其實對當地人嚟講「烏冬」先至係經典，更加係「靈魂美食」。

關於烏冬發源地有多個說法，其中一個就係博多。博多烏冬與跟其他地區唔同，口感偏軟，不追求嚼勁，加上口味清淡嘅湯頭，讓人輕輕鬆鬆就可以食晒成碗。除咗口感與湯頭之外，福岡烏冬招牌配菜亦相當獨特－「炸牛蒡」，以及名為「丸天」嘅圓形炸魚餅，最後再嘆返個「雞肉（かしわ）飯糰」，咁樣先至係地道嘅博多烏冬套餐喔！

就咁睇福岡嘅雞肉串燒好似無咩特別，但再望真啲張菜單，雞、豬、牛以外，仲會提供一般雞肉串燒店極少見嘅海鮮類串燒！入座後店員會即刻送上一盤附有醬汁嘅椰菜，可以邊食邊點餐，亦係發源於福岡嘅食法。

大部分店舖都有提供椰菜免費任食服務。椰菜除咗爽脆又好食，仲可以瞬間將充滿滿油膩感嘅口腔變得清爽，方便各位繼續挑戰更多雞肉串燒！喺福岡充滿熱鬧氣氛嘅屋台品嘗美食嘅話，絕對會讓其美味程度更加分！

眾所皆知鹹香誘人嘅「明太子」係福岡名產之一，而「明太子玉子燒」就係將一整條明太子包喺鬆軟嘅雞蛋裡所製作而成，果然只有身為明太子產地嘅福岡，先至可以造就如此豪邁嘅美食。

明太子玉子燒嘅烹調手法會根據各店家而有所不同，除咗有常見嘅日式高湯玉子燒，亦有加入蔥花、表面焦香嘅薄煎玉子燒，不變嘅係兩者都會放入一整條明太子。鐘意明太子嘅人，建議去多幾間店舖，品嘗多幾款明太子玉子燒！

「風月」於1968年將原本嘅喫茶店（日本舊式café）改裝成西餐廳，並於構思又平又好味嘅菜式時忽然靈機一觸，「牛油炒牛肉意粉」（ビーフバター焼き）就此誕生。將以牛油與特製醬汁熱炒過嘅牛肉片，與意粉放上鐵板，最後再次淋上醬汁，夠晒地道嘅牛油炒牛肉意粉就大功告成。

選擇熱鐵板作盛裝容器嘅理由係因為當時鐵板菜式非常罕見，亦由於呢個新嘅構思，令牛油炒牛肉意粉呢道菜式一舉成名。

努努雞即係「炸雞」，但特別嘅係「此炸雞不同彼炸雞」，努努雞竟然係凍食嘅炸雞，簡直係顛覆大家對炸雞嘅想像喔！創辦人喺30幾年前就已經係以炸雞飲食業起家，為咗創作出與同業嘅差異性，跑勻全日本做完市場調查後，得到一個結論：就係要做顛覆既有定義嘅炸雞。努努雞亦因此誕生。

努努雞從製作開始嘅每一個步驟都同一般炸雞唔同，除咗無需要醃漬直接裹粉，亦使用長時間慢慢高溫油炸，非快炸起鍋，因此即使放置一段時間，其酥脆口感亦唔會受到影響。當中，最唔同嘅地方就係：努努雞一定要凍食！根據品嘗過努努雞嘅人表示，努努雞最適合配凍啤酒享用！