大家好，我係日籍小編清水。唔知喺香港呢個繁華都市，各位係如何邂逅戀人與結婚對象呢？
日本有一種被稱為「合コン（Go-kon）」嘅聯誼活動，除咗會聚集一眾為尋求邂逅機會嘅男女聚餐飯局之外，近年使用可以輕鬆與異性配對嘅交友APP人數亦有所增加，可選擇嘅邂逅方式可謂相當廣泛。另外，仲有一個叫做「婚活（Kon-katsu）」嘅日文，意思係「為尋找結婚對象所進行嘅活動」。
接落嚟，本篇文章會為大家介紹關於日本婚活嘅二三事！
何謂婚活？
「婚活」係指為「結婚」而進行嘅「活動」，尤其指為「邂逅」將來會成為自己嘅妻子或丈夫，命中注定嘅對象所進行嘅活動事宜。
喺第二次世界大戰之前，日本嘅主流係「相睇結婚」（與父母、親戚等選擇嘅人結婚）。根據國立社會保障・人口問題研究資料顯示，第二次世界大戰之前已婚人士當中約70%係「相睇結婚」；相反現時幾乎都係以自由戀愛結婚為主，相睇結婚比率只有5%（2015年數據）。
現時戀愛結婚成為主流，一方面可以自由選擇結婚對象，一方面又會煩惱究竟點樣先至可以邂逅得到理想嘅結婚對象…？對此感到煩惱嘅人亦有所增加。
未婚嘅日本人會經常嘆息「根本無邂逅機會！」，亦即係話，如果只係普普通通過住日常生活，就唔會有美好嘅邂逅機會（網絡發達令到人與人之間嘅關係比以前更淡薄亦係其中一個原因吧）。同一時間，日本嘅職場結婚（與同公司嘅人結婚）人士亦非常多，但係而家WFH變得相當普及，喺職場邂逅戀人亦變得越來越困難，因此積極參與需要花費時間與金錢嘅「婚活」人士正不斷增加。
日本婚活二三事
現代嘅日本人，究竟係透過咩途徑與戀人和結婚對象相遇呢？以下落嚟會介紹幾個主要方式。
①交友APP
交友APP已經係一股普及全球嘅風潮，當然日本亦唔例外，例如「Pairs」、「Omiai」等等嘅交友APP就係源自日本。使用交友APP嘅日本人有逐年遞增趨勢，根據Recruit嘅調查顯示，於2020年結婚嘅新人當中，透過利用交友APP等等嘅網絡婚活服務，成功邂逅結婚對象嘅新人就佔11%。
②聯誼
日本有一種被稱為「合コン（Go-kon）」嘅聯誼活動，聚集一眾素未謀面嘅男女於餐廳或居酒屋，透過進行聚餐，可以邊飲酒邊認識彼此。
「合コン」與1對1見面嘅Blind Date唔一樣，通常會聚集男、女性各3～4人。大家會喺「合コン」活動上面一邊飲酒食飯，一邊談論工作、興趣、戀愛觀等相關事宜。如果有心儀對象嘅話，會即場問對方拎聯繫方式，以便日後邀請對方約個會或食個飯。
「合コン」一詞據聞誕生於1980年代前半期，其後被大學生及20幾歲等等嘅年輕一代，使用於可尋找戀人與結婚對象嘅場合。但由於近幾年交友APP嘅普及，以及COVID-19嘅影響，飲食店須採取某程度上嘅使用限制以配合防疫措施，令到參加「合コン」聯誼嘅人數减少。
③婚姻介紹所
婚姻介紹所係一個為您介紹合適嘅結婚對象，並賺取服務費用嘅組織。入會費金額根據唔同嘅婚姻介紹所亦有所不同，當中甚至有入會費金額高達約30萬日圓嘅婚姻介紹所喔。除咗入會費、需要每個月繳交好幾萬日圓嘅月會費，仲有喺成婚（與透過婚姻介紹所認識嘅人結婚）時徵收成婚費嘅婚姻介紹所。
成為婚姻介紹所嘅會員後，話畀顧問知你嘅理想結婚對象條件（學歷、每年收入、年齡、性格等），顧問就會介紹接近條件嘅人畀你，然後就可以與被介紹嘅人實際食個飯或飲個茶，互相情投意合嘅話，就可以開始以結婚為大前提交往發展。如果並非情投意合嘅話，婚姻介紹所就會為您介紹另一位合適人選。
最近，雖然使用又平又簡單嘅交友APP人數不斷增加，但係由專業顧問為您尋找結婚對象嘅婚姻介紹所，則以結婚意欲相當高嘅人士為主要使用者。另外，亦有要求提交由自治體所發行嘅單身證明文件、大學畢業證書等等嘅婚姻介紹所。因此，比起交友APP，婚姻介紹所可以好好確認會員嘅真實身份情況，令人感到更放心，擁有更多安全感。
④搭訕
「ナンパ」（Nanpa）係指喺街頭上向陌生女性打招呼、邀請對方去飲茶食飯，交換聯繫方式等等嘅搭訕行為，喺香港應該亦會有類似嘅情況發生吧。
順帶一提，位於東京・銀座，飲食店和酒吧林立嘅「Corridor街」，由於有正在尋求邂逅嘅男女聚集於此，因此被稱為「搭訕聖地」。
相反，女性主動走去向陌生男性搭訕嘅行為，日文被稱為「逆ナン」（逆ナンパ嘅縮寫），中文意思為「逆搭訕」。
近年對於被陌生人搭訕時，具有警戒心嘅人數亦有上升趨勢，如果你突然喺條街度向陌生人搭訕嘅話，好有可能會被認為係可疑人物，所以即使喺日本街頭遇見心儀嘅陌生人，亦唔建議走去搭訕喔！
關於日本約會事宜：約會時嘅使費係邊個畀？
成功邂逅到戀人之後，當然會去約會拍拖談情說愛吧。不過關於約會，經常引起爭論嘅係「約會使費嘅支付」。
根據一間名為Leading Tech嘅公司以日本人為對象所進行嘅「關於約會費用嘅調查」數據所顯示，約會費用嘅平均金額，男性為6,805日圓，女性為2,612日圓，普遍男性有支付更多約會費用嘅傾向。
根據調查顯示，認為「男方應該要多支付約會費用」嘅人數比率為50%、回答「男方應該全額支付」嘅人數比率為17.8%、回答「應該AA制」嘅人數比率為30.1%。另外，從唔同嘅年齡層去分析，亦發現年輕人認為「應該AA制」嘅人數比較多。
日本人結婚二三事
邂逅心儀對象，再相知相識去到談婚論嫁嘅階段時，眼前要處裡嘅除咗有婚禮、仲有蜜月旅行等等與結婚相關嘅事項。以下落嚟，將會為大家介紹喺日本結婚時，所涉及嘅相關事項以及特徵。
婚禮
同好多地方一樣，日本人認為婚禮係非常重要嘅活動。
日文裡面有「派手婚」（中文意思：華麗婚禮）、「地味婚」（中文意思：樸素婚禮）2個與婚禮相關嘅詞彙。所謂「派手婚」，亦即係將婚禮盛大舉行，包括預訂酒店會場、租用餐廳，邀請公司同事、朋友、親戚等眾多人士參加婚禮；另一方面，「地味婚」係指只有邀請家人等少數人士參加，所舉行嘅簡化式婚禮。
根據Recruit嘅調查（2021年）所顯示，參加婚禮嘅平均人數為42人，而舉辦婚禮所需嘅平均費用為292萬日圓。
接近300萬日圓嘅婚禮費用並非全部由新郎新娘全數承擔。同香港一樣，喺日本參加婚禮嘅客人，需要包禮金（香港又稱為人情）畀新郎新娘，禮金嘅日文為「ご祝儀（Go-shugi）」，新郎新娘會將收到嘅禮金用嚟支付婚禮嘅費用。
禮金金額根據與新郎新娘嘅關係而有所變化。朋友一般係3萬日圓、新郎新娘嘅上司一般係5萬日圓，當然，亦會有比以上提及到嘅更高金額情況出現。
雖然香港包禮金一般會包雙數，代表雙雙對對，但係日本嘅禮金金額必須要係3、5萬日圓等等嘅「單數」。因為「單數=無法被整除」。2、4萬日圓等嘅雙數（=可以被整除）會令人聯想到「新郎新娘會被分開」，所以雙數金額被視為禁忌。
蜜月旅行
講到與結婚相關嘅活動，不得不提蜜月旅行，雖然由於COVID-19疫情嘅影響，至今仍然無法自由出國旅行，不過日本喺COVID-19疫情發生之前，夏威夷、意大利、馬爾代夫等地都係日本新婚夫婦嘅蜜月旅行勝地。日本國內嘅話，北海道及沖繩屬人氣之選。
唔知大家對於以上嘅日本婚活資訊又有咩意見呢？歡迎留言分享有關香港嘅婚活情況畀小編知喔！
相關文章：
Comments