終於望見曙光喇！
近期日本恢復外國旅行團入境呢個消息，應該係香港喺呢幾個月裡面最令人興奮嘅人氣熱話之一吧！
日本政府除咗宣佈恢復接納外國遊客，亦明確地提高每日入境人數上限等方針。距離外國人可以重新呼吸得到日本美好空氣嘅日子，可謂邁向一大步、指日可待。
再加上日圓跌勢持續，如果入境限制、隔離措施統統被解除嘅話，相信一眾港人無理由唔去日本，滿足「返鄉下」嘅慾望！為咗等大家去日本旅遊前可以做足準備，小編將日本呢2年半嘅各種變化等相關資訊重新整理，濃縮成呢篇只需5分鐘即可睇清相關資訊嘅文章。期待已久嘅日本之旅，您準備好出發未吖？
※此文章所記載之情報為2022年6月嘅情報。
1. 「報復式旅遊」嘅目的地要去邊至好？新地標陸續登場
今次嘅「報復式旅遊」，小編有預感大家會非常忙碌。因為喺呢2~3年，日本全國各地都有新設施相繼開幕，根本喺日本逗留成個月都玩唔晒喔。
以下除咗會介紹經已開幕嘅新設施，仲會介紹埋即將開幕嘅設施，即睇小編精選嘅「報復式旅遊」之必去景點推介！
| 施設名稱 | 都道府縣 | 開幕時期（或預定時期） | 施設相關概要 |
| MIYASHITA PARK・澀谷橫丁 | 東京都 | 2020年7月 | 喺宮下公園舊址開幕，集公園・停車場・商業設施・酒店於一身嘅綜合商業設施。 |
| TOKOROZAWA SAKURA TOWN | 埼玉縣 | 2020年11月 | 日本最大型嘅流行文化發信基地。由隈研吾負責監修其建築設計，將圖書館・美術館・博物館融為一體嘅「角川武藏野博物館」更成為社交媒體上人氣熱話。 |
| Mitsui Shopping Park LaLaport FUKUOKA | 福岡縣 | 2022年4月 | 擁有約220間店鋪，係九州地區內首個「LaLaport」，更設有以1：1比例打造嘅「RX-93 高達」巨型立像，以及綜合娛樂設施「GUNDAM PARK」。 |
| Tokyo Disney Resort Toy Story Hotel | 千葉縣 | 2022年4月 | 以迪士尼與彼思電影「Toy Story」系列為主題嘅酒店。客房以安仔（Andy）嘅房間為設計概念，打造成仿如置身故事內嘅歡樂空間。 |
| 通天閣TOWER SLIDER | 大阪府 | 2022年5月 | 全長60ｍ嘅體驗型瀡滑梯。只需10秒即可從通天閣嘅3樓中間展望台（距離地面+22ｍ）一口氣瀡到地下1樓（距離地面-4.5ｍ）。 |
| 吉卜力公園 | 愛知縣 | 2022年11月 | 於愛・地球博記念公園(MORICORO PARK )會見到「哈爾移動城堡」、「幽靈公主」、「龍貓」等等相關園區出現，係一個被打造成吉卜力工作室世界嘅公園。 |
| Warner Bros. Studio Tour Tokyo – The Making of Harry Potter | 東京都 | 2023年春季 | 展示喺電影「Harry Potter」系列中，所使用嘅真正服裝及小道具嘅室內設施。亦可以在此欣賞電影美術佈景或進行體驗活動等。 |
2. 充滿回憶嘅設施相繼倒閉…（哭）
日本因全面停止接待外國旅客，以及多次發佈緊急事態宣言，旅遊業界可謂受到巨大打擊，處於「雪上加霜」嘅狀態。因為再開發及遷移，不得不就此結束嘅相關旅遊景點、商業設施嘅數量非常驚人（單單係東京就已經有咁多！）。下次再去日本嘅時候，或者屬於您那懷念回憶嘅場所經已唔存在，留下嘅只係無盡懷念…？
| 施設名稱 | 都道府縣 | 閉店・閉館時期（或者預定時期） | 理由 |
| 東京台場 大江戸温泉物語 | 東京都 | 2021年9月 | 由於事業用定期借地權設定契約到期，需要還原土地及拆卸建築物，因此閉館。 |
| TOKYU HANDS 池袋店 | 東京都 | 2021年10月 | 由於大廈出現老化問題，如改裝需花費大量金錢，惟預計未來收益未如理想，因此決定結業。 |
| Venus Fort・Palette Town | 東京都 | 2022年3月 | 由於東京台場・Palette Town區域嘅發展因素，將進行重劃改建，因此結束營業。 |
| BICQLO | 東京都 | 2022年6月 | 由於租約期滿而結束營業。Uniqlo結業撤出後，原址會改名為「BicCamera 新宿東口店」。 |
| teamLab Borderless | 東京都 | 2022年8月 | 現時嘅teamLab Borderless將會營運至2022年8月，並預計於2023年，喺東京都中心內開設新館。 |
| 澀谷丸井百貨 | 東京都 | 2022年8月 | 因重建暫時停業。預計於2026年作為日本首個木造商業設施重新登場。 |
| 小田急百貨店 新宿店本館 | 東京都 | 2022年9月 | 隨著新宿站西口地區嘅開發計畫，不得不拆除建築物。結束營業後，預計會將食品、化妝品、國際精品等相關販售轉移到別館嘅HALC。 |
但係，世上並非只有令人傷心嘅消息。
原本預定開放到2022年3月尾嘅「GUNDAM FACTORY YOKOHAMA」，會延長開放至2023年3月31日；另一方面，橫濱紅磚倉庫暫時休館進行大規模翻新整修，已公佈2022年冬天之後就會重新開館。疫情過後嘅日本新面貌究竟會變成點？就等大家飛嚟日本親身感受啦！
3. 日本加價潮停不了！FUN! JAPAN員工們陷入家計危機！？
日圓持續貶值，匯率創20年新低，對於居住海外嘅大家嚟講絕對係入手日圓嘅好時機，與此同時，亦加快日本國內物價上漲嘅步伐。首都高速公路為緩解交通擠塞狀況，從2022年4月開始提高上限費用，包括東京電力在內嘅4間大型電力公司亦宣佈，將從2022年7月開始提高煤氣費、電費。除此之外，由於原材料價格及物流費高漲，日常生活嘅事物亦不斷加價…！
| 加價對象 | 加價時期 | 詳情（以下為含稅價格） |
| Starbucks | 2022年4月 | 全國約1,700間店鋪實施價格調整。主力飲品商品價格會提高約10～55日圓，咖啡豆價格則提高約90～300日圓。 |
| UNIQLO | 2022年秋冬季 | 部分經典商品成加價項目對象 例子： ・FLEECE：1,990日圓→2,990日圓 ・ULTRA LIGHT DOWN JACKET：5,990日圓→6,990日圓 |
| JR東日本 （以山手線、中央線、京濱東北線、埼京線等首都圈16條主要路線為對象（部分區間除外）） | 2023年春 | 普通車票一律加價10日圓 |
| 東京Metro | 2023年3月 | 全部路線票價一律加價10日圓 |
此外，根據日本調查公司帝國數據銀行以105間上市食品公司為對象所進行嘅統計資料顯示，從2022年1月到12月期間，被加價嘅食品已超過1萬種（截止2022年6月1日為止），杯麵、雪糕、肉食類、加工食品類…比起「加價」，似乎更難搵到「未有加價」嘅項目。希望會有人可以拯救正陷入家計危機嘅FUN! JAPAN員工們喔ー
相關文章：
【有用情報小貼士】出發前必備Checklist
一口氣睇完咗以上咁多樣關於日本嘅變化狀況，最後分享一下對日本旅遊有用嘅情報吧。
將大件行李帶入新幹線之前…
從2020年5月開始，搭東海道新幹線・山陽新幹線・九州新幹線時，攜帶長寬高3邊總計超過160cm、250cm以內嘅「大型行李」上車嘅話，需要採取預約制。乘客要喺購買指定席時，一併申請行李放置服務，如果喺未經預約嘅情況下，將行李帶上車嘅話，則須另外支付1,000日圓。大家要帶大型行李上車嘅話，記得要事先預約喔。
請自備購物袋
從2020年7月1日開始，實施膠袋收費政策。膠袋徵費多少由各商戶個別按公司營運狀況等因素自行決定，一般每個膠袋收費為2日圓~5日圓不等。
爆買太多嘅時候要注意
自2021年1月1日起，開始實施國際郵件「Electronic Advance Data（EAD）」義務化制度。簡單嚟講，無論係以EMS（物品）、國際小包、抑或係小型包裝物等方式，所寄出嘅國際郵件，內容物為物品嘅話，就唔可以再以手寫方式填單，必須要事先喺網上填好由日本郵局所提供嘅「Online Shipping Tool 」去製作相關嘅郵寄標籤，照住日本郵局嘅步驟指引填寫就OK。詳情請參考日本郵局嘅網頁。
除咗Covid19嘅應對措施，仲有交通移動・購物等等多方面嘅相關資訊必須要事先預習好，為您嘅日本之旅未雨綢繆，做足準備喔…
Comments